Mádíkì 16

Sèsíì yá̰ńtáma

¹ Sùwífùpa damuhipàdi ka̰hà-ma, kà Màdí Màkìtàdáà yɔtí kóoó, nà Màdí Sàákì màa, nà Sàdòmɛ́ɛ̀ kà pá dontá tùdàdépa nɔ́kpekú kpɛ́ɛpá, è kó taá pà pa̰á̰ Sèsíì wɔ̰̀ǹku hḭ́ǹka. ² Yà̰di ká̰ńyɛ̰̀ǹfa pìdìpìdì, k'yè káà hɔ̰n-ní pee-e, kà pá yɔ́dá é taá ye híúdi pesá. ³ Pà de békú pa tɔɔ̀pa-dà è tonà: Wodà kó taá ti bídí ye tá̰a̰sàkù mɛ̀ǹkù hḭ̀ḭ-kù ye híúdì nùdì-ní? ⁴ Kà pá yoòda pa yuùka é wáńtá-ho ye pesá, é n'hɔ̰́tà ye tá̰a̰sàku bídí è dɔɔ́ bɛ́ɛ́kú. ⁵ Kà pá tɛ̀i é dúú ye híúdi mɛhɛká, é dɛ́há dapàǹn òcɔ̰́ǹ k'ò kàdi hiòma, è báá tókedɛudí pɛ́ídi, kà wantafɔ̰̀di é pà cɛ̰ɛ̰́. ⁶ K'yèe dapàǹn é pà caka è yɔ̀: Wantafɔ̰̀di dá nɛ cɛ̰ɛ̰́. N toò nɛ pɛnti Sèsíì Nàsàdɛ́tì kóoó-dè, pà kpɛ̰́ḭ́-ko kpíidɔkú hḭ́ǹke-è? Ò koò kɔ́ɔ́ miì, ò yá̰ńtà. Ǹtɛ-nà bɛ̀m̀bɛ̀ni pà de ò dɔɔ̀-di. ⁷ Taá é caka-nà o dapàm̀ma, nà pa kóoó Píyɛ́ɛ̀, è yɔ̀ ò nɛ nihí Kàdìdéè teǹka mɛhɛká. Mií-dà nɛ kó taá ò dɛ́há-ma é n'yònà ò de mà nɛ hḭ́mpú. ⁸ Kà pá cemá é yɛɛ̀ni ye híúdi mɛhɛká, é nàa nɔ̀ka mìì tee-sá pà de ceùdi-í-ma, kà wantafɔ̰̀di pà káá. Pà há̰ de pú nɛɛ̀ é mà caka òcɔ̰́ǹ mìì tee-sá pà de wani-í-ma.

Sèsíì bɛkáà o cɔ̰́ɔ̰̀di Màdí Màkìtàdáà yɔtí kóoó

[ ⁹ Sèsíì de yá̰ńtà-ma yà̰di ká̰ńyɛ̰̀ǹfa, é dɛnà é bɛka o cɔ̰́ɔ̰̀di Màdí Màkìtàdáà yɔtí kóoó-dà. O kú mɛhɛká-dà ò de bɔɔ̀haà-ma wɛɛ̀kupá pàyehì. ¹⁰ Ò de ò fodà-ma mɛma, k'ó taá é mà caka-á-ma mɛ̀m̀pà de nɔɔ̀-nà-pa Sèsíì, kà pà kàdi kà pa yàma cɔ̰háà, kà pà kɔǹ o kpɛ́mú. ¹¹ Pà mɛ̀ɛ de yeèkaà-ma kà Màdí yɔ̀, òò dɛ́hà-á-ma k'ò fòù, pà de p'óò fɛ̰à̰ há̰ḿbíifá.

Sèsíì fodà o dapàm̀ma

¹² Ye kú dàhàka, k'ò de é bɛka o cɔ̰́ɔ̰̀di o dapàm̀ma pàdɛ́ɛ́ è cèhèna wɔ̰̀ǹku, kà pà péé cɔ̀ku hḭ́ǹka è kɔ́dí yɛ̀ka hɔ̰́ɔ̰́hí. ¹³ Kà pà de é koní é tɛ̀ni é mà caka pa tɔɔ̀pa, pà mɛ̀ɛ té pú pà fɛ̰à̰ há̰ḿbíifá.

¹⁴ Dèǹdèma, k'ó bɛka o cɔ̰́ɔ̰̀di o dapàm̀ma píì-òcɔ̰́, kà pà kàdi è yon. K'ó pà kɛ̰̀ḭ-nà, nà pà de kpekanà-ma pa yàma. Pà de pú taà dandaní mɛ̀m̀pà de ò dɛ́hà-pa k'ò fòù de pà cakáà-sa kú hḭ́ǹka. ¹⁵ Ye kú dàhàka, k'ó pà caka è yɔ̀: Cèn-nà teǹka nà ka nùdi é caka n wɛnaamá nìpa wɛǹni. ¹⁶ Mɛ̀ǹǹ kó mà teha-kó é héé kà p'óò cóńtá, kó fḭ́tá-ma. Mɛ̀ǹǹ mɛ̀ɛ kó mà yeda-kó, Weèdi kó wáńtá óò kɔ̰́ɔ̰́-ma yetádi sídàma mɛhɛká. ¹⁷ Ǹtɛ mɛ̀m̀pà kó n taàa-pá pa dandaní kó m'pa̰kú-pa yḭḭ́pa: Nà n yèdi, pà kó bɔhà-á-ma wɛɛ̀kupá, é wɛdá wɛmá boocí cà̰ǹci. ¹⁸ Kà pà cɛ̰ɛ̰́ wàci yoo è nìì tekɔ̀ùpu, yè pú kó pà pa̰á̰ yècḭ́ḭ̀. Pà té kó cɔ̰ná-ma pa nɔ̀hi mɔkàpa hḭ́ǹka, kà pá dɛ́tá kpekàma.

Sèsíì hḭ́ǹka dìsimá

¹⁹ Teó Sèsíì pà wɛɛ̀-nà-ma mɛma é yɔ̀ɔ, kà Weèdi óò yíkàna óò dìkàna hḭ́ǹka, k'ó taá kaàdi ni hiòma. ²⁰ K'òo dapàm̀ma mɛmpa é ka̰há, é taá è cakú Weèdi wɛnaamá páàti wɛǹni, kà Teó pà tempú-nà ye tɔmú mɛhɛká è pa̰kú yḭḭ́pa, è bɛkú è yɔ̀ pà cakú-ma wɛmá yòǹ bemú-dà.]