Tɔná i

Sèsíì Tɔntɔndipá Tɔná

Cetá Kam̀má

Pɔ̀kàtà mɛntà yòǹ Dúkì pɔkàdɛ́ɛ̀ta-dà ò wà̰haà-ta dɔɔ̀o pà toò-ko Tèòfídì. O cecetá mɛnta toó o yèdi-dà, è wɛì pà pɛkáàma Sèsíì, n'ɔ̀ɔ fòùmu tenkà mɛnkà kú hḭ́ǹka, n'ɔ̀ɔ kṵ́mú, n'ɔ̀ɔ̀ yá̰ńtà-ma kú bookú kpíípa mɛhɛká é dìsi hḭ́ǹka. Dɛ́ɛ̀tà mɛnta bɛkú tɔná o tɔntɔndipá pa̰à̰-na-dà. Ye kú kpɛ́mú-dà tee ti tà yún-má Sèsíì tɔntɔndipá tɔná pɔ̀kàta. Ta mɛhɛká, Dúkì cakú Weèdi Sèdi de cútà-ma-ní kú bookú-dà Sèsíì tɔntɔndipá hḭ́ǹka, nà pà de cèn-má kú bookú yɔtí dɔ́ɔ́di mɛhɛká è cakú o wɛnaamá kà Weèdi Sèdi pà tempú-nà. Ò tṵ́mà wɛɛ̀-ɛ́-ma ta mɛhɛká, dɔ̀hɔ̀ka yam̀ma de pà fá̰kápáà-ma kú bookú, nà náńkú pà de pà dià-ku háá kà pá yɔ̀ɔ ya-yahí páàti wɛǹni.

Ye kú wɔ̀ni-hɔ̰, Sùwífùpa de maàhu è toò Weèdi fḭ́hìnamá yòǹ pa cɔ̰́ɔ̰̀di kpɛ́ɛmá-dà. Dúkì há̰ bɛkú pɔ̀kàtà mɛntà kú mɛhɛká, è yɔ̀ ye kú yam̀màhàdì de pú yòǹ Weèdi kpɛ́ɛdí. Ò bɛkú miì, Weèdi de múńtà héè-ma-dà kà Sèsíì tɔntɔndipá é cèn páàti wɛǹni é caka o wɛnaamá. Pà de cedí mà caka Sèdìsàdɛ́m̀ mɛhɛká-dà, é yídá mà caka yɔtí tɔtí mɛ̀ǹtì de tɔ́-tɔ́sí-ti ye pesá, háá é taá-nà tɔboocí teǹka mɛhɛká.

Ti kó nɛɛ́ totá tɔná Sèsíì tɔntɔndipá pa̰à̰-na ye pɔ̀kàtà mɛhɛkà cɛ̰má màdɛ́ɛ́-dà: Cecemá-dà héé, tɔná pà pa̰à̰-na Sùwífùpa cɔhɔ̀ka. Dɛ́ɛ̀ma-dà héé, tɔná pà pa̰à̰-na boocí tɔcí cɔhɔ̀ka. Ye cɛ̰mà ma dɛ́ɛ̀dì mɛhɛkà, Sèsíì tɔntɔndipá, Píyɛ́ɛ̀ nà Pɔ́dì kú tɔná hḭ́ǹka-dà Dúkì wɛɛ̀-ma sàma. Píyɛ́ɛ̀ de cakáà Sèsíì wɛnaamá Sùwífùpa cɔhɔ̀ka-dà, kà Pɔ́dì mɛnn é mà caka mɛ̀m̀pà pú yòǹ-pa Sùwífùpa cɔhɔ̀ka.

Ǹtɛ ye pɔ̀kàtà wɛmà tṵ̀n-tṵ̀ǹkaàma ma tɔɔ̀ma:

Tn 1.1-12 : Sèsíì dadèǹdèèka fòùku mɛhɛká o yá̰ńtáma dàhàka.

Tn 1.13-26 : Pà ta̰kadà Màtíyásì k'ó hḭn Sèsíì tɔntɔndikó.

Tn 2.1-13 : Weèdi Sèdi cútáma-ní.

Tn 2.14 - 8.3 : Sèsíì tɔntɔndipá cakú o wɛnaamá Sèdìsàdɛ́m̀ mɛhɛká.

Tn 8.4 - 12.25 : Sèsíì wɛnaamá cakàma Sùdéè nà Sàmàdíì tempáàti mɛhɛká.

Tn 13.1 - 14.28 : Pɔ́dì cà̰ǹku cecekú k'ò kó taá é caka Sèsíì wɛnaamá.

Tn 15.1-35 : Tíkáma Sèdìsàdɛ́m̀ yɔtí mɛhɛká.

Tn 15.36 - 18.23 Pɔ́dì cà̰ǹku dɛ́ɛ̀kú k'ò kó taá é caka Sèsíì wɛnaamá.

Tn 18.24 - 21.16 : Pɔ́dì cà̰ǹku ta̰á̰ku k'ò kó taá é caka Sèsíì wɛnaamá.

Tn 21.17 - 23.22 : Pà cɛ̰ɛ̰́ Pɔ́dì Sèdìsàdɛ́m̀ mɛhɛká óò kpená.

Tn 23.23 - 26.32 : Pà tanà Pɔ́dì Sèsàdéè yɔtí.

Tn 27.1 - 28.31 : Pà tanà Pɔ́dì Hɔ̀dɔ́m̀ yɔtí.