Màtíyéè i

Sèsíì wɛnaamá Màtíyéè wà̰haà-ma

Cetá Kam̀ma

Sèsíì tɔntɔdikó pà toò-ko Màtíyéè, k'ò yòǹ Sùwífùpa bookú, mɛnń-dà wà̰haà wɛnaamà mɛmà. O yèdi tɔɔ̀di-dà de héé Dèfí. Ò de yòǹ kaàcáho-dà kà Sèsíì óò yíí k'ó hḭn o dapàǹn. Wɛnaamá ò wà̰haà-ma miì, ò de mà wà̰haà Sùwífùpa kpɛ́mú-dà è kpɛ̀i é pà wekàna è yɔ̀ Sèsíì-dà yòǹ ye Weèdi Ta̰kadáko pà de ceí-ko. Mɛnń-dà tɛ̀ni é pa̰ná pépédí Weèdi pɔ̀kàhi de wɛì-sa Ta̰kadáko hḭ́ǹka. Ye kú kpɛ́mú-dà tee, k'ó tóńka wɛnɔ̀ka dɔ́ɔ́di múnáma kpɛ̰́m̀ma pɔ̀kàhi mɛhɛká, è kà kɛ̀da o wɛmá mɛhɛká. Ò de tṵ́mà kpɛ̀i é bɛka o kpɛ́ɛpá è yɔ̀ Sèsíì de kɔ́ɔ́ tɔɔ̀o kpeèti nà nɔɔ̀ti hḭ́ǹka. Ò mɛ̀ɛ té de kpɛ̀i pá bantá-ma è yɔ̀ Sèsíì-dà yòǹ pa wódo, ye Dàfítì yaàbíidí Weèdi wɛtɛ̰́nápa de wɛì-di kú wɛmá. Ò de kpɛ̀i pá bantá è yɔ̀ ò tɛ̀ni è kó pà wekàna pà yònà é yekà-ma kú bookú-dà sá̰mà-ní kpɛ̰́ńtìnùka nà kákamú pà de pa̰kú-mu wɛǹni kà mù péé-nà-ní múnáma kpɛ̰́m̀ma pɔ̀kàhi mɛhɛká. Pá yá̰dá è yɔ̀ Weèdi wóòti yɔ̀ɔ tɛ̀mpú-dà-ní teǹka hḭ́ǹka. O pɔ̀kàta wɛmá tṵ̀n wɛnaamá pɔ̀kàhi tɔhí hìta̰a̰ kpɛ́ɛmá-dà. O pɔ̀kàta cetáma pesá, ò cakáà-á-ma Sèsíì yààpa yèka, é wɛdá p'òò pɛkáàma, mɛnń pà yún-kó Èmànìyɛ́dì, mìì kpɛ̀i é nyɔ̀-sa Weèdi ti péé-nà. Ye kú dàhàka, Màtíyéè tíkà Sèsíì wɛmá ò cakáà-ma kà mà yòǹ cɛ̰ncí sàci cìnùm̀-dà:- Cɛ̰nkú cecekú cakú Sèsíì dapàm̀ma yònà é n'fòùkaàma kú bookú-dà. Kù mɛ̀ɛ tṵ́mà toó wɛmá mɛ̀mà cakú-ma-dà nìpa yònà é n'fòùkaàma nà pa tɔɔ̀pa, é yídá nà Weèdi (Wy 5 háá 7).- Cɛ̰nkú dɛ́ɛ̀kú mɛnku kɔ̰́nì nùka-dà nà tencí mɛ̀m̀pà tahú è cakú-pa Sèsíì wɛnaamá (Wy 10).- Cɛ̰nkú taá̰ku mɛnku toó Sèsíì cakáà-sa wɛǹni-dà è kpɛ̀i nìpa yekà mìì pa̰kú-sa kà Weèdi wódí (Wy 13).- Cɛ̰nkú nàhikú cakú weèdɔɔ̀pa yònà é n'fòùkaàma-dà pa cɔ̰́ɔ̰̀di cɔhɔ̀ka (Wy 18).- Cɛ̰nkú nùmkú mɛnku cakú weèdɔɔ̀pa kó nɛɛ́ é n'ceí-ma-dà Weèdi nɛdáma dèǹdèma (Wy 24 háá25).Ye cɛ̰ncì ci cɔhɔ̀ka, Màtíyéè fɛ̰à̰ Sèsíì tɔná tɔɔ̀na-dà k'yé n'yònà: mɔkàpa kpekànamá, nìku dɔ́ɔ́di diáma, nɔ̀nɔ̀hicí nà Sùwífùpa kpɛ̰́m̀ma, nà tɔɔ̀sa tɔɔ̀sa.