Tɔná 14

Pɔ́dì nà Bànàbásì Ìkònìyɔ́m̀ yɔtí mɛhɛká.

¹ Ìkònìyɔ́m̀ yɔtí mɛhɛká, kà Pɔ́dì nà Bànàbásì mɛ̀ɛ té dúú Sùwífùpa Weèdi wɛmá biɔhà-nàmɔ̀ni mɛhɛká, é caka Weèdi wɛnaamá dɛ́dɛ́í háá kà Sùwífùpa nà mɛ̀m̀pà pú yòǹ-pa Sùwífùpa dɔ́ɔ́di é taàa dandaní Sèsíì hḭ́ǹka. ² Àmá kà Sùwífùpa mɛ̀m̀pà de pú taà-pa dandaní Sèsíì hḭ́ǹka, é fucí mɛ̀m̀pà pú yòǹ-pa Sùwífùpa è yɔ̀ pá pa̰á̰ kpákpààma mɛ̀m̀pà tàà-pa pa dandaní Sèsíì hḭ́ǹka. ³ Nà mɛma, Pɔ́dì nà Bànàbásì kà pá cá̰ńtá Ìkònìyɔ́m̀ yɔtí mɛhɛká é yóka dɛ́dɛ́í è cakú Teó wɛnaamá, kà pa bɔ̀ti pú dɔdì-nà yècɛ̰́ɛ̰̀, è dań Teó hḭ́ǹka. K'ó pà pa̰a̰ nɔɔ̀ti kà pà pa̰kú-nà pɔ́ńtápa̰á̰ma nà pɔ́ńtáyḭḭ́pa, mìì bɛkú-sa è yɔ̀ o pa̰á̰suumá wɛmá pà cakú-ma yòǹ wɛbeèdi-dà. ⁴ K'yèe yɔtí yam̀ma é totá é hḭn cɛ̰má màdɛ́ɛ́. Kà pàcɔ̰́ péé Sùwífùpa bɛ́ka, tɔɔ̀pa Sèsíì tɔntɔndipá bɛ́ka.

⁵ Sùwífùpa nà mɛ̀m̀pà pú yòǹ-pa Sùwífùpa, nà pa kpɛ̰́m̀ma, kà pá dɔ̀hà sɔ̀do è kó diá Pɔ́dì nà Bànàbásì náńkú, é pà ká̰mu tá̰à̰ka é pà kɔ̀ù. ⁶ Kà pá mà yèkà, é cocí é kòǹ Dísítì nà Dɛ̀ɛ́pù yɔtí bɛ́ka, nà yɔtí mɛ̀ǹtì de tì tɔ́-tɔ́sí-nà-ti. Ye yɔtì de péé Dìkàòníì tempáàku mɛhɛká-dà. ⁷ Kà pá tɛ̀i ye pesá, é cetá è cakú Sèsíì wɛnaamá.

Pɔ́dì nà Bànàbásì Dísítì yɔtí mɛhɛká

⁸ Dísítì yɔtí mɛhɛká, dɔɔ̀o òcɔ̰́ǹ-dà de péé è yòǹ hɔ̀ùta. Ò de mà yòǹ n'ɔ̀ɔ pɛdáma-dà, ò pú cèn daadí yènì. ⁹ Ò de besí Pɔ́dì wɛì-sa-dà. Kà Pɔ́dì óò n'wáń, é n'hɔ̰́tà ò káá-ma dandaní è kó nɛɛ́ kpeka. ¹⁰ Mɛmá-dà k'óò caka kpeéma è yɔ̀: Yídá é nɛɛ̀hi! K'yèe dɔɔ̀o é fékádá-ní é nɛɛ̀hi-hɔ̰, é cetá è cèǹtì. ¹¹ Nìku dɛ́hà-ma Pɔ́dì pa̰à̰-sa, kà kú wɛɛ́ nà Dìkàòníì bookú wɛmá è yɔ̀: Ti wàci-dà kpáńtà nìpa é cútá-ní ti cɔhɔ̀ka.

¹² Kà pá pa̰a̰ Bànàbásì yèdi è yɔ̀ Sèúsì, Pɔ́dì mɛnn Hɛ̀ɛ̀mɛ́sì mìì tee-sá, mɛnń-dà de hɔ̰́ n'wɛì. ¹³ Ye wàfa pà toò-fà Sèúsì, nàmɔ̀ni de péé yɔtí dúma-dà. Kà mɛ̀ǹǹ fà dɔ̀hu-kó é pɛha-ní naàdaàka, é kà sà̰na péna, é kà tɛɛ̀ní ye yɔtí há̰ńnùdi. Ò de kpɛ̀i nà nìku, pá pa̰á̰ dɔ̀hɔ̀ka-dà Bànàbásì nà Pɔ́dì kpɛ́mú. ¹⁴ Bànàbásì nà Pɔ́dì mà yèkaà-ma, é cɛ́di pa nɛǹti é n'yòǹ páḿpáń n'ɛ̀ɛ nìku cɔhàka-ho è kpákádí è toò: ¹⁵ Baà tee kà nɛ kpɛ̀i é pa̰á̰ miya̰? Ti mɛ̀ɛ té yòǹ nìpa-dà-ma è yònà nɛ yòm̀pù. Ǹtɛ wɛnaamá ti nɛ tɛɛ̀-ma-ní: Nɛ́ wɛ́í ye wàcì mɛ̀ǹcì pú kó nɛɛ́ é pa̰á̰-cì yècḭ́ḭ̀, é tṵṵ̀na Weèdi mɛ̀nì fòù-di. Mɛní-dà pa̰nà hḭ́ǹka, nà teǹka, nà dàmɛ́dì, é pɛ́ɛ́-nà mìì yè péé-sà wɛnnì. ¹⁶ Wɔ̀ǹci mɛ̀ǹcì ka̰hà-ci mɛhɛká, nì de héè-é-ma boocí wɛǹni kà cí tṵṵ̀na cɔ̀ci cì kpɛ̀i-cí. ¹⁷ Nà mɛma baàkaà, kà ní hédá kà nìpa é bantá nì yòm̀pu nà suumá nì pà pa̰kú-ma pesá. Mɛní-dà nɛ pɔ̰n-ní tafá nà hḭ́ǹka, kà nɛ té bɔdí nɛ dití é tì kɔ̰ṵ ti wɔ̀ni. Mɛní-dà nɛ pɔ̰n dimá, è nɛ sṵ́nì yaǹnaakú.

¹⁸ Bá nà pà de pà cakáà-ma mɛma, yè de pà bii-í-ma dɛ́dɛ́í kà pá nɛɛ́ é kpaná ye nìku kù kó pa̰á̰-ma dɔ̀hàdi pa kpɛ́mú. ¹⁹ Kà Sùwífùpa é yɛɛ̀ni-nà-ní À̰ǹtíyɔ́sì yɔtí, kà tì péé Pìsìdíì tempáàku mɛhɛká, nà Ìkòníyɔ́m̀ kpɛ́ɛtí, é tɛ̀ni é fucí ye nìku, kà kú ká̰mu Pɔ́dì tá̰à̰ka è k'óò kɔ̀ù, é yɔ̀ɔ óò fudí, óò dèna yɔtí bɛ́ɛ́kú, è màhu è toò ò kpíi-í-dà. ²⁰ Àmá, mɛ̀m̀pà de taà-pa pa dandaní Sèsíì hḭ́ǹka, kà pá tɛ̀ni óò yéńtá, k'ó yíí-ní é dúú yɔtí mɛhɛká. K'yé weka, nà Bànàbásì kà pá ka̰há Dɛ̀ɛ́pù yɔtí.

Pɔ́dì nà Bànàbásì tóní À̰ǹtíyɔ́sì yɔtí, Sìdíì tempáàku mɛhɛká

²¹ Kà Pɔ́dì nà Bànàbásì é caka Sèsíì wɛnaamá Dɛ̀ɛ́pù yɔtí mɛhɛká, kà nìpa dɔ́ɔ́di é hḭn Sèsíì dapàm̀ma. Ye kú dàhàka, kà pá fitá é tón Dìsítì nà Ìkòníyɔ́m̀ yɔtí, nà À̰ǹtíyɔ́sì kpɛ́ɛtí, kà tì péé Pìsìdíì tempáàku mɛhɛká. ²² Pà de yahikànì weèdɔɔ̀pa wɔ̰̀ǹti-dà, è pà teǹ è yɔ̀ pá n'kpenì dɛ́dɛ́í dandaní hḭ́ǹka, è pà cakú è tonà: Ti yònà é yɛ̀dì náńcí dɔ́ɔ́di mɛhɛká-dà, é nɛɛ́ dúú Weèdi wóòti mɛhɛká.

²³ Weèdɔɔ̀pa hùhùkàdi bá mɛ̀nì dɛ̀ɛ̀-di mɛhɛká, kà pá ta̰si kpɛ̰́m̀ma. Kà pá yídá é bowá nùdi é pa̰á̰ weèdɔɔ̀pu, é pà tàa Teó pà dań-ko nɔ̀hi mɛhɛká.

²⁴ Ye kú dàhàka, kà pá deèta Pìsìdíì tempáàku é ta̰ntá Pà̰ǹfìdíì kpɛ́kú. ²⁵ Kà pá tɛ̀i Pɛ́ɛ́sì yɔtí, é caka Weèdi wɛmá, é yɔ̀ɔ é sḭ́ńtá Àtàdíì kpɛ́ɛtí. ²⁶ Ye pesá, kà pá dìsi nɛ́ɛmá dawɛ́ɛ̀ku é tón À̰ǹtíyɔ́sì yɔtí mɛ̀ǹtì péé-ti Sìdíì tempáàku mɛhɛká. Ye pesá-dà pà de pa̰à̰-ma weèdɔɔ̀pu pa kpɛ́mú, é cɔhà Weèdi pa̰á̰suumá pa hḭ́ǹka, kà pá nɛɛ́ taá cetá-nà tɔmù pà pa̰à̰-pù-ní.

²⁷ Kà pá ta̰ntá-ní À̰ǹtíyɔ́sì yɔtí, é tɛ̀ni tíká weèdɔɔ̀pa é pà caka Weèdi pà tempáà-nà kà pá pa̰á̰-sa-ní wɛǹni, nà nì kpetà-ma kú bookú dandaní cɔ̀ku, mɛ̀m̀pà pú yòǹ-pa Sùwífùpa. ²⁸ Kà pá cá̰ńtá ye pesá é yóka dɛ́dɛ́í, n'ɛ̀ɛ yɔtí weèdɔɔ̀pa.