Cetáma 47

Sàkɔ́pù taá Èsípútì wódo nahà̰ku mɛhɛká o dɔàpu

¹ Kà Sòsɛ́fù taá caka Èsípútì wódo, è yɔ̀: O báàa n'ɔ̀ɔ kúcààpa-dà tɛ̀ni nà Kànàáà teǹka, è toó-ní pa hɔ̰̀ci, nà pa bɔɔhí, nà pa nɛ̀ci, nà pa kpɛ́ɛsá wɛǹni. Pà péé-ní Kòsɛ́ǹ tempáàku mɛhɛká. ² Ma kú dàhàka, k'ó taá tóó-ní o kúcààpa mɛhɛká nììpa pànùm̀, é tɛ̀ni pà bɛka wódo. ³ Kà wódo pà béka è yɔ̀: Tɔmú m̀mɔ́mu-dà nɛ pa̰kú-ma? Kà p'óò tɛ̰́ná è yɔ̀: Dakpɛ̰́ǹn, a dapàm̀mà yòǹ hɔ̰ɔ̰̀-cɛ̰má-dà è yònà pa yààpa de yòm̀pu. ⁴ Kòni-dà péé-ní sàma ti yɔtí Kànàáà teǹka mɛhɛká, bá míti koò pú péé kà ti nɔtí kó dii. Mɛmá-dà tee, ti tɛ̀ni-má-ní miì cà̰ǹku. Ti cɔɔ̀hu sá̰mà, è yɔ̀ á wɛ̰́dí ti pa̰a̰ nùdi kà tí kaàdi Kòsɛ́ǹ tempáàku mɛhɛká-dà. ⁵ Kà wódo caka Sòsɛ́fù è yɔ̀: A báàa n'àa kúcààpa tɛ̀ni è kó m'péé a pesá-dà. ⁶ Èsípútì yɔtí wɛǹni há̰ dɔɔ́-dà-ma a kpɛ́mú, baàta bɛ̀m̀bɛ̀ǹsuudí é pà kàna. Pà kó nɛɛ́ kaàdi-ma Kòsɛ́ǹ tempáàku mɛhɛká. K'à mɛ̀ɛ yá̰á̰ pa mɛhɛká mɛ̀m̀pà coó-pa, è nɔn nɔtí cɛ̰ntàma dɛ́dɛ́í, k'á pà ta̰si-ní kà pá n'dìi n kpɛ́ɛtí.

⁷ Ma kú dàhàka, kà Sòsɛ́fù taá tóó-ní o báàa, é tɛ̀ni óò bɛka wódo. Kà Sàkɔ́pù dɔa wódo sàma mɔ́ma é cɔhà è yɔ̀ Weèdi óò kóná. ⁸ Kà Wóódo óò béka è yɔ̀: Beeká kàdɛɛ-dà a káá-ma? ⁹ K'óò tɛ̰́ná è yɔ̀: N beeká kɔ̀ta nà púta̰a̰-dà mɛmà-ní nà pà n pɛɛ̀-ma kà n cèǹtì heedí nà ni tɔɔ̀di è yòǹ cà̰ǹn. N kpɛ̰́ń fem̀ma-dà, n pú tɛ̀i n yààpa. Pà há̰ baà de púsí tɔmù n púsí-pù-dà. N dii náńkú-dà sàma. ¹⁰ Ye wɔ̀ni, k'ó cɔa wódo, é tṵ́má cɔhà è yɔ̀ Weèdi óò kóná, è há̰ yɛɛ̀ni o nahà̰ku mɛhɛká.

¹¹ Kà Sòsɛ́fù pa̰ná wódo de hḭ́mpú, é baàta bɛ̀m̀bɛ̀ǹsuudí mɔ́nní Èsípútì teǹka mɛhɛká, é kaàna o báàa n'ɔ̀ɔ kúcààpa kà nì péé Hàdàm̀sɛ́sì yɔtí teǹka. K'ó pà pa̰a̰ teǹka ye pesá, kà pá kà teeka. ¹² K'ó yídá n'dopù dimá o báàa, n'ɔ̀ɔ kúcààpa, n'ɔ̀ɔ hɔ̰́ɔ̰́tà-kpɛ́ɛpá wɛǹni, nìdo bá mɛ̀ǹǹ dɛ̀ɛ̀ n'ɔ̀ɔ bííhí baà sá̰á̰pu.

Sòsɛ́fù púsíma kú bookú o tɔmú kòni benní

¹³ K'yé m'peń-pení, kà dimá dóńtá yɔtí mɛhɛká, yècɛ̰́ɛ̰̀ de koò pú péé è yòǹ diisá, mìì tee-sá kòni de dɔɔ̀haà é pɛtá-ma-ní sàma. Èsípútì mɛhɛká nà Kànàáà mɛhɛká, kà nììpa nì wéèta-nà dɛ́dɛ́í è pú yá̰á̰ pà kó hḭmù. ¹⁴ Kà Sòsɛ́fù tíká díící, Èsípútì nììpa nà Kànàáà nììpa de kɔ́dì-ní è don-nà-ci dimá, é táá cì hḭ́ná wóo-nahà̰ku mɛhɛká. ¹⁵ Díící yɔ̀a tḭ́ń daadí Èsípútì nììpa nà Kànàáà nììpa nɔ̀ku mɛhɛká, kà Èsípútì yam̀ma wɛǹni é tɛ̀ni é dɛ́há Sòsɛ́fù è yɔ̀: Ti pa̰a̰-ní dimá kà tí dii. A kó ti n'wáń-dà kà tí kpíí kòni a yìhìka nà ti kɔ́ɔ́-ma díící kú nɔɔ̀ti-ì? ¹⁶ K'ó pà tɛ̰́ná è yɔ̀: Kà nɛ koò pú káá díící, kà nɛ́ tóó-ní nɛ nɔtí kà tí ceèda ká n nɛ kɔ̰́ɔ̰́ dimá. ¹⁷ Kà pá kòǹ é tóńka-ní pa nɔtí, é tì tɛɛ̀ní Sòsɛ́fù pesá. É tɛ̀ni kà pá ceèda, k'ó pà kɔ̰́ɔ̰́ dimá, é tà̰mù pa sa̰nhí, pa hɔ̰̀ci nà pa bɔɔhí, pa nɛ̀ci nà pa sa̰mmùǹhi. Ye kú benní, Sòsɛ́fù de pà kɔ̰́ɔ̰̀ dimá, é pà cèda nà pa nɔtí wɛǹni-dà.

¹⁸ K'yèe kú benní ka̰há̰, ni tɔɔ̀di, kà pá tóní é tɛ̀ni óò caka è yɔ̀: Ti kpɛ̰́ǹn! Ti pú kó nɛɛ́ a sɔɔ̀na mɔ́ma fá: Ti koò pú káá pídà, ti nɔtí wɛǹni mɛ̀ɛkà, fɔ̰́ń-dà tì tee sá̰mà. Ti koò pú kaá-nà yècɛ̰́ɛ̰̀ è k'éè nà bɛń-nà ceèdamá, ti mɔ́mpá bààsí nà ti yɛ̀ɛ̀ka. ¹⁹ A kó ti n'wáń mɛmà-dà kà tí kpíí ti wɛǹni a yìhìka? Ti yɛ̀ɛ̀ka kó n'yòǹ ba ye wɔ̀ni? Ti dontá é pɛ́ɛ́ dontá nà ti yɛ̀ɛ̀ka é ti pa̰a̰ dimá kà tí dii, ye wɔ̀ni kà tí m'péé nà ti yɛ̀ɛ̀ka wódo núǹti mɛhɛká. Ti pa̰a̰-ní diibɔɔ̀ti, k'yé teha kà tí foùda kà ti yɛ̀ɛ̀ka dá yetá hḭn póḿpontidí.

²⁰ Kà Sòsɛ́fù dontá Èsípútì teǹka yɛ̀ɛ̀ka wɛǹni wódo kpɛ́mú, mìì tee-sá kòni-dà de pehèǹta nììpa sàma, bá pa mɛ̀ǹǹ dɛ̀ɛ̀, k'ò yɛdí o yɛ̀ɛ̀di. Ye wɔ̀ni, kà Èsípútì teǹka wɛǹni é kpáńtá é hḭn wódo kpɛ́ɛká. ²¹ K'ó kpáhìna nììpa wɛǹni wódo núm̀ma, ye yɔtí nà ti nùdi. ²² Yɛ̀ɛ̀ka ò de pú dontà-ka cɔ̰́ɔ̰̀di-dà de héé dɔ̀hàdi kpɛ̰́m̀ma kpɛ́ɛká, mìì tee-sá yè de hɔ̰́tà wódo-dà dènà-ní nùdi mɛmpa kú hḭ́ǹka, kà pà pà kɔ̰́nì dimá fàdà. Pà de fòù-nà-sa-dà, mɛmá-dà tee pà de pú yɛdáà-ma pa kú yɛ̀ɛ̀ka. ²³ Kà Sòsɛ́fù caka ye yɔtí nììpa è yɔ̀: N nɛ dontà-mà yenì-ní, nɛ́na nà nɛ yɛ̀ɛ̀ka wódo kpɛ́mú, n kó nɛ kɔ̰́ɔ̰́-ma sá̰mà diibɔɔ̀ti kà nɛ́ táá bɔɔ́ yɛ̀ɛ̀ka. ²⁴ Há̰kà, diití kɔ̰ṵ wɔ̀ni, niìya̰ yènùm̀ mɛhɛká, nɛ té kó kɔ̰́ɔ̰́ wódo yècɔ̰́-dà. Yènàhì tɔɔsà-ní, nɛ kpɛ́ɛsá-dà. Nà mií-dà nɛ kó n'diinì-ma nɛ cɔ̰́ɔ̰̀di, nà nɛ bííhí, nà nɛ hɔ̰́ɔ̰́tà-kpɛ́ɛpá wɛǹni, é m'bɔɔ̀-nà nɛ yɛ̀ɛ̀ka. ²⁵ Kà p'óò tɛ̰́ná è yɔ̀: Ti kpɛ̰́ǹn, a ti dontà wɔ̰ǹni-dà. A ti pa̰à̰-mà nììmà-ní, ti teháà-ma è kó n'yòǹ wódo núm̀ma. ²⁶ Ye mɛmá-dà, kà Sòsɛ́fù deèna nùdi ye hḭ́ǹka, éè kpáhìna Weèdi kpɛ̰́ǹti nùùka. Háá nà yenì, Èsípútì teǹka mɛhɛká, kà pà kɔ̰ṵ diití, niìya̰ yènùm̀ mɛhɛká, yècɔ̰́ hɔ̰́ n'yòǹ wódo kpɛ́ɛsá-dà. Dɔ̀hɔ̀di kpɛ̰́m̀ma kú yɛ̀ɛ̀ka cɔ̰́ɔ̰̀di-dà de pú hḭn wódo kpɛ́ɛká.

Teḿma Sàkɔ́pù kɔ̰́ɔ̰̀-ma Sòsɛ́fù, è yɔ̀ k'ò ya̰dà kpíi ò kó dáńkamá

²⁷ Mɛmá kú bookú-dà Ìsìdàyɛ́dì kpɛ́ɛpá de tɛ̀ni kaàdi-má Èsípútì teǹka, Kòsɛ́ǹ tempáàku mɛhɛká. Kà pá dɛ́tá kááma sàma ye pesá, é pɛha bííhí, é wɛ́dá é sṵ́ná-hɔ̰. ²⁸ Sàkɔ́pù de pa̰à̰ beeká píta nà kàyehì-dà ye pesá. O fòmu beeká wɛǹni yòǹ, beeká kɔ̀ta nà púnàhì nà kàyehì-dà.

²⁹ Ò hɔ̰́tà-ma o fòmu daàka koò pú wɛhi, k'ó yíí o bíitá Sòsɛ́fù óò caka è yɔ̀: K'à n dɔ́sí-dà dɛ́dɛ́í, k'á n bɛka a pa̰á̰suumá miì kú hḭ́ǹka. Baá a nɔ̀ku n akàma, é n bɛka è yɔ̀ a wɛ̰́há̰à̰-dà, kà n kpíi a pú kó n tɔ̰̀ṵ̀ Èsípútì teǹka mɛhɛká. ³⁰ Kà n kpíi tḭ́ń daadí, k'á n toó é n deèna Èsípútì teǹka mɛhɛká, é táá cḭǹta fɔ̰̀ɔ̰kú pà dánà-ku n yààpa, é n taàa kú mɛhɛká. Kà Sòsɛ́fù óò tɛ̰́ná è yɔ̀: N kó pa̰á̰-ma a hḭ́n-sá wɛǹni. ³¹ K'ò yɔ̀: Wɛ̰́ha̰, kà nà mɔ́masí-dà. Kà Sòsɛ́fù wɛ̰́ha̰. Ye wɔ̀ni, k'ó yḭncí o dɔɔdí yuudí hḭ́ǹka, é sɛda Weèdi.