Cetáma 50

Sàkɔ́pù dánáma Kànàáà teǹka mɛhɛká.

¹ Sòsɛ́fù hɔ̰́tà-ma o báàa kpíi-dà tá, k'ó cemá wɛ́í-ho o cɔ̰́ɔ̰̀di ye wɔ̀ni nà ye wɔ̀ni o báàa yìhìka hḭ́ǹka, é hódí sàma mɔ́ma, é mɛhí o bɛ̀ci. ² Ye kú dàhàka, k'ó caka o dapàm̀ma mɛ̀m̀pà de dehú-pa o kpɛ́mú è yòǹ dòkòtóòsàpa, è yɔ̀ pá dɔ̀hà o báàa nawɔ̰̀ǹku nà teepú kà kù dá cɔ̰ha̰. Kà pá mà hḭn. ³ Pa kú bookú pa̰á̰ma mɛhɛká, pà de yònà é n'káá daàka púnàhì-dà è dɔ̀hu o nawɔ̰̀ǹku nà teepú kà kù dá cɔ̰ha̰. Kà Èsípútì yam̀ma kɔń o kṵ́mú é n'yòǹ daàka púyehì.

⁴ Ye kṵ́mú daàka yɔ̀a-má, kà Sòsɛ́fù caka wódo nahà̰ku yam̀ma è yɔ̀: Kà n káá yuudí-dà nɛ pesá, n nɛ sɛ́úkú-ma, kà nɛ́ taá n caka wódo è yɔ̀: ⁵ Kà n báàa nɛɛ́ kpíí, ò de n hḭ́nà nùdi-dà ká n wɛ̰́ha̰ ni hḭ́ǹka. Ò de yɔ̀: K'ò kpíi, ká n taá cḭǹta fɔ̰̀ɔ̰kú ò de dɔɔ̀haà-ku o cɔ̰́ɔ̰̀di kpɛ́mú Kànàáà teǹka mɛhɛká, óò dáná. N ò cɔ̀hu nùdi, è kó taá ò dáná-ní ka bɛ́ka, é tón é koní. ⁶ Kà wódo óò pa̰a̰ nùdi, è yɔ̀ ó taá dáná-ní o báàa ka bɛ́ka, é n'yònà ò de wɛ̰́há̰à̰ o yìhìka è yɔ̀ ò k'óò pa̰á̰-sa k'ò káà fòù.

⁷ Ye wɔ̀ni, k'ó yídá cɛ̰ɛ̰́ Kànàáà cɔ̀ku. Kà wódo nahà̰ku sɔ̰̀kànɔ̀ti kpɛ̰́ǹti wɛǹni, mɛ̀ǹtì de péé-ti è dehú kpɛ́mú, nà Èsípútì teǹka kpɛ̰́m̀ma wɛǹni óò bɛ́hɛ̀na. ⁸ O mɔ́nń kú hɔ̰́ɔ̰́tà-kpɛ́ɛpá wɛǹni mɛ̀ɛ té de taá-ma, é pɛ́ɛ́ n'ɔ̀ɔ kúcààpa, nà pa hɔ̰́ɔ̰sàta nììpa tɔɔ̀pa. Òcɔ̰́ǹ de pú sɔ̰́ńtà Kòsɛ́ǹ tempáàku mɛhɛká, bííhí cɔ̰́ɔ̰̀di bààsí nà nɔtí. ⁹ É yídá, kà wóo-sa̰n-dawɛ́ɛ̀ti nà sa̰n-dáápa pà nɔɔ̀-nà. Pa dɔ́ɔ́di de wɛhi sàma-dà è káá bɔɔ̀-pùukú. ¹⁰ Kà pá ta̰ntá bɛ̀m̀bɛ̀ni pà toò-di Kòdɛ́nì-Àtátì, mìì cakú-sa è yɔ̀ poòma yɛɛkú, kà nì péé Sùùtɛ̰́ɛ̰̀ kón-sóìdi híńkà-bɛ́kà kpɛ́ɛdí. Kà pá tɛ̀ni ye pesá, é pa̰ná o báàa kṵ́mú dɔ̀hɔ̀di sàdi mɔ́nní. K'ó tṵ́má kaàdi o báàa kṵ́mú ye pesá, é n'yòǹ daàa kàyehì. ¹¹ Kànàáà nììpa mɛ̀m̀pà de ka-kaàdi-pá ye pesá de dɛ́hà ye kú kṵ́mú dɔ̀hɔ̀di-dà, è yɔ̀: Kṵ́mú sàmu-dà dɔdi Èsípútì yam̀ma. Ye mɛmá-dà kà pà de tṵ́má pa̰a̰-nà ye bɛ̀m̀bɛ̀ni yèdi è yɔ̀: Àbɛ́ɛ́-Mìsìdàyím̀, mìì kpɛ̀i n'yɔ̀-sa Èsípútì kṵ́mú.

¹² Ye kú dàhàka-dà, Sàkɔ́pù bííhí há̰ nɛɛ́ pa̰á̰-ma hi báàa de hì hḭ́mpú. ¹³ Kà hí ò toó Kànàáà teǹka mɛhɛká, é tɛ̀i óò dáná tá̰a̰-kpɛ̰́ɛ̰̀ku fɔ̰̀ɔ̰kú mɛ̀ǹkù péé-ku yɛ̀ɛ̀di pà toò-di Màkpèdáà, kà nì hɛ́dí-nà Màmùdéè yɔtí. Àbààhám̀-dà de nì dontà Èfùnɔ́ɔ̀ pesá, nìdo k'ò yòǹ Hítìpa bookú é nì kpáhìna o hɔ̰́ɔ̰̀ta pòdi. ¹⁴ Sòsɛ́fù dánà-ma o báàa é yɔ̀a, k'ó tón é koní Èsípútì teǹka mɛhɛká, n'ɔ̀ɔ kúcààpa, nà mɛ̀m̀pà kú wɛnnì de ò bɛ́hɛ̀nà-pa o báàa dánápu.

¹⁵ O kúcààpa hɔ̰́tà-ma pa báàa kpíi, kà pá caka pa tɔɔ̀pa è yɔ̀: Ti báàa kpíi-mà-ní sá̰mà, Sòsɛ́fù kó nɛɛ́ deǹta-ma sḭ̀ḭ̀ma ti de ò pa̰à̰-ma é mà tì bodá. ¹⁶ Ye kú kpɛ́mú, kà pá naǹci nànànkú óò caka è yɔ̀: Ǹtɛ wɛɛ-nùdi a báàa de hḭ́nà-di é nɛɛ́ kpíí: ¹⁷ Ò de yɔ̀: Nɛ́ táá caka Sòsɛ́fù nà n kpɛ́mú è yɔ̀ ó diìda weèdi é bútá dàhàka sḭ̀ḭ̀ma o kúcààpa de ò pa̰à̰-ma, nà kpákpààsa pà de ò pa̰à̰-sa wɛǹni k'yè pú coó. T'aa sɛ́úkú-ma sá̰mà-ní, wɛ̰́ɛ̰́ bútá dàhàka sḭ̀ḭ̀ma ti de a pa̰à̰-ma wɛǹni, mìì tee-sá ti dɔń Weèdi nìcɔ̰́-dà n'àa báàa. Pà tɔn-má é caka mɛma Sòsɛ́fù, k'ó cemá hódí.

¹⁸ Ma kú dàhàka, k'òo kúcààpa tɛ̀ni pa mɔ́mpá óò pèta-nà, é tɛ̀ni wɛ̰̀ḭ-wɛ̰̀ḭ-hɔ̰ o yìhìka è yɔ̀: Ti yòǹ a núm̀ma-dà. ¹⁹ Kà Sòsɛ́fù pà caka è yɔ̀: Nɛ dá n'wani. N yòǹ Weèdi-d'aa? ²⁰ Nɛ de kpɛ̀i é n pa̰á̰ sḭ̀ḭ̀ma-dà, kà Weèdi mɛ̀ɛ mà cèhèna suumá. Nì de mà hḭn mɛma, è kpɛ̀i dontá yenì kú daadí nìku dɔ́ɔ́di wɔ̰ǹni-dà, nɛ mɔ́mpá mɛ̀ɛ dɛ́hà-á-dà-ma mìì pa̰à̰-sa. ²¹ Nɛ koò dá n'wani sá̰mà-ní. N kó nɛ púsí-ma é pɛ́ɛ́ púsí-nà nɛ bííhí. Nɛ kó n'kpɛ̀i-sá wɛǹni, n k'éè nɛ kɔ̰́ɔ̰́-ma. Mɛmá-dà ò de pà wɛɛ̀-nà-ma é tón é nakàna pa yàma.

Sòsɛ́fù kṵ́mú

²² K'ó m'péé Èsípútì teǹka mɛhɛká n'ɔ̀ɔ báà hɔ̰́ɔ̰́tà-kpɛ́ɛpá. O fòmu beeká wɛǹni de yòǹ, beeká kɔ̀ta nà píta-dà. ²³ K'ó dɛ́há o bíitá Èfààyímù bííhí kú yaàbíiká pɛdáma. É yídá dɛ́há Mànàséè kú bíitá Màkíì kú bííhí pedáma, é hì kpáhìna o kpɛ́hí. ²⁴ Daadí yènì, k'ó caka o kúcààpa è yɔ̀: N kṵ́mú daadí koò pú dɛu. Àmá, n há̰ yá̰á̰-ma è yɔ̀ Weèdi kó yɔ́ nɛ tempa-nà é nɛ deèna yɔɔtì mɛntì kú mɛhɛká, é nɛ tɛ̰́ná yɔtí nì de wɛ̰́há̰à̰ è yɔ̀ nì kó kɔ̰́ɔ̰́-ti Àbààhám̀, nà Ìsáákì, nà Sàkɔ́pù. ²⁵ Há̰kà, nɛ́ wɛ̰́ha̰ n yìhìka, è yɔ̀ Weèdi kó n'kó nɛ deèna tḭ́ń daadí yɔɔtì mɛntì kú mɛhɛká, nɛ kó n'yɛtì è toó-ma n kɔ̰́ɔ̰̀ka. Kà pá mà hḭn. ²⁶ K'ó kpíí Èsípútì teǹka mɛhɛká, è káá beeká kɔ̀ta nà píta. Kà pá pa̰á̰ o nawɔ̰̀ǹku teepú è yɔ̀ kù dá cɔ̰ha̰, óò tàa tá̰à̰ka totodí mɛhɛká.