Cetáma 48

Kónáma Sàkɔ́pù de cɔɔ̀haà-ma Weèdi, Sòsɛ́fù bííhí hḭ́ǹka

¹ K'yèe kú pa̰á̰ma ka̰há̰, k'yé m'péé, kà pá tɛ̀ni caka Sòsɛ́fù è yɔ̀ o báàa mɔn. K'ó tódá o bííhí hi dɛ́ɛ̀ka, Mànàséè nà Èfààyímù é hì tanà o pesá. ² Kà pá caka Sàkɔ́pù è yɔ̀ o bíitá Sòsɛ́fù pení o dɔɔ̀pu. K'ó pa̰á̰ wɛ̰́ɛ̰́ma ye kú daadí, é yídá kaàdi o dɔɔdí hḭ́ǹka. ³ Kà Sòsɛ́fù tɛ̀ni, k'óò caka è yɔ̀: Weèdi nɔɔ̀ti wɛǹni kpɛ́ɛdí de n bɛkáà ni cɔ̰́ɔ̰̀di é n kóná, kà n péé yɔtí pà toò-ti Dùúsì, Kànàáà teǹka mɛhɛká. ⁴ Kà ní n caka è yɔ̀: Nì kó n pa̰a̰ bííhí sàma, é n wɛ́kàna kà nìku dɔ́ɔ́di é yɛɛ̀ni n fɔ̰̀di. È tṵ́mà yɔ̀: Nì kó ya̰dá kɔ̰́ɔ̰́ n dàhàka yɔɔtì mɛntì n bííhí, kà hí tì n'tee k'yé n'kɔ́ɔ́ yɔ̀ɔmá.

⁵ K'ó sɔ̰kadá wɛmá è yɔ̀: Mìì héé-sa a bííhí hi dɛ́ɛ̀ka a pɛdà-hì-ní Èsípútì teǹka mɛhɛká ká n nɛɛ́ a hɔ̰́tá-ní, mɛnhi kó n'yòǹ n kpɛ́hí-dà. Èfààyímù nà Mànàséè kó n'yòǹ n bííhí-dà, é n'yònà Hùdùbɛ́nì nà Sìmɛ̀ɔ́ɔ̀. ⁶ Àmá, bííhí a kó pɛdá-hi mɛmpa kú dàhàka-dà kó n'yòǹ a kpɛ́hí. Hi yèèka té kó ya̰dá yíí hi kúpùèpa nahà̰na mɛhɛká-dà, kà hì té nɛɛ́ ta̰ǹta hi kú kpàtìdi. ⁷ Mìì tee-sá ká n tódá Èfààyímù nà Mànàséè é pà kpáhìna n bííhí, n kpɛ̀i deǹta a màa Hàdàsɛ́dì kpɛ́mú-dà, óò cùa. N de kṵnti-ní nà Pàdáḿ-Àdám̀-dà, k'òo kṵ́mú n dɔdi cɔ̀ku mɛhɛká, kà n pàtì yɔtí pà toò-ti Èfààtáà, kà tì péé Kànàáà teǹka mɛhɛká. Ye Èfààtáà yɔtí-dà pà toò-ma yenì Bɛ̀tìdɛ̀ɛ́m̀. Ti kú cɔ̀ku bɛ́ɛ́kú-dà n de ò dánà-ma.

⁸ K'ó diìda é dɛ́há Sòsɛ́fù bííhí hi dɛ́ɛ̀ka, é béka è yɔ̀: M̀mɔ́ḿpa-dà miì? ⁹ Kà Sòsɛ́fù óò tɛ̰́ná è yɔ̀: N bííhí-dà Weèdi n pɛ̰ḭ-hí Èsípútì teǹka mɛhɛká. K'ò yɔ̀: Diìda weèdi! Hì ya̰à̰ní n pesà ká n hì kóná. ¹⁰ Sàkɔ́pù nɔ̀ǹci de koò pú dìi, mìì tee-sá ò de kpɛ̰́ń-dà sàma. Ò de koò pú dìi yècɛ̰́ɛ̰̀. Kà Sòsɛ́fù hɛ́hèna-ní o bííhí o pesá, k'ó hì bàsi-nà é mɛ́hi hi bɛ̀ci. ¹¹ K'ó caka Sòsɛ́fù è yɔ̀: N de koò pú maàhaà è yɔ̀ n k'áa dɛ́há. Ǹtɛ há̰kà, kà Weèdi múńtá hédá ká n dɛ́há n'àa bííhí. ¹² Ye wɔ̀ni, kà Sòsɛ́fù yíkàna o bííhí o báàa dúùka hḭ́ǹka, é wɛ̰̀ḭ o mɔ́nń é dɔɔ́ háá nà teǹka. ¹³ K'ó yídá tódá o bííhí hi dɛ́ɛ̀ka o nɔ̀hi mɛhɛká, Èfààyímù o nɔ̀ǹkàǹhiokú, k'ò bòn-nà Sàkɔ́pù nɔ̀ǹkàǹcà̰nkú, é yídá Mànàséè o nɔ̀ǹkàǹcà̰nkú mɛhɛká, k'ò bòn-nà Sàkɔ́pù nɔ̀ǹkàǹhiokú. Ye wɔ̀ni, è há̰ pà hɛ́hèna-hɔ̰ o fɔ̰̀di. ¹⁴ Kà Sàkɔ́pù seùda o nɔ̀hi, é hɛɛ̀da o hiokú é baká Èfààyímù yuudí hḭ́ǹka nà ò baà de yòǹ-sà sàmɔ́ǹn, é hɛɛ̀da o cà̰nkú é baká Mànàséè mɛ̀ǹǹ de yòǹ-ko kpɛ̰́ǹn kú yuudí hḭ́ǹka. ¹⁵ Ye wɔ̀ni, k'ó kóná Sòsɛ́fù è yɔ̀: N cɔɔ̀hu Weèdi n báàkpɛ̰́ǹn Àbààhám̀ nà n báà Ìsáákì de tṵ̀n-dí-dà, Weèdi mɛ̀nì n púsí-di nà n bíkáḿbíikú háá é tódá nà yenì, ¹⁶ Weèdi Tɔntɔntikó mɛ̀ǹǹ n dontà-ko sḭ̀ǹya̰ wɛǹni mɛhɛká, è yɔ̀ ní kóná ye bííhì mɛnhì. Nà hi kú nɔɔ̀ti, n yèdi baà n'fòù k'yé teha kà n báàkpɛ̰́ǹn Àbààhám̀ nà n báà Ìsáákì kpɛ́ɛká mɛ̀ɛ té n'fòù. Weèdi hédá kà pá wɛ́dá sàma yɔɔtì mɛntì wɛǹni mɛhɛká.

¹⁷ Sòsɛ́fù dɛ́hà-ma k'òo báàa cɔ̰ná o nɔ̀ǹkàǹhiokú Èfààyímù yuudí hḭ́ǹka, k'yèe kú pa̰á̰mà pú ò naakáà. K'ó cɛ̰dí o báàa nɔ̀ku, é kù cɔ̰ntá Èfààyímù yuudí hḭ́ǹka, é kù tanà Mànàséè kpɛ́ɛdí hḭ́ǹka, ¹⁸ ye wɔ̀ni, è yɔ̀: Mɛma dɔ n báà! A yeekú-ma. Mɛnǹ-dà yòǹ Pɔ̀ɔ. Cɔ̰ná a nɔ̀ǹkàǹhiokú o kú yuudí hḭ́ǹka. ¹⁹ K'òo báàa yeda, è yɔ̀: N mà yá̰á̰-ma n biidà, n mà yá̰á̰-ma. Mànàséè kú yaàbíiká mɛ̀ɛ té kó ya̰dá n'yòǹ nìku dɔ́ɔ́di-dà. Há̰kà, o ya̰ǹta kó ya̰dá óò ha̰tá-ma. Ta yaàbíiká kó ya̰dá hḭn heèka dɔ́ɔ́di-dà. ²⁰ Ye kú daadí k'ó hì kóná, è yɔ̀: Ìsìdàyɛ́dì yam̀ma té kó ya̰dá n'kpɛ̀i é kóná nìdo, é yíí nɛ́na kú yèèka-dà è yɔ̀: Weèdi óò pa̰ná suumá, é n'yònà nì de pa̰káàma Èfààyímù nà Mànàséè. Mɛmá-dà ò hḭn-má, é nihìna Èfààyímù, Mànàséè yìhìka.

²¹ Ma kú dàhàka, k'ó caka Sòsɛ́fù è yɔ̀: N koò pú dɛu kṵ́mú, há̰kà, Weèdi kó nɛ m'péé-nà-á-ma. Nì kó yó nɛ tɛ̰́ná-ma nɛ yààpa yɔtí mɛhɛká. ²² Mmí kú bɛ́ka há̰kà, m'a pɛ̰ḭ todedí kà nì wɛhi-nà a kúcààpa kpɛ́ɛká. M'a pɛ̰ḭ Sìsɛ́m̀ tempáàku n de fedà-ku Àmɔ̀nítìpa nɔ̀hi mɛhɛká nà n seepɛ̰ɛ̰̀dí, nà n ta̰m̀mu.