Cetáma 44

Sòsɛ́fù bɛḿma kú bookú o kúcààpa

¹ K'yé tuɛ̀ha-ní, kà Sòsɛ́fù kɔ̰́ɔ̰́ nùdi o dapàǹn mɛ̀ǹǹ de yòǹ-ko kpɛ̰́ǹn o hɔ̰́ɔ̰̀ta tɔná hḭ́ǹka, è yɔ̀: Sṵ́ná dimá ye nììpà mɛmpà pa píìka. Pà kó nɛɛ́ tokamá, á pà pa̰ná mɛma, é tɛ̰́ná taàa bá pa mɛ̀ǹǹ dɛ̀ɛ̀, o díífa o píídi mɛhɛká. ² Pa saàmɔ́ǹn kú píídi mɛhɛká, é m'bààsí o díífa ò de kó dontá-nà-fa dimá, á tṵ́má taàa n díi-máàti bondedí. K'yèe dapàǹn pa̰ná Sòsɛ́fù de hḭ́mpú wɛǹni. ³ K'yé ya̰dá weka ká̰ńyɛ̰̀ǹfa, kà pá pà hédá kà pá cɛ̰ɛ̰́ pa hɔ̰́ɔ̰́tà cɔ̀ku nà pa sa̰mmùǹhi. ⁴ Kà pá yɛ̀ɛ̀ yɔtí mɛhɛká, è há̰ mum pú tì nátà-nà sukú, kà Sòsɛ́fù tɔn o dapàǹn è yɔ̀: Yídá bɔhà ye nììpà mɛmpà-ní. K'à pà nɛ̀ǹtà, k'á pà béka è yɔ̀: Yè cèǹkaà kà pá tɛ̰́ná suumá sḭ̀ḭ̀ma? ⁵ Badà pa̰nà kà pá yódá-ní a dakpɛ̰́ǹn bondedí? Pà pú yá̰á̰ è yɔ̀ n yɔ̰̀ǹ-di kú mɛhɛká-dà è tṵ́mà nì pa̰hù-nà? Pà pa̰à̰-sa pú sudi báà cɛ̰́ma.

⁶ K'yèe dapàǹn pà bɔ̀hà é pà nɛ̀ǹta, é tɛ̀i pà tɛ̰́ń-tɛ̰́ná o dakpɛ̰́ǹn wɛmá. ⁷ Kà p'óò tɛ̰́ná è yɔ̀: Badà tee kà ti dakpɛ̰́ǹn wɛì mɛma kú bookú, è ti pṵ́ṵ́nì? Ti pú kó nɛɛ́ mahà̰ ye kú niì-ní, k'yè há̰ bá sííka-nà t'éè pa̰ná. ⁸ Tḭ́ńti-dà baà wontà tɛ̰́nà-ní nà Kànàáà teǹka, díící ti de dɛ́hà-ci ti píìka mɛhɛká-aà? Ntɛ́ ti há̰ kó tṵ́má hḭmà é yódá díící yoo wúdó a dakpɛ̰́ǹn hɔ̰́ɔ̰̀ta mɛhɛká? ⁹ Kà ti dɛ́hà-ko kú pesá ye bondedì, kà t'óò kɔ̀ù, tḭ́ńti tɔɔ̀pa kà tí kpáńtá nɛ núm̀ma. ¹⁰ Kà Sòsɛ́fù dapàǹn yɔ̀: Toò, n teháà nɛ hḭ́mpú. Há̰kà, ti kó nì dɛ́há-ko kú pesá cɔ̰́ɔ̰̀di-dà kó n'yòǹ n núǹn, tɔɔ̀pa mɛmpa kó n'kɔ́ɔ́ màcɔ̰́mà. ¹¹ Ye wɔ̀ni, bá pa mɛ̀ǹǹ dɛ̀ɛ̀ k'ó cúhìna-ní teǹka o píídi feǹ-fem̀ma, é nì pḭntá. ¹² Kà Sòsɛ́fù dapàǹn é demu pa píìka mɛhɛká, é cetá-nà pa kpɛ̰́ǹn kpɛ́ɛdí, é deǹta-nà pa sàmɔ́ǹn kpɛ́ɛdí. Kà pá taá dɛ́há bondedí Bɛ̀ǹsàmɛ́ɛ̀ kú píídi mɛhɛká. ¹³ Ye wɔ̀ni, yè koò pú pà káá-nà wɛɛà. Kà pá cɛ́di pa tóhòka, mìì bɛkú-sa è yɔ̀ pa yàma cɔ̰há̰à̰. Bá mɛ̀ǹǹ dɛ̀ɛ̀, k'ó tɛ̰́ná bowá o píídi o sa̰mmùǹta hḭ́ǹka, kà pá tón yɔtí mɛhɛká.

Sùdáà cawà̰pu Bɛ̀ǹsàmɛ́ɛ̀ kpɛ́mú

¹⁴ Sùdáà n'ɔ̀ɔ kúcààpa, kà pá ta̰ntá-ní Sòsɛ́fù hɔ̰́ɔ̰̀ta, é tɛ̀ni è hɔ̰́tà ò káà yè péé. Kà pá tɛ̀ni wɛ̰̀ḭ dúùka è dɔɔ́ háá nà teǹka o yìhìka. ¹⁵ Kà Sòsɛ́fù yɔ̀: M̀mɔ́ńya̰-dà nɛ pa̰à̰-ma ye pesà-ní? Nɛ pú yá̰á̰ è yɔ̀ mmí kú tɔ̀-tɔ̀ɔ̀ kó nɛɛ́ pa̰hí é n'yá̰á̰ mìì kó pa̰á̰-sa kṵ́ńweǹni daadí-i? ¹⁶ Kà Sùdáà óò tɛ̰́ná è yɔ̀: Ti dakpɛ̰́ǹn, ti tṵ́mà kó nɛɛ́ a caka badà? Ntɛ́ ti kó wɛkamá é pṵ́tá ti cɔ̰́ɔ̰̀di? Weèdi-dà dátà a dapàm̀ma sḭ̀ḭ̀ma. Sá̰mà-ní, ti yòǹ nɛ núm̀ma-dà é pɛ́ɛ́ nà pà dɛ́hà-ko kú pesá ye bondedí. ¹⁷ Kà Sòsɛ́fù yɔ̀: Mà kɔ́ɔ́! Yè pú sudi kà n hḭn mɛma. Nììdo pà dɛ́hà-ko kú pesá n bondedí, dà kó n'yòǹ n núǹn. Tɔɔ̀pa mɛmpa tón é kòǹ yɔkàma pa báàa hɔ̰́ɔ̰̀ta. ¹⁸ Ye wɔ̀ni, kà Sùdáà cèn óò pàa-ho, è yɔ̀: Diìda weèdi n dakpɛ̰́ǹn, fɔ̰́di dá yetá áa cɛ̰dí. Hédá k'àa dapàǹn tuɛ̀ha áa caka wɛmá cɛ̰́masí. N mádí, a kpɛ̰́ǹti sá̰à̰-nà Èsípútì wódo kpɛ́ɛtí-dà. ¹⁹ Ti tɛ̀mmá cecemá, a de ti békáà kà ti kaá-nà-ní báàa, yoo kà ti káá-ní ya̰ǹta. ²⁰ Kà t'áa tɛ̰́ná è yɔ̀: Ti báàa káà fòù-ma, àmá è há̰ kpɛ̰́ń sàma. Kà tí tṵ́má áa caka è yɔ̀ ti káá-ma-ní ya̰ǹta, kà ti báàa tà pɛdà o kpɛ̰́ńtì-yèǹka. Pa màà-fɔ̰̀di, o cɔ̰́ɔ̰̀di-dà kadí, o kúpùèyo yɔ̀a kpíipú. Ye kú kpɛ́mú-dà tee kà ti báàa ò dɔ́sí sàma mɔ́ma. ²¹ Ye wɔ̀ni, k'à yɔ̀: T'óò n'àà ya̰à̰ní miì k'á ò dɛ́há n'àa nɔ̀ǹfa. ²² Kà t'áa caka è yɔ̀: Ye bíítà pú kó nɛɛ́ fɛɛ̀ta nà ta báàa. Kà tà yɔ̀a fɛɛ̀tapú, ta báàa kó kpíí-dà. ²³ Ye wɔ̀ni-dà a ti cakáà-ma è yɔ̀, a koò pú kpɛ̀i é ti dɛ́há a yìhìka kà ti pú nɔɔ̀-nà-ní ti ya̰ǹn. ²⁴ Ye kú dàhàka-dà, kà tí kòǹ a dapàǹn ti báàa pesá, é tɛ̀i óò caka a ti hḭ́mpú-ní. ²⁵ K'yé m'péé, kà ti dimá dóńtá, k'ò yɔ̀: Tí tón é táá pà dontá-ní dimá cɛ̰́ma. ²⁶ Kà t'óò caka è yɔ̀: Ti pú kó nɛɛ́ tadí, kà ti ya̰ǹn pú ti nɔɔ̀-nà. Ye yɔtí kpɛ̰́ǹn de yɔ̀ ò koò pú kpɛ̀i é ti dɛ́há o yìhìka, kà ti p'óò nɔɔ̀-nà-ní. ²⁷ Kà ti báàa é ti tɛ̰́ná è yɔ̀: Ti mɔ́mpá ti yá̰á̰-dà sukú, è yɔ̀ o poòo Hàdàsɛ́dì ò pɛdà bíídahí hìdɛ́ɛ́-dà. ²⁸ Hi mɛhɛká, kà tàcɔ̰́ yídá hɔ̰́ɔ̰̀ta é fédí-ho. Nɔɔsḭ̀ǹta-dà kó n'dii mɛnta, mìì tee-sá ò koò pú tà dɛ́hà háá nà yenì. ²⁹ Kà ti tṵ́mà ò hɛ̀dà mɛntà-ní, kà mìì tà tɛ̀ni-sá-ní cɔ̀ku mɛhɛká, ò kpɛ̰́ń k'yè yòmà, nà náńkú-dà ti kó cúhìna-má o yuùpɛ́ɛ́ti kpííku mɛhɛká.

³⁰ Yè yòmà mɛmà-ní n dakpɛ̰́ǹn, kà n tón è kṵn n báàa pesá k'yèe bíítà pú ti nɔɔ̀-nà, o fòmu daàdi-nà-mà ta kpɛ́mù-ní sàma, ³¹ ò pú kó tà dɛ́há tḭ́ń wɔ̀ni ti cɔhɔ̀ka, ò kó kpíí-dà. Ye wɔ̀ni, tḭ́ńti-dà kó n'tee kà ti báàa yuùpɛ́ɛ́ti cútá nà náńkú kpííku mɛhɛká. ³² Mmí-dà mɛ̀ɛ cakáà-ní ti báàa è yɔ̀ n kó n'yá̰á̰ o fòmu kpɛ́mú. N ò cakáà-ní tṵ́màkaà è yɔ̀ kà n p'óò n'ɔ̀ɔ̀ tɛ̰́nà-ní, kà n ní n'tee yetádi o hḭ́ǹka é n'kɔ́ɔ́ yɔ̀amá. ³³ N dakpɛ̰́ǹn, m'a sɛ́úkú-ma sá̰mà-ní. Hédá kà bíitá tṵṵ̀na ta kúpùèpa tɔɔ̀pa kà pá kòǹ, kà mmí cá̰ńtá ta fɛ̀ùdi é n'yòǹ a núǹn. ³⁴ Ntɛ́ n kó hḭmà-dà é kòǹ n báà pesá, k'yèe bíítà pú n nɔɔ̀-nà? N pú kó nɛɛ́ cɛ̰ɛ̰́ n cɔ̰́ɔ̰̀di, n kó dɛ́há tḭ́ń wɔ̀ni kà n báàa yahàǹta nà mii kú nɔɔ̀ti.