Núǹtiyɛ̀ɛ̀ma 5

Mɔ̀yísì nà Ànɔ́ɔ̀ taá Fàdàɔ̰́ɔ̰̀ pesá.

¹ Ye kú dàhàka, Mɔ̀yísì nà Ànɔ́ɔ̀ kà pá yíí é taá Fàdàɔ̰́ɔ̰̀ pesá é tɛ̀i óò caka è yɔ̀: Ǹtɛ Kɔ́yɔ̀ɔ, Ìsìdàyɛ́dì Weèdi hḭ́mpú: Héé n nìku kà kú taá é ya̰nkà kúúdi càwenkú mɛhɛká n kpɛ́mú.

² Kà Fàdàɔ̰́ɔ̰̀ é pà tɛ̰́ná è yɔ̀: Woò pà toò-ma Kɔ́yɔ̀ɔ, kà n k'óò besí, é héé Ìsìdàyɛ́dìpa kà pá ka̰há? N p'óò yá̰á̰, n mɛ̀ɛ pú kó pà héé kà pá ka̰há. ³ Mɔ̀yísì nà Ànɔ́ɔ̀, kà pà yɔ̀: Hèbùdéèpa Weèdi-dà ti fodà-ní é ti wɛɛ́-nà. Ye kú kpɛ́mú, héé kà tí cèn daàa kàta̰a̰ càwenkú mɛhɛká é taá é pa̰á̰ dɔ̀hàka Kɔ́yɔ̀ɔ, ti Weèdi, k'yé teha kà nì dá ti kɔ̀ù-nà ta̰à̰pu yoo dɔnhaàdikú^a

⁴ Kà Èsípútì wódo é caka Mɔ̀yísì nà Ànɔ́ɔ̀ è yɔ̀: M̀mɔ́ya̰-dà tee kà nɛ yɛ̰ṵ̀ Ìsìdàyɛ́dìpa è yɔ̀ pá wɛ́í pa tɔná? Taá é púsí-nà nɛ kpɛ́ɛná! ⁵ Ǹtɛ kà pà múńtà wɛ́dà sàma é sṵ́ná-hɔ̰ sá̰mà, kà n'aá kpɛ̀i é nɛhìna pa tɔná wɔ̀nì!

Fàdàɔ̰́ɔ̰̀ tɔ̀hìnà Ìsìdàyɛ́dìpa tɔná.

⁶ Ye daadí ni cɔ̰́ɔ̰̀di mɛhɛká, kà Fàdàɔ̰́ɔ̰̀ é caka Èsípútì tɔn-kpɛ̰́m̀ma nà Ìsìdàyɛ́dì kpɛ́ɛpá pà de ta̰si-pá kà pà cɔ́ti pa tɔɔ̀pa tɔná è yɔ̀: ⁷ Nɛ koò dá kɔ̰́ɔ̰́ Ìsìdàyɛ́dìpa míti kà pá m'pa̰kú-nà bìdíkìpa é n'yònà nɛ de mà hɔ̰mpú. Nɛ́ pà héé kà pá taá é tì pɛha-ní pa cɔ̰́ɔ̰̀di. ⁸ Nɛ́ héé kà pà té pa̰á̰ bìdíkìpa pà baà de hɔ̰́ pa̰á̰-pa kú nùdi, nɛ dá yakàda yècɛ̰́ɛ̰̀. Pà yòǹ dóúcí-dà, mií-ì tee kà pà tonà pà kó taá é pa̰á̰ pa Weèdi dɔ̀hàka. ⁹ Nɛ́ dɔ̀hà é wɛkàna pa tɔná sàma, k'yé teha kà pà koò dá dɛ́há bòòdi é m'mahàta nuǹhetí pà pà cakú-ti hḭ́ǹka.

¹⁰ Kà Èsípútì tɔn-kpɛ̰́m̀ma nà Ìsìdàyɛ́dì kpɛ́ɛpá pà ta̰si-pá kà pà cɔ́ti pa tɔɔ̀pa tɔná é taá dɛ́há Ìsìdàyɛ́dì nìku é kù caka è yɔ̀: Fàdàɔ̰́ɔ̰̀ yɔ̀ ò koò pú kó nɛ kɔ̰́ɔ̰́ míti. ¹¹ Nɛ́ taá tì pɛha-ní nɛ mɔ́mpá nɛ kó tì dɛ́tá-sa. N'aá n'ya̰á̰ è yɔ̀ bìdíkì pú kó yakàda nɛ de hɔ̰́ pa̰á̰-pa kú nùdi hḭ́ǹka.

¹² Ye wɔ̀ni, K'yèe Ìsìdàyɛ́dì nìku é wiìda é cèn Èsípútì teǹka wɛǹni, é kɛ̰ḭ bɔmíti é tì fìhà. ¹³ Kà Èsípútì tɔn-kpɛ̰́m̀ma pà pɛ̰́kápú è tonà: Hɛ̰́ká-nà é té yɔ̀ɔ nɛ daadí wɛǹni tɔmú é n'yònà pà de hɔ̰́ nɛ kɔ̰́ɔ̰́ míti kà nɛ́ mù pa̰kamá. ¹⁴ Pà de múńtà podì-í-ma Ìsìdàyɛ́dì tɔnkpɛ̰́m̀ma pà de nihìnà-pa è pà békú è tonà: Baà tee wondàko nà yenì, kà nɛ pú pa̰à̰ bìdíkìpa nɛ de yònà é pa̰á̰-pa kú nùdi?

¹⁵ Kà Ìsìdàyɛ́dì tɔn-kpɛ̰́m̀ma é taá Fàdàɔ̰́ɔ̰̀ pesá é taá ò kɔń-nà è yɔ̀: Badà tee k'à ti hɔ̰n mɛmà kú bookú tḭ́ńti a dehèpa? ¹⁶ Pà koò pú ti kɔ̰́nì mídì, àá baà toò tí fḭ́hà bìdíkìpa. Ye kú dàhàka, kà pà tṵ́mà ti podì. A nìku-dà káá yetádi. ¹⁷ Kà Fàdàɔ̰́ɔ̰̀ é pà tɛ̰́ná è yɔ̀: Nɛ yòǹ dóúcí-dà, dóúcí mɔ́-mɔ́ncí. Mɛmá-dà tee kà nɛ toò: Tí taá é pa̰á̰ Kɔ́yɔ̀ɔ dɔ̀hàka. ¹⁸ Tón-nà sá̰ńsá̰mà é taá tɔń, pà koò pú kó nɛ kɔ̰́ɔ̰́ míti. N'aá baà yònà é pa̰á̰ bìdíkìpa nɛ de hɔ̰́ pa̰á̰-pa kú nùdi-dà.

¹⁹ Kà Ìsìdàyɛ́dì tɔn-kpɛ̰́m̀ma é n'hɔ̰́tà yè dɔ̀haà é pà pɛ̰́ná-ma, mìì tee-sá, pà de pà cakáà è yɔ̀: Nɛ pú yònà é yakàda bìdíkìpa nɛ yònà é pa̰á̰-pa kú nùdi daadí wɛǹni. ²⁰ Kà pá n'yɛtì-ní Fàdàɔ̰́ɔ̰̀ hɔ̰́ɔ̰̀ta é tikàda-ní Mɔ̀yísì nà Ànɔ́ɔ̀ kà pà nɛ̀hi ye pesá è pà ceí. ²¹ Kà pá pà caka è yɔ̀: Kɔ́yɔ̀ɔ é dɛ́há nɛ pa̰à̰-sa é nɛ kɔ̰́ɔ̰́ yetádi sídàma mɛhɛká. Nɛ́na-dà tee Fàdàɔ̰́ɔ̰̀ n'ɔ̀ɔ sɔ̰̀ǹkànɔ̀ti, kà pà koò pú kpɛ̀i é yekà ti nɔ́kú. Nɛ tódà sepɛ̰ɛ̰̀dí-dà é taàa pa nɔ̀hi mɛhɛká è yɔ̀ pá ti kɔ̀ù-nà.

²² Kà Mɔ̀yísì é fitá Kɔ́yɔ̀ɔ bɛ́ka óò béka è yɔ̀: N Bateù, badà tee k'á pa̰á̰ ye nìkù kpákpààma? Badà tee k'á n tɔn-ní miì? ²³ Nà n taá-ma é dɛ́há Fàdàɔ̰́ɔ̰̀, óò wɛɛ́-n'àa yèdi, ò baà sɔ̰kù-ú-ma è fɔ́hú a nìku. A mɛ̀ɛ pú pa̰à̰ yècɛ̰́ɛ̰̀ è kó kù fḭ́hìna.