Cetáma 45

Sòsɛ́fù bahìnà o cɔ̰́ɔ̰̀di o kúcààpa

¹ Sòsɛ́fù de koò pú kó nɛɛ́ cɛ̰ɛ̰́ o cɔ̰́ɔ̰̀di nììpa mɛ̀m̀pà de yè péé-pa wɛǹni yìhìka. Ye wɔ̀ni, k'ò yɔ̀ nììpa wɛǹni yɛ̀ɛ̀ tapaàdi. Kà pá yɛ̀ɛ̀, é sɔ̰́ńtá mɔnn n'ɔ̀ɔ kúcààpa pa cɔ̰́ɔ̰̀di, k'ò há̰ nɛɛ́ pà bahìna o cɔ̰́ɔ̰̀di. ² K'ó kpekàna boòku é hódí sàma, háá kà Èsìpùsɛ̰́ɛ̰̀pa mɛ̀m̀pà de yè tɔ́-tɔ́sí-pa é yekà o dawòni, bá nà wódo hɔ̰́ɔ̰́tà-kpɛ́ɛpá. ³ K'ó caka o kúcààpa è yɔ̀: Mmí-dà Sòsɛ́fù. N báàa káà fòù? O kúcààpa pú nɛɛ̀ óò tɛ̰́ná màcɔ̰́mà mìì tee-sá pa bɔ̀ti-dà de pùdi sàma o yìhìka. ⁴ Kà Sòsɛ́fù yɔ̀: Hɛ́tá-nà-ní n pesà. Kà pá hɛ́tá-ní. K'ò yɔ̀: Mmí-dà Sòsɛ́fù nɛ ya̰ǹn nɛ de yɛdáà-ko, kà p'óò tɛɛ̀ní Èsípútì teǹka. ⁵ Sá̰mà-ní, nɛ yàma dá yetá budupa, yè mɛ̀ɛ dá nɛ dɔnka nà nɛ de n yɛdáà-ma kà pá n tɛɛ̀ní miì. Weèdi-dà de n nihìnà-ní yìhìka, è kpɛ̀i n yó nɛ dontá wɔ̰ǹni. ⁶ Bendɛ́ɛ̀di-dà mɛmà nà kòni dúú-ma-ní yɔtí mɛhɛká, k'yè tṵ́mà kaá beeká kànùm̀ kà nìì pú kó nɛɛ́ cɔɔ̀da teǹka, ò mɛ̀ɛ pú kó nɛɛ́ kɔ̰ṵ. ⁷ Weèdi dɛnà é n nihìna-ní nɛ yìhìka, è kpɛ̀i n tɛ̀ni nɛ tíká diití-dà é n'ceí-nà wɔ̀nì mɛnì, k'yé teha kà nɛ́ dempa dɔ́ɔ́di teǹka hḭ́ǹka. ⁸ Wɔ̀ǹ-mɛnì-ní, ye pú yòǹ nɛ́na-dà è n tɔn-ní miì-ní, àmá Weèdi-dà. Mɛní-dà mɛ̀ɛ n kpáhìna wódo sɔ̰̀ǹkànɔ̀ku sàku mɛ̀ǹkù ò teǹ-ku. Mmí-dà mɛ̀ɛ tṵ́mà yòǹ kpɛ̰́ǹn o wóo-nahà̰ku mɛhɛká, è tṵ́mà nihí bá mìì dɛ̀ɛ̀-sa wɛǹni hḭ́ǹka Èsípútì teǹka mɛhɛká.

⁹ Sá̰mà-ní, kòǹ-nà fem̀ma n báàa pesá, é táá ò caka è yɔ̀ o bíitá Sòsɛ́fù-dà nɛ naǹci-ní, è yɔ̀ n'ɔ́ɔ̀ caka è yɔ̀: Weèdi ò kɔ̰́ɔ̰̀ kpɛ̰́ǹti Èsípútì yɔtí wɛǹni hḭ́ǹka. Ò koò dá yóka, ó sḭ́ńtá-ní n pesá. ¹⁰ Ò kó tɛ̀ni m'péé Kòsɛ́ǹ tempáàku mɛhɛká-dà, è ní nà n pɛ̀ɛ-nà, mɔnn n'ɔ̀ɔ bííhí, n'ɔ̀ɔ yaàbíiká, n'ɔ̀ɔ hɔ̰̀ci n'ɔ̀ɔ bɔɔhí, n'ɔ̀ɔ nɛ̀ci, nà mɔnn baà káá-sa wɛǹni. ¹¹ Mií-dà ò kó tɛ̀ni m'péé-ma ká n ò n'dòpù dimá, k'yé teha k'yècɛ̰́ɛ̰̀ dá yetá óò dóńtá, é dóńtá n'ɔ̀ɔ hɔ̰́ɔ̰́tà-kpɛ́ɛpá, n'ɔ̀ɔ nɔtí, mìì tee-sá kòni beeká tṵ́mà kaá kànùm̀-dà.

¹² Nɛ dìi nɛ mɔ́mpé-è, è yɔ̀ mmí mɔ́nń-dà nɛ wɛì, nà n ya̰ǹn Bɛ̀ǹsàmɛ́ɛ̀ mɔ́nń-ḭ́ḭ̀? ¹³ Kòǹ-nà, é táá caka n báàa n wɛhimú sá̰á̰-ma Èsípútì teǹka mɛhɛká, nà nɛ dɛ́hà-sa wɛǹni. Nɛ́ táá pa̰á̰ fem̀ma óò tɛɛ̀ní miì. ¹⁴ K'ó wɛ́í-ho o cɔ̰́ɔ̰̀di nà dawòni Bɛ̀ǹsàmɛ́ɛ̀ fɔ̰̀ɔ̰kú hḭ́ǹka óò yintá, kà pá bàsi pa tɔɔ̀pa, kà Bɛ̀ǹsàmɛ́ɛ̀ mɛ̀ɛ té hódí o fɔ̰̀ɔ̰kú hḭ́ǹka. ¹⁵ K'ó yídá bà-bàsi-nà o kúcààpa tɔɔ̀pa wɛǹni è hódì-nà. Ye kú dàhàka-dà, k'òo kúcààpa bɔ̀ti há̰ nɛɛ́ dɔdi, kà p'óò púsí-nà wɛɛkɔ̰̀ku.

Wóódo Fàdàɔ̰́ɔ̰̀ yíí Sàkɔ́pù è yɔ̀ ó ya̰ní Èsípútì teǹka mɛhɛká

¹⁶ Kà pá yekà wódo nahà̰ku mɛhɛká, è yɔ̀ Sòsɛ́fù kúcààpa tɛ̀ni Èsípútì teǹka mɛhɛká, k'yé naaka wódo hádí n'ɔ̀ɔ sɔ̰̀ǹkànɔ̀ti wɛǹni. ¹⁷ K'ó caka Sòsɛ́fù è yɔ̀: Caka a kúcààpa è yɔ̀ pá toó dimá pa nɔtí hḭ́ǹka, é tón Kànàáà teǹka mɛhɛká, ¹⁸ é táá tóó-ní pa báàa nà pa hɔ̰́ɔ̰́tà-kpɛ́ɛpá é pà tɛɛ̀ní miì. Pà kó tɛ̀ni ká n pà kàna Èsípútì bɛ̀m̀bɛ̀ǹsuudí mɛhɛká-dà, kà pá n'yon yɔtí kɔ̀ma diití. ¹⁹ Pà caka è yɔ̀, pà kó nɛɛ́ tóó-dà Èsípútì teǹka mɛhɛká, nɛ̀ci dawɛ́ɛ̀ti é táá tóó-ní pa poòpa, nà pa bííhí, nà pa báàa. ²⁰ Pà dá yetá kɔń yècɛ̰́ɛ̰̀ kú kpɛ́mú pà kó héé-sa-ní ka bɛ́ka, mìì tee-sá bɛ̀m̀bɛ̀ǹsuudí mɔ́nní-dà pà kó tɛ̀ni kaàdi-má Èsípútì teǹka mɛhɛká.

²¹ Kà Sàkɔ́pù bííhí pa̰ná pà de pà hḭ́mpú. Kà Sòsɛ́fù pà kɔ̰́ɔ̰́ nɛ̀ci dawɛ́ɛ̀ti é n'yònà wódo de hḭ́mpú. K'ó pà kɔ̰́ɔ̰́ nà pa cɔ̀ku dipú. ²² K'ó yídá pa̰a̰ bá pa mɛ̀ǹǹ dɛ̀ɛ̀, kúúdi bátidí pàǹdìdi bááma màcɔ̰́ màcɔ̰́. Bɛ̀ǹsàmɛ́ɛ̀ mɛnn, k'óò pa̰a̰ bááma mànùm̀ nà ye kú wɔ̀ni-hɔ̰ díi-máàka kɔ̀ɔnà ta̰di. ²³ Ǹtɛ mɛ̀ɛkà ò de naǹci-sá-ho o báàa o cà̰ǹku kpɛ́mú: Sa̰mmùǹhi dahí píta, kà hì toó toó mìì péé-sa wɛǹni Èsípútì teǹka mɛhɛká è sudi, nà sa̰mmùǹhi nihí píta, kà hì toó toó pɛ̰́ɛ̰̀ yɔ̀ka nà pɛ̰́ɛ̰̀ mɔ́nń, nà dipú tɔɔ̀pu ò kó n'yonti-pú-ní cɔ̀ku. ²⁴ Ò yɔ̀a tḭ́ń wɔ̀ni miya̰, è há̰ caka o kúcààpa è yɔ̀ pà dá yetá kɛ̰̀ḭ nà pa tɔɔ̀pa cɔ̀ku. Ye wɔ̀ni, k'ó pà cɔa é pà hédá kà pá kòǹ.

²⁵ Kà pá yɛɛ̀ni Èsípútì mɛhɛká, é dúú-ní Kànàáà teǹka, é ta̰ntá-ní pa báàa Sàkɔ́pù de kaàdi-sá. ²⁶ Kà pá tɛ̀ni óò caka è yɔ̀: Ti báà! Sòsɛ́fù káà fòù-ú-ma. Mɛnń-dà múńtà yòǹ kpɛ̰́ǹn niìya̰ wɛǹni hḭ́ǹka Èsípútì teǹka mɛhɛká. Sakɔ́pù pú ni-nikàdà nà pà de ò cakáà-sa kú hḭ́ǹka, mìì tee-sá ò de toò pà báńtí-ma. ²⁷ Kà p'óò tɛ̰́ń-tɛ̰́ná wɛmá Sòsɛ́fù de pà cakáà-ma-ní wɛǹni. K'ó dɛ́há-nà nɛ̀ci dawɛ́ɛ̀ti ò de naǹci-tí-ní è yɔ̀ p'óò tóó-ní, ye wɔ̀ni-dà k'òo yàma wɛǹni há̰ nɛɛ́ tóní. ²⁸ K'ò yɔ̀: Yè sà mɛma. N bíitá Sòsɛ́fù káà fòù-ú-ma nà mɔ́masí. N kó taá ò dɛ́há-ma é nɛɛ́ kpíí.