Ìsá̰à̰ i

Sèsíì wɛnaamá Ìsá̰à̰ wà̰haà-ma

Cetá kam̀má

Sèsíì tɔntɔndikó, Ìsá̰à̰-dà wà̰haà ye pɔ̀kàtà mɛntà-ní è péé Èfɛ́sì yɔtí. Ò mɛ̀ɛ de tà wà̰haà Sùwífùpa-dà Sèdìsàdɛ́m̀ yɔtí pɔ́dáma de wihìnà-pa kà pà yòǹ weèdɔɔ̀pa é taá è péé tɔɔ̀pa heèka mɛhɛká. Ò de bɔ̀hɔ̀ta tá ta̰ntá mɛ̀m̀pà pú yòǹ-pa-dà Sùwífùpa, è há̰ kɔ̰́ɔ̰̀ pa cɔ̰́ɔ̰̀di Kídísì. Ò pà wà̰haà è kpɛ̀i é yahikàna pa wɔ̰̀ǹti-dà, kà pá n'dań è yɔ̀ Sèsíì yòǹ Weèdi ta̰kadáko-dà Ìsìdàyɛ́dìpa ceí-ko. Ò yòǹ Weèdi bíitá-dà mɛ̀ǹtà pà tɛɛ̀-ta-ní fòùmu, è tṵ́mà yòǹ fòùku fḭ́hìnɔ. Ìsá̰à̰ wɛnaamá pɔ̀kàta mɛhɛká, ò wɛɛ̀-ɛ́-ma Sèsíì biɔhànamá n'ɔ̀ɔ fòùmu pa̰á̰ma màcɔ̰́ kà tɔɔ̀pa pú mà wɛdà, k'yé n'yònà: Potóóma Kánà yɔtí mɛhɛká, o peètamá nà Nìkòdɛ́m̀, o peètamá nà Sàmàdíì poòo, Bɛ̀tìsàtáà hɔ̀ùta kpekànamá, mɛ̀ǹǹ yɔ̀n-kó-ní n'ɔ̀ɔ pɛdáma dihìnamá.

Ìsá̰à̰ bɛkú è yɔ̀ Sèsíì yòǹ Weèdi wɛmá-dà mɛ̀mà kɔ́ɔ́-ma yɔ̀ɔmá. K'yèe wɛmá é hḭn nìdo é tɛ̀ni è péé-nà nìpa. Ò tṵ́mà bɛkú è yɔ̀ mɛnń-dà héé múnápààma dìfɛ̰́ɛ̰̀, è yòǹ dimá mɛ̀mà cútà-ma-ní nà hḭ́ǹka, è yòǹ fòùku wenkú, è yòǹ hɔ̰ɔ̰̀cɛ̰nto mɔ́nń, è yòǹ cɔ̀ku, è yòǹ há̰ńnùdi, è yòǹ pɛ́ɛsɔ̰pú mɔ́mmú, è yòǹ fòùmu mɛ̀mù bá yɔ̀ɔ-pú. Ò dɔ̀haà yɛ̰̀ḭ Sèsíì wɛmá n'ɔ̀ɔ pa̰á̰ma cakú-sa hḭ́ǹka-dà k'yè sɔ̀di. Ò pú wɛdà Sèsíì pɛdáma wɛmá, n'ɔ̀ɔ̀ cekáàma o tɔmú, àmá ò wekànà è yɔ̀ Sèsíì-dà yòǹ Weèdi wɛmá, k'yèe wɛmá mɛ̀ɛ de péé-nà Weèdi nà cetáma-ní. Mɛnń-dà Báàa tɔn-má-ní fòùku mɛhɛká. Mɛ̀m̀pà kú wɛnnì pɛnti-pá Weèdi, pà kó nɛɛ́ nì yá̰dá-ma n'ɔ̀ɔ kú nɔɔ̀ti. Ìsá̰à̰ wà̰haà o Wɛnaamá è kpɛ̀i nìpa-dà é taàa pa dandaní Sèsíì hḭ́ǹka k'yé teha kà pá dɛ́tá fòùmu.

Ǹtɛ o pɔ̀kàta wɛmá tṵn-tṵǹkaàma ma tɔɔ̀ma:

Ìs 1.1-18 : Wɛmá cetádi: Wɛmá mɛ̀mà bá yɔ̀ɔmá kpáńtà nìdo.

Ìs 1.19-4.54 : Bɛkàcecemá, pɔ́ńtáyḭḭ́pa cecepá, há̰kádàma cecemá, weèdɔɔ̀pa cecepá.

Ìs 5.1-12.50 : Sùwífùpa kpɛ̰́m̀ma síí-nà Sèsíì o cakàma màcɔ̰́ kú hḭ́ǹka.

Ìs 13-17 : Sèsíì bɛkáà o cɔ̰́ɔ̰̀di o tɔntɔndipá pa cɔ̰́ɔ̰̀di pesá nà biɔhànamá ò pà kɔ̰́ɔ̰̀-ma.

Ìs 18-20 : O Yɔ́kànamá háá n'ɔ̀ɔ kṵ́mú nɛdáma

Ìs 21.1-25 : Wɛmá kɔ̀ùdi: Sèsíì cɛ̰̀à̰ o nìku o tɔntɔndipá.