Ìsá̰à̰ 12

Màdíì cóà tùdàdésa Sèsíì tàka hḭ́ǹka

Dentá Màtíyéè 26.6-13; Mádíkì 14.3-9

¹ Yè de kaá daàa kàkɔ̀ɔ̀-dà, kà Núǹtiyɛ̀ɛ̀ma kúúdi é nɛɛ́ dii. Kà Sèsíì é taá Bètàníì yɔtí, Dàsáà mɛ̀ǹǹ de kpíi-kó k'óò yá̰hìna de péé-ti kú mɛhɛká. ² K'ó tɛ̀i ye pesá kà p'óò béná ca̰ǹdipú, kà Màátì é mù n'ɔ̀ɔ̀ hḭ́ná, kà Dàsáà nà nìpa tɔɔ̀pa é pɛ́ɛ́ óò kàdi-nà kà pà yon. ³ Kà Màdíì é tódá tùdàdésa díikpecí kpɛ́ɛsá dítídì yàhakú, ye tùdàdésa kà p'èè pa̰à̰-nà tebíisá pà toò-sa nàádì, é cóá Sèsíì tàka hḭ́ǹka, é kà hṵtá n'ɔ̀ɔ yùti. K'yèe tùdàdésa nɔ́kú é ta̰ǹta ye hɔ̰́ɔ̰̀ta ta wɛǹni. ⁴ K'òo dapàǹn òcɔ̰́, kà p'òò toò Sùdásì Ìsìkàdíyɔ́tì, mɛ̀ǹǹ de k'óò yɛda-kó yɔ̀: ⁵ Baà pa̰à̰ kà pà pú tódà ye tùdàdésà-ní éè yɛda weǹtṵ́ṵká kɔ̀ɔnà ta̰a̰ dífa, é fà ti kɔ̰́ɔ̰́ kà tí fà totá pɛ́íhí? ⁶ Ò de wɛì mɛma, yè pú yòm̀pu kpɛ́mú pɛ́íhí wɛmá-dà d'oò yɛ̰̀ḭ, àmá ò de yòǹ túùdo-dà. Mɛnń-dà de púsí pa dící kɔ́ɔ̀ta, è yóu ye mɛhɛká pà tànì-ci. ⁷ Àmá kà Sèsíì óò caka è yɔ̀: Ò héé yɔkàma! Ò pa̰à̰ miya̰ n dánáma daadí kpɛ́mú-dà^a. ⁸ Pɛ́íhí baà kó nɛ m'péé-nà-á-dà, àmá mmí, n pú kó nɛ m'péé-nà wɔ̀ka wɛǹni.

Dɔ̀hɔ̀ka yam̀ma kpɛ̰́m̀ma ta̰kadà nùdi è mɛ̀ɛ té kó kɔ̀ù Dàsáà

⁹ Kà Sùwífùpa dɔ́ɔ́di é yekà è yɔ̀ Sèsíì tɛ̀ni Bètàníì, kà pá tadí è kpɛ̀i tɛ̀i óò dɛ́há é pɛ́ɛ́ dɛ́há-nà Dàsáà ò de yá̰hìnà-ko. ¹⁰ Mɛmá-dà, kà Dɔ̀hɔ̀ka yam̀ma kpɛ̰́m̀ma é ceḿ ta̰kadá nùdi è yɔ̀ pá pɛ́ɛ́ kɔ̀ù-nà Dàsáà, ¹¹ mìì tee-sá Sùwífùpa dɔ́ɔ́di de pà héù-ú-ma nà mɛnn kú nɔɔ̀ti, è kɔ̰́nì pa cɔ̰́ɔ̰̀di Sèsíì.

Sèsíì dúú Sèdìsàdɛ́m̀ mɛhɛká

Dentá Màtíyéè 21.1-11; Mádíkì 11.1-11; Dúkì 19.28-40

¹² K'yé weka, kà nìpa dɔ́ɔ́di mɛ̀m̀pà de tɛ̀ni-pá-ní Núǹtiyɛ̀ɛ̀ma kúúdi dipú é yekà è yɔ̀ Sèsíì pení Sèdìsàdɛ́m̀. ¹³ Kà pá bɔdi pṵ́ṵtí, é taá o codápu, é tɛ̀i è dedì kpeéma è tonà:

Weèdi yèdi é wɛhika!

Kónáma é m'péé-nà Ìsìdàyɛ́dì wódo

mɛ̀ǹǹ pení-ko-ní nà Bateó yèdi.

¹⁴ Kà Sèsíì é pɛha sa̰mmùm̀bíidí, é dìsi é kaàdi ni hḭ́ǹka é n'yònà pà de wa̰tà Weèdi wɛmá pɔ̀kàta mɛhɛká è yɔ̀pu. Pà de wa̰tà è yɔ̀:

¹⁵ Sìyɔ̰́ɔ̰̀^b kpɛ́ɛpá-nà, nɛ dá n'wani!

Ǹtɛ kà nɛ wódo pení,

è dáá-ní sa̰mmùm̀bíidí.

¹⁶ O dapàm̀ma de mum pú bantà ye kú wɔ̀ni ye kú pa̰á̰mà. Àmá, Weèdi yá̰hìnà tḭ́ń daadí Sèsíì óò wɛkàna, ye wɔ̀ni-dà pà dèǹtà-ma è yɔ̀ ye kú niyà̰ de wa̰à̰haà o kú kpɛ́mú-dà, kà nìpa mɛ̀ɛ pa̰ná mà de hḭ́mpú o kpɛ́mú.

¹⁷ Mɛ̀m̀pà kú wɛnnì de péé-nà-pa Sèsíì ò de yíí tḭ́ń daadí Dàsáà k'ó yá̰ńtá, é yɛɛ̀ni híúdi mɛhɛká, kà pà cakú pà de dɛ́hà-sa. ¹⁸ Ye kú kpɛ́mú-dà tee, kà nìku é tɛ̀ni o peètanàpu mìì tee-sá kù de yeèkaà è yɔ̀ ò de pa̰à̰ ye kú pɔ́ńtápa̰á̰mà-dà. ¹⁹ Kà Fàdísìpa é caka pa tɔɔ̀pa ye wɔ̀ni è yɔ̀: Nɛ dɛ́hà nkɛ́ɛ̀! Nɛ pú hɔ̰́tà ti hɛ̰káà-á-dà? Nìpa wɛǹni-d'òò tṵ̀n.

Kɛ̀dɛ́kìpa pɛnti Sèsíì

²⁰ Mɛ̀m̀pà de tɛ̀ni-pá-ní Sèdìsàdɛ́m̀, è kó duntà Weèdi kúúdi daadí, pa mɛhɛká kà Kɛ̀dɛ́kìpa^c péé. ²¹ Kà pá pàdi Fìdípù Bɛ̀tìsàyìdáà yɔtí kóoó, k'yèe yɔtí péé Kàdìdéè tempáàku mɛhɛká, é tɛ̀i óò caka è yɔ̀: Dakpɛ̰́ǹn, ti kpɛ̀i é dɛ́há Sèsíì-dà. ²² Kà Fìdípù é taá mà caka À̰ǹtìdéè, ye wɔ̀ni pa dɛ́ɛ̀di, kà pá taá mà caka Sèsíì. ²³ Kà Sèsíì é pà caka è yɔ̀: Niìfòùo bíitá wɛkànamá wɔ̀ni-dà tɛ̀ni sá̰mà. ²⁴ Wɛbemú-dà n nɛ cakú-ma. Kà pà pú bɔdí pɛ̰́ɛ̰̀yɔ̀di teǹka, kà ní yɛɛ̀ni, kà ni bíimá é kpíí, nì baà hɔ̰́ n'yòǹ nìcɔ̰́-dà. Àmá, kà pà nì bɔdí, kà nì yɛ̀ni, kà ni bíimá kpíi, nì hɔ̰́ pɛdá-ma bíimá sàma. ²⁵ Mɛ̀ǹǹ dɔ́sí-ko o fòùmu, ò kó mù féná-ma, àmá mɛ̀ǹǹ pú mù kɛ̀hi-kó yècḭ́ḭ̀ pemà mɛmà kú mɛhɛká, ò kó mù n'káá-ma fòùmu mɛ̀mù bá yɔ̀ɔpú mɛhɛká. ²⁶ Kà nìdo kpɛ̀i é deha n kpɛ́mú, k'ó n tṵṵ̀na, k'yé teha n péé-sa kà n deho éè m'péé. Kà nìi dehú n kpɛ́mú, n Báàa k'óò cùu-ú-ma.

Sèsíì wɛdà o kṵ́mú wɛmá

²⁷ Kà Sèsíì tṵ́mà yɔ̀: N yàma-dà cɔ̰háà sá̰mà-ní. N kó n'yɔ̀ ba? N Báà, n fḭ́hìna fá̰kápàmà n péé-mà kú mɛhɛkà wɔ̀nì mɛnì nkɛ́ɛ̀? Fɔ́ú! Ye kú kpɛ́mú-dà tee ká n tɛ̀ni teǹka. ²⁸ N kó n'yɔ̀: N Báà, wɛkàna a yèdi-dà. Kà pá yekà ye wɔ̀ni nà hḭ́ǹka-ní Weèdi boòku kà kù tonà: N nì yɔ̀ɔ wɛkànapú-dà, è mɛ̀ɛ kó tṵ́má nì wɛkàna.

²⁹ Nìpa mɛ̀m̀pà de péé-pa ye pesá é yekà ye boòku, kà pa pàcɔ̰́ yɔ̀: Tawóhàdi-dà kɔǹ. Kà tɔɔ̀pa yɔ̀: Weèdi Tɔntɔndikó-dà òò wɛɛ̀-nà.

³⁰ Kà Sèsíì é pà caka è yɔ̀: Yè pú yòǹ n kpɛ́mú-dà nɛ yeèkaà-ma ye bookù, àmá nɛ kpɛ́mú-dà. ³¹ Wɔ̀ni-dà sá̰mà, kà Weèdi kó sídá nìpa. Wɔ̀ni-dà sá̰mà, kà nì kó bɔhà pemà mɛmà kú wódo. ³² Mmí mɛ̀ɛkà, pà kó n yohòna tḭ́ń daadí teǹka hḭ́ǹka^d, n kó yɔ̰́ń-ma-ní nìpa wɛǹni n pesá. ³³ Ò de wɛì mɛma, è kpɛ̀i é pà bɛka kṵ́mú ò kó kpíí-mu kú bookú-dà. ³⁴ K'yèe nìpa óò tɛ̰́ná è yɔ̀: Pà ti cakáà ti kpɛ̰́ńtìnùka pɔ̀kàhi mɛhɛká è yɔ̀, Kídísì baà kó n'fòù-ú-ma k'yé n'kɔ́ɔ́ yɔ̀ɔmá. Baà há̰ tee kà fɔ̰́ń tonà: Yè békú pá dikàna Niìfòùo bíitá-dà kpíidɔkú hḭ́ǹka? Wodà héé ye kú Niìfòùo bíitá? ³⁵ Kà Sèsíì é pà tɛ̰́ná è yɔ̀: Wenkú káà péé nɛ cɔhɔ̀ka bɛ̀m̀bɛ̀ni cɛ̰́ma-dà. Cèn-nà wenkú káà nɛ péé-nà tḭ́ń wɔ̀ni, k'yé teha kà binìku dá nɛ sɛ́ńtá. Mɛ̀ǹǹ cèǹtì-ko binìku mɛhɛká pú yá̰á̰ ò yòǹ-kà bɛ́kà. ³⁶ Wenkú káà nɛ péé-nà-mà-ní, taàa-nà nɛ dandaní kú hḭ́ǹka k'yé teha kà nɛ́ hḭn wenkú bííhí.

Sèsíì wɛdà-ma mɛma é yɔ̀ɔ, é yídá ka̰há é pà nátá-nà, é taá sɔ̀di.

Sùwífùpa pú dań Sèsíì

³⁷ Bá nà Sèsíì de pa̰à̰-ma pɔ́ńtápa̰á̰ma dɔ́ɔ́di pa yìhìka, pà de pú dań o hḭ́ǹka. ³⁸ Mɛmá-dà, Weèdi wɛtɛ̰́náko Èsàyíì de wɛdà-ma wɛmá de pa̰à̰-ma. Ò de yɔ̀:

N Teù! Woò mɔ́ńn-dà teháà a wɛmá ti cakáà-ma?

Wodà a bahìnà-ma a kpeèti a bɛkáà-ti?

³⁹ Èsàyíì de tṵ́mà wɛɛ̀-ɛ́-ma mìì tee-sá kà pà pú kó nɛɛ́ é n'dań. Ò de yɔ̀:

⁴⁰ Weèdi-dà yɔ̀nà pa nɔ̀ǹci,

é kpekàna pa toòka,

k'yé teha kà pa nɔ̀ǹci dá dɛ́há,

kà pa yàma é héé kà pá bantá,

é fií-ní ni bɛ́ka,

kà ní pà kpekàna.

⁴¹ Èsàyíì de wɛɛ̀ mɛma, mìì tee-sá ò de dɛ́hà Sèsíì wɛhimú-dà, k'yé n'sànà kó wɛdá mɛma o hḭ́ǹka. ⁴² N'ɔ̀ɔ̀ baà de wɛkaàmà-ní, Sùwífùpa kpɛ̰́m̀ma mɛhɛká, sààpa de taà-á-ma pa dandaní Sèsíì hḭ́ǹka. Nà Fàdísìpa kú kpɛ́mú há̰kà, pà de pú mà wɛì pìì-ì, è wani pà kó pà bɔ̀hà-ma Weèdi wɛmá biɔhà-nàmɔ̀ni mɛhɛká. ⁴³ Pà de kpɛ̀i nìpa cóńtàma-dà, é ha̰tá-nà Weèdi kpɛ́ɛmá.

Sèsíì wɛmá-dà kó ti síi-nà

⁴⁴ Kà Sèsíì é wɛɛ́ kpeéma è yɔ̀: Mɛ̀ǹǹ n dań-ko, pú dań mmí kú cɔ̰́ɔ̰̀di hḭ́ǹka, àmá ò dań nà mɛ̀ǹǹ n tɔn-kó-dà-ní. ⁴⁵ Mɛ̀ǹǹ n dɛ́hà-ko, dɛ́hà-á-ma mɛ̀ǹǹ n tɔn-kó-ní. ⁴⁶ Mmí, n tɛ̀ni pemá mɛhɛká è yòǹ wenkú-dà, k'yé teha kà mɛ̀ǹǹ n dań-ko dá m'péé binìku mɛhɛká. ⁴⁷ Kà nìdo yeèkaà n wɛmá è pú tṵnà mà hḭ́mpú, mmí pú k'óò síi-nà, è yá̰á̰ n pú tɛ̀ni è kó sída nìpa, àmá n tɛ̀ni è kó pà fḭ́hìna-á-ma. ⁴⁸ Kà mɛ̀ǹǹ n yedáà-ko, è pú teháà n wɛmá, ye yaǹn dɛ́tà ye pesà mìì k'óò síi-nà-sa-dà. Wɛmá n cakáà-ma-dà, kó wáńtá óò síi-nà dadèǹdèni daadí, ⁴⁹ mìì tee-sá mà pú péé-nà-ní n pesá, àmá n Báàa mɛ̀ǹǹ n tɔn-kó-ní, mɛnń-dà n cakú n yònà é caka-sá nà n yònà é biɔhàna-sá. ⁵⁰ N mɛ̀ɛ yá̰á̰-ma è yɔ̀ o hɔ̰́ɔ̰wencí nùka kɔ̰́nì fòùmu mɛ̀mù bá yɔ̀ɔpú-dà. Ye kú kpɛ́mú-dà tee, n cakú-sà-ní, n yè cakú-ma é n'yònà n Báàa yè nà n cakáà-ma.