Dúkì 22

Sùdásì ta̰kadà è kó yɛda Sèsíì.

Dentá Màtíyéè 26.1-5; Mádíkì 14.1-2; Ìsá̰à̰ 11.45-53

¹ Pɛ̰́ɛ̰̀pa mɛ̀m̀pà kɔ́ɔ́-pa yòmu yíkànasá kúúdi, pà toò-di Núǹtiyɛ̀ɛ̀ma kúúdi, dà de hɛ́ɛ́kú-ní. ² Kà dɔ̀hàka yam̀ma kpɛ̰́m̀ma nà Weèdi kpɛ̰́ńtìnùka biɔhànapá pɛnti pà kó hḭmpú é kɔ̀ù Sèsíì, è há̰ wani nìpa.

³ Mɛmá-dà, kà Wɛɛ̀kupá wódo é dúú Sùdásì pà tṵ́mà toò-ko Ìsìkàdìyɔ́tì mɛhɛká, k'ò de yòǹ ye Sèsíì dapàm̀ma píì-pàdɛ́ɛ́ p'oòcɔ̰́. ⁴ K'ó taá dɛ́há dɔ̀hàka yam̀ma kpɛ̰́m̀ma nà mɛ̀m̀pà ceí-pa Weèdi hɔ̰́ɔ̰̀ta yìkàǹyìkàpa, kà pá kɔ̰dà cɔ̀ku pà kó tṵṵ̀na-kú k'ó taàa Sèsíì pa nɔ̀hi mɛhɛká. ⁵ K'yé pà naaka sàma, kà pà yɔ̀ pà k'óò bodá dící. ⁶ K'ó teha, é cemá m'pɛnti pa̰á̰ma mɛ̀mà k'óò tempanà-ma k'ó taàa Sèsíì pa nɔ̀hi mɛhɛká kà nìku bá n'yá̰á̰.

Sèsíì yɔ̀ pá béná núǹtiyɛ̀ɛ̀ma kúúdi dipú.

Dentá Màtíyéè 26.17-25; Mádíkì 14.12-21; Ìsá̰à̰ 13.21-30

⁷ K'yèe pɛ̰́ɛ̰̀pa mɛ̀m̀pà kɔ́ɔ́-pa yòmu yíkànasá kúúdi daadí é tɛ̀i. Ye kú daadí-dà pà yònà è té kɔ̀ù-ma hɔ̰ɔ̰̀bíiká núǹtiyɛ̀ɛ̀ma kúúdi dipú kpɛ́mú. ⁸ Kà Sèsíì é tɔn Píyɛ́ɛ̀ nà Ìsá̰à̰ è yɔ̀: Tɔɔ̀ta-nà é taá ti béná núǹtiyɛ̀ɛ̀ma kúúdi dipú kà tí nì dii.

⁹ Kà p'óò béka è yɔ̀: Ya-dà a kpɛ̀i-má kà tí mù béná?

¹⁰ K'ó pà tɛ̰́ná è yɔ̀: N besí-nà sukú. Kà nɛ tɛ̀i è dúú yɔtí mɛhɛká, nɛ kó peèta-nà-á-ma dɔɔ̀o k'ò toó nɛ́ɛmá nà cɔ̀ta. Kà n'ɔɔ̀ dɛ́hà, kà n'ɔ́ɔ̀ tṵ̀na háá hɔ̰́ɔ̰̀ta ò kó dúú-ta kú mɛhɛká, ¹¹ é tɛ̀i é caka ye hɔ̰́ɔ̰̀ta yaǹn è yɔ̀: Nɛ dakpɛ̰́ǹn-dà nɛ tɔn-ní è yɔ̀ n'ɔ́ɔ̀ béka: Nàmɔ̀ni m̀mɔ́nni kú mɛhɛká-dà n kó dii-má núǹtiyɛ̀ɛ̀ma kúúdi dipú nà n dapàm̀ma? ¹² Ò kó nɛ bɛka-á-ma nàmɔ̀ǹsàdi kà nì péé hɔ̰́ɔ̰́dìdìkàta hḭ́ǹka nà nɛǹti yè békú-ti wɛǹni. Ye pesá-dà nɛ kó béná-ma ye dipú.

¹³ Kà pá ka̰há é tɛ̀i é dɛ́há ye wɛǹni é n'yònà ò de pà hḭ́mpú. Ye wɔ̀ni, kà pá béná ye núǹtiyɛ̀ɛ̀ma kúúdi dipú.

Sèsíì dii núǹtiyɛ̀ɛ̀ma kúúdi dipú n'ɔ̀ɔ tɔntɔndipá.

Dentá Màtíyéè 26.26-30; Mádíkì 14.22-26; Kɔ̀dɛ́ńtìpa pɔkàcecetá 11.23-25

¹⁴ Dimá wɔ̀ni tɛ̀i-má, Sèsíì n'ɔ̀ɔ tɔntɔndipá kà pá kaàdi è kó dii. ¹⁵ K'ó pà caka è yɔ̀: Nà n yàma wɛǹni-dà n dɔkáà-ma tí pɛ́ɛ̀ dii núǹtiyɛ̀ɛ̀ma kúúdi dipù mɛmù, ká n nɛɛ́ é dii náńkú. ¹⁶ N nɛ cakú-ma: N koò pú kó dii ye dimà mɛmà daadí yènì, háá é n'sà-nà mà cakú-sa kó pa̰á̰-ma Weèdi Wóòti mɛhɛká. ¹⁷ Ò wɛdà-ma mɛma è yɔ̀ɔ, k'ó tódá bondidí nà naàma, é sɛda Weèdi é nì pà kɔ̰́ɔ̰́ è yɔ̀: Ǹto-nà naamà mɛmà kà nɛ́ totá. ¹⁸ N nɛ cakú-ma, é cɛ̰ɛ̰́-nà wɔ̀nì mɛnì, n koò pú kó nìì dìfɛ̰́ɛ̰̀ háá é n'sà-nà Weèdi Wóòti kó tɛ̀ni-má-ní. ¹⁹ Ye kú dàhàka, k'ó tódá pɛ̰́ɛ̰̀, é sɛda Weèdi, óò wɛ́tá, óò pà kɔ̰́ɔ̰́ è yɔ̀: Miì yòǹ n wɔ̰̀ǹku-dà n kɔ̰́nì-ku nɛ kpɛ́mú, nɛ t'éè pa̰ná é deǹta n kpɛ́mú. ²⁰ Pà dii-má é yɔ̀ɔ, k'ó tódá bondidí nà dìfɛ̰́ɛ̰̀, é sɛda Weèdi, é mà pà kɔ̰́ɔ̰́ è yɔ̀: Naàbondidì mɛnì yòǹ múnápààma-dà Weèdi pa̰kú-ma nà n hḭ̀ma mɛ̀mà kó wudí-ma nɛ kpɛ́mú. ²¹ Nɛ há̰ n'yá̰á̰ è yɔ̀ mɛ̀ǹǹ kó n yɛda-kó péé-ma miì, kà ti pɛ́ɛ̀ è yon. ²² Niìfòùo bíitá kó kpíí-ma é n'yònà Weèdi mà hḭ́ńkáàma, há̰kà náńkú-dà kó m'péé-nà mɛ̀ǹǹ kó ta yɛda-kó. ²³ Kà pá cemá cetá è békú pa tɔɔ̀pa mɛ̀ǹǹ kó pa̰á̰-ko ye kú niyà̰ pa mɛhɛkà.

Sèsíì dapàm̀ma nɔhù kpɛ̰́ǹti hḭ́ǹka

²⁴ Ye kú dàhàka, kà pá yídá nɔ̀hɔ̀hicí è kpɛ̀i é yá̰dá pa cɔhɔ̀ka mɛ̀ǹǹ kó n'héé-ko kpɛ̰́ǹn. ²⁵ Kà Sèsíì é pà caka è yɔ̀: Boocí wóópa hɔ̰́ n'wódí pa nìku hḭ́ǹka nà kpeèti-dà, nà mɛma kà pà té n'kpɛ̀i pá pà n'yún è tonà pa̰á̰suumá yam̀ma. ²⁶ Yè pú yònà é n'yòǹ mɛma nɛ kú pesá. Múńdìkaà, mɛ̀ǹǹ yòǹ-ko kpɛ̰́ǹn nɛ mɛhɛkà yònà é n'yòǹ bíitá-dà, kà nɛ yìkàǹyìko é n'yòǹ nɛ deho. ²⁷ Ká n múńtá nɛ béka-do-ò, mɛ̀ǹǹ kàdi-kó è yon nà mɛ̀ǹǹ ò hḭ́nì-ko dimá, pa wodà wɛhi-n'ɔ̀ɔ tɔù? Mɛ̀ǹǹ kàdi-kó dɔ è yon? Mmí há̰ péé nɛ cɔhàka è yònà ye mɛ̀ǹǹ hḭ́nì-kò-dà dipú.

²⁸ Nɛ́na mɛ̀ɛkà, nɛ pa̰à̰-á̰-ma wɛ̰́ɛ̰́ma è baà n péé-nà nɛ pú n cocí n bɛḿma wɛǹni mɛhɛká. ²⁹ Mɛmá-dà tee, kà n nɛ cakú è tonà: N Báàa n kɔ̰́káàma wóòti, ma kú bookú-dà n mɛ̀ɛ té tì nɛ kɔ̰́nì-ma. ³⁰ Nɛ kó wáńtá pɛ́ɛ́ é n dii-nà-á-ma, é n yà̰à̰-nà n wóòti mɛhɛká, é tṵ́má kaàdi wóokàhi hḭ́ǹka é síi-nà Ìsìdàyɛ́dìpa nahàti píì-tìdɛ́ɛ́.

Sèsíì cakú è yɔ̀ Píyɛ́ɛ̀ kó nɔ̀hì è yɔ̀ ò p'óò yá̰á̰.

Dentá Màtíyéè 26.31-35; Mádíkì 14.27-31; Ìsá̰à̰ 13.36-38

³¹ Ye kú dàhàka, kà Teó yɔ̀: Sìmɔ́ɔ̀, Sìmɔ́ɔ̀, Wɛɛ̀kupá wódo cɔɔ̀haà-á-ma nùdi è kó nɛ bɛń é nɛ sákápa sukú k'yé n'yònà pà hɔ̰́ n'kó pɔkàda yoǹci é cì hḭmpú nà yoǹhṵ́ṵ̀ta. ³² Àmá, mmí cɔɔ̀haà-á-ma Weèdi a kpɛ́mú è yɔ̀ a dandaní dá fédí. K'à tóní tḭ́ń daadí n pesá, k'á yahikàna a kúcàpa wɔ̰̀ǹti.

³³ Kà Píyɛ́ɛ̀^a óò tɛ̰́ná è yɔ̀: N Teù, n sɔ̀do bii-í-ma kà n k'áa tṵṵ̀na kódedí mɛhɛká, bá kà kṵ́mú-dà kà tí mù kpíí.

³⁴ Kà Sèsíì yɔ̀: M'a cakú-ma Píyɛ́ɛ̀, kà kótadá é nɛɛ́ é kɔń yènì kpɛ́ɛ́dì, a kó nɔ̀hì-í-ma cɛ̰má màta̰a̰ è yɔ̀ a pú n yá̰á̰.

Sèsíì cakú o dapàm̀ma è yɔ̀ pa sɔ̀do é m'bii kà pá màa.

³⁵ Ye kú dàhàka, kà Sèsíì é béka è yɔ̀: N de nɛ tɔn-má kà nɛ pú toó dífa, nà pɛ̀kedí, nà nɛ̀ùti, nɛ de mɔ́ńkáà-á-ma yècɛ̰́ɛ̰̀-à̰? Kà p'óò tɛ̰́ná è yɔ̀: Óò, ti de pú mɔ́ńkáà yècɛ̰́ɛ̰̀.

³⁶ K'ó pà caka ye wɔ̀ni è yɔ̀: Wɔ̀nì mɛnì há̰kà, mɛma koò dɔ. Kà mɛ̀ǹǹ káá-ko dífa, k'ó fà tódá, kà mɛ̀ǹǹ káá-ko pɛ̀kedí, k'ó nì bádí. Kà mɛ̀ǹǹ mɛ̀ɛ kɔ́ɔ́-ko sepɛ̰ɛ̰̀dí, k'ó yɛda o tókesàdi é nì dontá. ³⁷ Pà wà̰tà-sa n hḭ́ǹka Weèdi pɔ̀kàta mɛhɛká yònà é pa̰ná-ma. Pà wà̰tà è yɔ̀: P'òò kàn-ń-ma niìsḭ̀m̀ma mɛhɛká. N nɛ cakú-ma, Weèdi wɛmá wɛɛ̀-sa n hḭ́ǹka yònà é pa̰á̰-ma. ³⁸ K'òo dapàm̀ma óò caka è yɔ̀: Ti Teù, ǹtɛ sepɛ̰ɛ̰̀ká kàdɛ́ɛ́. K'ó pà tɛ̰́ná è yɔ̀: Toò, tí héé-nà mɛnku.

Sèsíì cɔ̀hu Weèdi òdífùna ta̰à̰di hḭ́ǹka

Dentá Màtíyéè 26.36-46; Mádíkì 14.32-42

³⁹ Kà Sèsíì é yɛ̀ɛ̀ é ka̰há òdífùna ta̰à̰di hḭ́ǹka, k'òo dapàm̀ma óò tṵṵ̀na. O cɛ̀ma-dà de dɛɛ̀ k'ò mà hɔ̰n. ⁴⁰ Ò ta̰ntà tḭ́ń wɔ̀ni ye pesá, é pà caka è yɔ̀: Nɛ́ n'dɔń Weèdi k'yé teha kà bɛḿma dá nɛ nɛdá.

⁴¹ Ye wɔ̀ni, k'ó pà nátà-nà cɛ̰́ma k'yèe ta̰nta̰ǹni sá̰à̰-nà tá̰à̰di ká̰ńtáma, é tɛ̀i hìu teǹka, é dɔa Weèdi ⁴² è yɔ̀: N Báà, k'à kpɛ̀i k'á n yehèna ye náńkù mɛnkù. Há̰ka, a dá héé kà n kú dɔ́kàma é pa̰ná, àmá a kpɛ́ɛmá.

[ ⁴³ Ye wɔ̀ni, kà Weèdi tɔntɔndikó óò fodá-ní nà hḭ́ǹka, é cútá-ní é tɛ̀ni óò tɔ̀hɛ̀na kpeèti. ⁴⁴ Yaǹcɔ̰hàsàma mɛhɛká, k'ó dɔ̀hà è dɔń Weèdi dɛ́dɛ́í, k'òo wìku nuǹ teǹka è yònà hḭ̀ma.]

⁴⁵ Ò dɔáà-ma Weèdi é yɔ̀ɔ, é yídá é tón o dapàm̀ma bɛ́ka é tɛ̀i è hɔ̰́tà pà dɔɔ́ mìì tee-sá, pa yàma-dà de cɔ̰háà dɛ́dɛ́í. ⁴⁶ K'ó pà caka è yɔ̀: Nɛ dɔɔ́-ma? Yíí-nà é dɔa Weèdi k'yé teha kà bɛḿma dá nɛ nɛdá.

Sèsíì cɛ̰ɛ̰́ma

Dentá Màtíyéè 26.47-56; Mádíkì 14.43-50; Ìsá̰à̰ 18.3-11

⁴⁷ Sèsíì de káà wɛì-í-ma, kà niìdɔ́ɔ́di nìcɔ̰́nì é pà hɔ̰́tá-ní, kà Sùdásì nì nihí-ní. Ò de yòǹ o dapàm̀ma píì-pàdɛ́ɛ́ mɛhɛká, poòcɔ̰́-dà. K'ó tɛ̀ni Sèsíì pesá è kpɛ̀i óò bàsi^b-nà. ⁴⁸ Kà Sèsíì óò béka è yɔ̀: Sùdásì, n'ɛ̀ɛ kú pa̰á̰mà-dà a kpɛ̀i é yɛɛ-má Niìfòùo bíitá? ⁴⁹ Sèsíì nɔɔ́tɔɔ̀pa bantà-ma mìì kpɛ̀i é pa̰á̰-sa, kà p'óò béka è yɔ̀: Ti Teù, tí kɛ̰̀ḭ n'ɛ̀ɛ nìpà nà ti sepɛ̰ɛ̰̀ká? ⁵⁰ Kà p'oòcɔ̰́ cemá é potá dɔ̀hàka yam̀ma kpɛ̰́ǹn núndeho òcɔ̰́, é fiìta-ho o todí heudí. ⁵¹ Àmá, kà Sèsíì é pà caka è yɔ̀: Beé-nà mɛma, yè sà-á-ma! Ye wɔ̀ni, k'ó pḭ́ń ye dɔɔ̀o todí é nì kpekàna. ⁵² Ye kú dàhàka, k'ó béka mɛ̀m̀pà de tɛ̀ni-pá-ní o cɛ̰ɛ̰́pu, dɔ̀hɔ̀ka yam̀ma kpɛ̰́m̀ma, nà mɛ̀m̀pà ceé-pa Weèdi hɔ̰́ɔ̰̀ta kú kpɛ̰́m̀ma, nà yɔtí kpɛ̰́m̀ma è yɔ̀: N yòǹ túùdo-dà kà nɛ́ tɛ̀ni n cɛ̰ɛ̰́pu è toó-ní sepɛ̰ɛ̰̀ká nà dɔ̀ka? ⁵³ N hɔ̰́ nɛ m'péé-nà-á-dà daàka wɛǹni Weèdi hɔ̰́ɔ̰̀ta mɛhɛká, nɛ mɛ̀ɛ pú pɛháà è kó n cɛ̰dí. Àmá wɔ̀nì mɛnì há̰ yòǹ nɛ kpɛ́ɛdí-dà, nɛ́na nà Wɛɛ̀ko binìku wódo.

Píyɛ́ɛ̀ nɔ̀hì è yɔ̀ ò pú yá̰á̰ Sèsíì.

Dentá Màtíyéè 26.57-58, 69-75; Mádíkì 14.53-54, 66-72; Ìsá̰à̰ 18.12-18, 25-27

⁵⁴ Kà pá cɛ̰ɛ̰́ Sèsíì, óò tanà dɔ̀hàka yam̀ma kpɛ̰́ǹn hɔ̰́ɔ̰̀ta, kà Píyɛ́ɛ̀ pà tṵ̀n nà dɛùma. ⁵⁵ Kà pá cɔ́hìna ha̰mú ye hɔ̰́ɔ̰̀ta mùǹku cɔhɔ̀ka, è kàdi è ha̰dì. Kà Píyɛ́ɛ̀ é tɛ̀ni è kàdi pa cɔhɔ̀ka. ⁵⁶ Kà númpodeho òcɔ̰́ǹ óò dɛ́há k'ò kàdi ye ha̰mú fɔ̰̀di. K'ó ò seká sukú è yɔ̀: Ye dɔɔɔ̀ mɛnǹ mɛ̀ɛ té de ò nɔɔ̀-nà-á-ma. ⁵⁷ K'ó nɔ̀hì è yɔ̀: Pooò fɔ̰́ń, n baà p'óò yá̰á̰. ⁵⁸ K'yé tɔhɛ̀na-ní, kà dɔɔ̀o òcɔ̰́ǹ óò dɛ́há óò caka è yɔ̀: Fɔ̰́ń, a mɛ̀ɛ té yòǹ p'oòcɔ̰́-dà. K'óò tɛ̰́ná è yɔ̀: Fɔ́ú, n kɔ́ɔ́ pa mɛhɛká. ⁵⁹ K'yé tɔhɛ̀na-ní máàku màcɔ̰́ kpɛ́ɛmá, kà dɔɔ̀o òcɔ̰́ǹ tṵ́mà yɔ̀: Mɔ́masí-dà, dɔɔɔ̀ mɛnǹ de ò péé-nà-ma, ò yòǹ Kàdìdéè kóoó-dà. ⁶⁰ K'óò tɛ̰́ná è yɔ̀: Fɔ̰́ń, n pú yá̰á̰ a kpɛ̀i n'yɔ̀pu fá.

Ò káà wɛì mɛmá-dà ye wɔ̀ni ni cɔ̰́ɔ̰̀di mɛhɛká, kà kótadá é kɔń. ⁶¹ Kà Teó é fitá é wáńtá Píyɛ́ɛ̀. Ye wɔ̀ni, kà Píyɛ́ɛ̀ é deǹta-ní wɛmá ò cet'óò cakáà-ma è yɔ̀: Kà kótadá é nɛɛ́ é kɔń yenì, a kó nɔ̀hì cɔ̀ku màta̰a̰-dà è yɔ̀ a pú n yá̰á̰. ⁶² K'òo yàma é cɔ̰ha dɛ́dɛ́í, k'ó yɛ̀ɛ̀ tapaàdi é tɛ̀i é hódí sàma.

Pà tèe Sèsíì é tṵ́m'ɔ́ɔ̀ podí.

Dentá Màtíyéè 26.67-68; Mádíkì 14.65

⁶³ Nìpa mɛ̀m̀pà de ceé-pa Sèsíì d'oò dɛhikú-ma è tṵ́m'ɔ̀ɔ̀ podì. ⁶⁴ Pà de hɔ̰́ bowá pɛ́ńkú-dà o yìhìka, è t'óò potá óò béka è yɔ̀: Bantá mɛ̀ǹǹ a potà-ko! ⁶⁵ Pà de tṵ́m'ɔ̀ɔ̀ tèùnaà cɔ̀ka tɔɔ̀ka-dà dɛ́dɛ́í.

Pà tanà Sèsíì pa sídàma hɔ̰́ɔ̰sàta mɛhɛká.

Dentá Màtíyéè 26.59-66; Mádíkì 14.55-64; Ìsá̰à̰ 18.19-24

⁶⁶ K'yé weka, kà Sùwífùpa kpɛ̰́m̀ma, nà Weèdi dɔ̀hàka yam̀ma kpɛ̰́m̀ma, nà Weèdi kpɛ̰́ńtìnùka biɔhànapá é peèta. Kà pá kɔ̰́ɔ̰́ nùdi è yɔ̀ pá tɛɛ̀-ní Sèsíì pa sídàma hɔ̰́ɔ̰sàta mɛhɛká. ⁶⁷ K'ó tɛ̀ni k'à p'óò béka è yɔ̀: Kà fɔ̰́ń-dà héé Kídísì, k'á ti caka-ní. Kà Sèsíì é pà tɛ̰́ná è yɔ̀: Kà n nɛ cakáà é hḭ́n n ò yòǹ-ń-ma, nɛ pú cédí. ⁶⁸ Kà n mɛ̀ɛ nɛ békáà màcɔ̰́mà, nɛ pú kó n tɛ̰́ná. ⁶⁹ Àmá, é tódá sá̰mà, Niìfòùo bíitá kó taá é n'kaàdi Weèdi mɛ̀nì káá-di nɔɔ̀ti nɔ̀kàǹheùma-dà. ⁷⁰ Ye wɔ̀ni, pa wɛǹni kà p'óò béka è yɔ̀: Kà mɛmá-dà, a yòǹ Weèdi bíitá-dè-è? K'ó pà tɛ̰́ná è yɔ̀: Nɛ wɛdà mɔ́ma-dà, n tà yòǹ-ń-ma. ⁷¹ Mɛmá-dà, kà pá caka pa tɔɔ̀pa è yɔ̀: Yè koò pú ti békú pṵ́tápà, ti mɔ́-mɔ́mpá-dà mà yèkaà o nùdi mɛhɛká.