Mádíkì i

Sèsíì wɛnaamá Mádíkì wà̰haà-ma

Cetá Kam̀má

Mádíkì-dà wà̰haà wɛmà mɛ̀mà péé-mà ye pɔ̀kàtà mɛntà kú mɛhɛkà. Ò de pú yòǹ Sèsíì tɔntɔndikó. Ò de nɔɔ̀-nà Pɔ́dì-dà o cà̰ǹci dɔ́ɔ́di mɛhɛká kà pà cakú Weèdi wɛmá. Ò mɛ̀ɛ te de tempáà-nà-á-ma Píyɛ́ɛ̀ Weèdi tɔmú mɛhɛká. O kú pesá-dà ò de tóò-ma wɛmà ò wà̰haà-mà o pɔ̀kàtà mɛhɛkà.

Mádíkì de tà wà̰haà weèdɔɔ̀pa mɛ̀m̀pà pú yòǹ-pa-dà Sùwífùpa, ye kú kpɛ́mú-dà tee k'ò de wekànì Sùwífùpa bookú pa̰á̰ma. Ò de tà wà̰haà è kpɛ̀i é bɛka mɛ̀m̀pà k'óò kàn-pá è yɔ̀ Kídísì-dà héé Weèdi bíitá, è dehú è pú wéní Weèdi nà nìpa kpɛ́mú. O nɔ̀ǹfa de cɔ̰mú Sèsíì pa̰kú-na dehèna hḭ́ǹka-dà, ye kú kpɛ́mú-dà tee k'ò bɛkú Sèsíì k'ò kpekànì mɔkàpa, è wɛ́kánì pɛ̰́ɛ̰̀pa kà nìku dɔ́ɔ́di yon. Ye kú pɔ́ńtátɔnà-dà de bɛkú è yɔ̀ ò yòǹ Weèdi. Sèsíì há̰ de pú bɔhɔ̀ta wɛkànamá o dehèna mɛhɛká, àmá ò de yá̰á̰-ma è yɔ̀ ò tɛ̀ni è kó dii náńkú-dà, é kpíí é dontá nìku dɔ́ɔ́di.

Sèsíì de cetà o tɔná Kàdìdéè tempáàku mɛhɛká-dà é nà dèhà Sèdìsàdɛ́m̀ yɔtí, Sùdéè tempáàku mɛhɛká. Ye pesá-dà ò kó taá é kpíí-ma kpíidɔkú hḭ́ǹka nìku wɛǹni kpɛ́mú, kà p'óò dáná, o data̰á̰di k'ó yá̰ńtá é dìsi hḭ́ǹka.

Mádíkì pú wɛdà o pɔ̀kàta mɛhɛká Sèsíì bíkáḿbíikú wɛmá, a mɛ̀ɛ pú kó dɛ́há bɛ̀m̀bɛ̀ni nìcɔ̰́nì kà Sèsíì cakú nìpa wɛmá kà mà dɛu. Àmá mìì héé-sa tíkáma, mɔkàpa kpekànamá nà nɔ̀nɔ̀hicí, ye kú wɛmà-dà sṵ́n ta mɛhɛká. Wɔ̀ni nìcɔ̰́ ò hɔ̰́ wekàna-á-ma yècḭ́ḭ̀ wɛnaamá pɔ̀kàhi tɔhí pú wɛɛ̀-sa kú hḭ́ǹka. Pà kodà o pɔ̀kàta wɛmá kà má n'yòǹ wɛyuùka kàkɔ̀ɔ̀-dà. Ǹtɛ-kà:

Mk 1.1-13 : Wɛmá cetádi nà Sèsíì tɔmú sɔ̀do dɔ̀hàma.

Mk 1.13 háá 8.26 : Sèsíì púkáàma o tɔmú Kàdìdéè tempáàku mɛhɛká. Ò kpekànà mɔkàpa, é pa̰á̰ pɔ́ńtápa̰á̰ma, ò bàtà o dapàm̀ma, é biɔhàna Weèdi wóòti hḭ́ǹka nà wɛbemú yohènamá.

Mk 8.27 háá 10.52 : Sèsíì n'ɔ̀ɔ dapàm̀ma yòǹ Sèdìsàdɛ́m̀ bɛ́ka.

Mk 11 háá 13 : Sèsíì tɔmú Sèdìsàdɛ́m̀ mɛhɛká.

Mk 14 háá 15 : Pà cɛ̰ɛ̰́ Sèsíì, é deèna nùdi è yɔ̀ p'óò kɔ̀ù, óò kpɛ̰́ḭ́ kpíidɔkú hḭ́ǹka.

Mk 16 : Sèsíì yá̰ńtáma kpíípa mɛhɛká.