Tɔná 1

Sèsíì Tɔntɔndipá Tɔná

Sèsíì cakú o tɔntɔndipá è yɔ̀ ò kó pà kɔ̰́ɔ̰́-ní Weèdi Sèdi

¹ Dapàǹkpɛ̰́ǹ Tèòfídì, n pɔ̀kàta cecetá mɛhɛká, n wɛdà-á-ma Sèsíì pa̰à̰-sa n'ɔ̀ɔ̀ biɔhàna-sa wɛǹni n'ɔ̀ɔ̀ cetà-ma o tɔmú, ² háá daadí ò dìsi-dí hḭ́ǹka. K'ó nɛɛ́ dìsi hḭ́ǹka, ò de kɔ̰́ɔ̰̀ nà Weèdi Sèdi nɔɔ̀ti o kpɛ̰́ńtìnùka-dà, nìpa ò de batà-pa kà pà yòǹ o tɔntɔndipá. ³ Ò dii-má náńkú é kpíí, ye kú dàhàka é pà fodá cɔ̀kumá dɔ́ɔ́di é pà bɛka nà pa̰á̰ma dɔ́ɔ́di è yɔ̀ ò fòù-ú-ma. Daàka púnàhì, k'ò pà foní è pà wɛì-nà Weèdi wóòti wɛmá. ⁴ Daadí yènì, k'ó n'kaàdi è pà yon-nà, é pà kɔ̰́ɔ̰́ nùdi è yɔ̀: Nɛ dá nátá-nà Sèdìsàdɛ́m̀, àmá nɛ́ n'ceí Báàa hḭ́n ò kó nɛ kɔ̰́ɔ̰́-sa-ní, pa̰dí n nɛ cakáà-di kú wɛmá. ⁵ Ìsá̰à̰ cóńtà nìpa nà nɛ́ɛmá-dà, àmá nɛ́na, daàka cɛ̰́masí mɛhɛká, pà kó nɛ cóńtá nà Weèdi Sèdi-dà^a.

Sèsíì dìsi hḭ́ǹka

⁶ Ye wɔ̀ni, kà mɛ̀m̀pà de tísí-pa o pesá óò béka è yɔ̀: Ti Teù, ye kú wɔ̀ni-dà a kó tṵ́má é kaàna-má Ìsìdàyɛ́dì wóòti?

⁷ K'ó pà tɛ̰́ná è yɔ̀: Yè pú békú nɛ́ yá̰dá daadí yoo wɔ̀ni ye kú niyà̰ kó tɛ̀ni-dí-ní. N Báàa-dà yè hḭ́nà n'ɔ̀ɔ mɔ́nń kú nɔɔ̀ti. ⁸ Àmá Weèdi Sèdi kó cútá tḭ́ń daadí nɛ hḭ́ǹka, nì kó nɛ kɔ̰́ɔ̰́-ma kpeèti, kà nɛ́ n'yòǹ n pṵ́tápa Sèdìsàdɛ́m̀ mɛhɛká, nà Sùdéè tempáàku wɛǹni mɛhɛká, nà Sàmàdíì kpɛ́kú mɛhɛká, háá nà teǹka nà ka nùdi.

⁹ Ò wɛdà-ma mɛma é yɔ̀ɔ, kà p'óò n'wáń k'ò dìkìdì hḭ́ǹka, kà wɔ́ɔ̀di óò kṵncí pà koò p'óò dɛ́hà.

¹⁰ Kà pá n'káà nɛ̀hi òò wáń k'ò dìkìdì hḭ́ǹka, ye pesá n'ɛ̀ɛ pesá kà pá n'hɔ̰́tà nìi pàdɛ́ɛ́ nɛɛ̀hi è pà hɛ́dí-nà, è báá báapɛ́íti, ¹¹ é pà caka è yɔ̀: Kàdìdéè nìpa-nà, baà tee kà nɛ nɛɛ̀hi ye pesà è wáń hḭ́ǹka? Sèsíì mɛ̀ǹǹ yídà-kò nɛ cɔhɔ̀kà é dìsi hḭ́ǹka, ò kó ya̰dá tóní n'ɔɔ̀ dɛ́káàma kú bookù-dà k'ò dìkìdì hḭ́ǹka.

¹² K'òo tɔntɔndipá é yídá ta̰à̰di pà toò-di òdífùna ta̰à̰di, é tón Sèdìsàdɛ́m̀ yɔtí. Ye ta̰à̰di de pú tì dɛu-nà, ye ta̰nta̰ǹni de yòǹ kìdòmɛ́tídì òcɔ̰́ kú kpɛ́ɛmá-dà. ¹³ Pà ta̰ntà-ma Sèdìsàdɛ́m̀, é dìsi nàmɔ̀ni pà hɔ̰́ m'peèku-dí kú mɛhɛká, kà nì péé hɔ̰́dìdìkàta hḭ́ǹka. Ǹtɛ ye o dapàm̀ma mɛ̀m̀pà de yè péé-pa pa yèka: Píyɛ́ɛ̀ nà Ìsá̰à̰, nà Sàákì, nà À̰ǹtìdéè, nà Fìdípù, nà Tòmáà, nà Bàtèdèmíì, nà Màtíyéè, nà Sàákì Àdìféè bíitá, nà Sìmɔ́ɔ̀ mɛ̀ǹǹ yení-ko o yɔtí kpɛ́mú, nà Súdì Sàákì bíitá. ¹⁴ Nà nùdi nìcɔ̰́-dà, pa wɛǹni d'eè pèèku-ú-ma è dɔń Weèdi nà poòpa, nà Màdíì Sèsíì màa, n'ɔ̀ɔ kúcàpa.

Màtíyásì tà̰ǹtà Sùdásì fɛ̀ùdi

¹⁵ Ye kú Daàka mɛhɛká, kà weèdɔɔ̀pa é tíká è yɔ̀ɔ nìpa kɔ̀ta nà púdɛ́ɛ́ kpɛ́ɛmá. Kà Píyɛ́ɛ̀ é yídá pa cɔhɔ̀ka é pà caka è yɔ̀: ¹⁶ N kúcàpa-nà, yè de békú pà wà̰tà-sa Weèdi pɔ̀kàta mɛhɛká-dà é pa̰ná. Weèdi Sèdi de wɛdà-á-ma nà Dàfítì nùdi Sùdásì hḭ́ǹka, mɛ̀ǹǹ nihí-ko-ní mɛ̀m̀pà cɛ̰ɛ̰́-pa Sèsíì. ¹⁷ Sùdásì de yòǹ ti kóoó òcɔ̰́-dà. Ò de pɛ́ɛ̀ é ti deha-nà-á-ma tɔmú pà ti kɔ̰́ɔ̰̀-pu kú mɛhɛká. ¹⁸ Nà dící pà d'oò bodà-ci o sḭ̀ḭ̀ma kpɛ́mú, k'ó dontá yɛ̀di, é dɔdi ni mɛhɛká bìbìùdi (o yudí hḭ́ǹka), k'òo pɛutí é pḭ́há, k'òo nɔtí é ya-yahí ti wɛǹni. ¹⁹ Kà Sèdìsàdɛ́m̀ nìpa wɛǹni é mà yèkà, é yíí ye yɛ̀di nà pa bookú wɛmá mɛhɛká è yɔ̀ Àkɛ̀dìdàmáà, mìì kpɛ̀i é n'yɔ̀-sa hḭ̀ma yɛ̀di.

²⁰ Pà wà̰tà nɛ́ńyɛ̰̀ǹci pɔ̀kàta mɛhɛká è yɔ̀:

O hɔ̰́ɔ̰̀ta é hḭn dawoǹku

òcɔ̰́ǹ dá tà m'péé.

Pà tṵ́mà wà̰tà è yɔ̀:

Tɔɔ̀o òcɔ̰́ǹ é ta̰ǹta o fɛ̀ùdi.

^21-22 Yè békú tí baàta nìi-dà k'ó ti tuɛ̀ha-ní, é hḭn pṵ́táko ti Teó Sèsíì yá̰ńtáma hḭ́ǹka. Ye yaǹn yònà é yɛɛ̀ni mɛ̀m̀pà de ti nɔɔ̀nà-pa wɔ̀ka wɛǹni mɛhɛká-dà. Ò tṵ́mà yònà ò de ti n'nɔɔ̀nà-á-ma ti Teó Sèsíì de ti centì-nà tḭ́ń wɔ̀ni ti teǹka yɔtí mɛhɛká, é tódá wɔ̀ni Ìsá̰à̰ ò cóńtà-di, háá daadí ò yídà-di é dìsi hḭ́ǹka.

²³ Kà pá deèda nìi pàdɛ́ɛ́: Sòsɛ́fù pà yún-kó Bàsàbásì, kà tɔɔ̀pa ò toò Sùsìtísì, nà Màtíyásì. ²⁴ Ye kú dàhàka, kà pá pa̰á̰ weèdɔɔ̀pù mɛmù è yɔ̀: Ti Teù, fɔ̰́ń mɛ̀ǹǹ yá̰á̰-ko ti wɛǹni yàma, ti bɛka ye nìpà pa dɛ́ɛ́kà mɛhɛkà a batà-ko, ²⁵ k'ó fɛùwa Sùdásì fɛ̀ùdi, é púsí tɔmú a kɔ̰́ɔ̰̀-pu a tɔntɔndipá, kà Sùdásì é mù hédá é ka̰há o kú cɔ̀ku. ²⁶ Ye wɔ̀ni, kà pá ta̰á̰ tɛ́tɛ́, é baàta Màtíyásì, óò tùɛ̀ha ye tɔntɔndipá píì-òcɔ̰́.