Tɔná 13

Weèdi Sèdi ta̰kadà Bànàbásì nà Sɔ́dì è yɔ̀ pá pa̰á̰ Weèdi tɔmú

¹ À̰ǹtíyɔ́sì weèdɔɔ̀pa mɛhɛká, Weèdi wɛtɛ̰́nápa nà Weèdi wɛmá biɔhànapá de péé-ma, ǹtɛ pa yèka: Bànàbásì, nà Sìmɛ̀ɔ́ɔ̀ pà tṵ́mà yún-kó Fɔ̀ùo, nà Dùsìyúsì Sìdɛ́nì yɔtí kóoó, nà Mànàɛ́nì mɛ̀ǹǹ de pɛ́ɛ̀ é bíúha-kó nà wódo Hèdótì, nà Sɔ́dì. ² Daadí yènì, kà pá m'boú nùdi è dɔń Weèdi, kà Weèdi Sèdi é pà caka è yɔ̀: N cená-nà Bànàbásì nà Sɔ́dì kà pá púsí tɔmú n pà yíí-pu kpɛ́mú. ³ Pà boò-ma nùdi é pa̰á̰ weèdɔɔ̀pu é yɔ̀ɔ, ye wɔ̀ni é cɔ̰ná pa nɔ̀hi pa hḭ́ǹka é cɔhà Weèdi pa kpɛ́mú, é pà hédá kà pá ka̰há.

Bànàbásì nà Sɔ́dì Sípúdì teǹka mɛhɛká

⁴ Weèdi Sèdi pà tɔn-má ni tɔmú pa̰á̰-pu, kà pá sḭ́ńtá Sèdèsíì yɔtí-dà, n'ɛ̀ɛ pesá kà pá dìsi nɛ́ɛmá dawɛ́ɛ̀ku é taá Sípúdì teǹka. ⁵ Kà pá ta̰ntá Sàdàmínì yɔtí, é tɛ̀i é cetá è cakú Weèdi wɛmá Sùwífùpa weèdɔɔ̀-nàmɔ̀ka mɛhɛká. Pà de nɔɔ̀nà Ìsá̰-Mádíkì-dà k'ò pà tempú-nà.

⁶ Ye Sípúdì teǹka de sɛ́sí nɛ́ɛmá cɔhɔ̀ka-dà, kà pá kà dèta ka wɛǹni háá é ta̰ntá Pàfósì tempáàku. Kà pá tɛ̀i ye pesá é dɛ́há dópòdópò yaǹn òcɔ̰́ǹ, kà p'òò toò Bàá-Sèsíì, k'ò yòǹ Sùwífù bookú, è báńtí nìpa è yɔ̀ ò yòǹ Weèdi wɛtɛ̰́náko-dà. ⁷ Ò de pɛ́ɛ̀ è péé-nà ye teǹka yìkàǹyìdo-dà, kà p'òò toò Sɛ̀sìúsì Pòdúsì, k'ò káá yuwɔ́ɔmá. K'yèe teǹka yìkàǹyìdo é yíí-ní Bànàbásì nà Pɔ́dì mìì tee-sá ò de kpɛ̀i é yekà Weèdi wɛmá-dà. ⁸ Àmá, k'yèe dópòdópò yaǹn, kà pà de tṵ́mà ò yún Èdìmásì nà kɛ̀dɛ́kìdi, é pà yee-nà. Ò de pú kpɛ̀i k'yèe teǹka yìkàǹyìdo é taàa o dandaní Weèdi wɛmá hḭ́ǹka. ⁹ Ye wɔ̀ni-dà Weèdi Sèdi sṵ́nà-ma Sɔ́dì, pà tṵ́mà toò-ko Pɔ́dì, k'ó cɔ̰ná o nɔ̀ǹci o hḭ́ǹka, ¹⁰ è yɔ̀: Fɔ̰́ń, a yòǹ Wɛɛ̀ko bíitá-dà. Báńbáńdàfa nà mɛkatohiká bodú bodú-dà sṵ́nà a mɛhɛká. A pú kpɛ̀i mìì kú wɛnnì yòǹ-sa suu-sá. A kó nɛhìna yaà wɔ̀nì-dà a kó m'buupú-ma Teó cɔ̀ci mɛ̀ǹcì cɔ́dí-ci? ¹¹ Besí sá̰kù. Teó k'áa potá-ma, k'á yɔ̀n. A kó yóka n'àa pú kó dɛ́há-ma wenkú.

Ye pesá n'ɛ̀ɛ pesá, k'yèe Èdìmásì nɔ̀ǹci yɔ̀ bìi-ì, k'yè ò yɔ̀ yḭ́ḭ̀pu. K'ó haapà páàti wɛǹni è pɛnti mɛ̀ǹǹ k'óò dɛ̀di-kó. ¹² Ye teǹka yìkàǹyìdo dɛ́hà-ma mìì de pa̰à̰-sa, k'ó taàa o dandaní Teó hḭ́ǹka, è yá̰á̰ biɔhànamá pà de ò kɔ̰́ɔ̰̀-ma o hḭ́ǹka de ò pḭ́ń sàma-dà.

Pɔ́dì nà Bànàbásì À̰ǹtìyɔ́sì mɛ̀ǹǹ péé-ko Pìsìdíì tempáàku mɛhɛká

¹³ Pɔ́dì n'ɔ̀ɔ nɔɔ́tɔɔ̀pa, kà pá dìsi nɛ́ɛmá dawɛ́ɛ̀ku, é yídá Pàfósì tempáàku, é taá Pɛ́ɛ́sì yɔtí kà tì péé Pà̰ǹfìdíì teǹka. Kà Ìsá̰-Mádíkì é pà hédá ye pesá, é tón Sèdìsàdɛ́m̀. ¹⁴ N'ɛ̀ɛ Pɛ́ɛ́sì yɔtí, kà pá sɔ̰kadá pa cɔ̀ku, é ta̰ntá À̰ǹtìyɔ́sì mɛ̀ǹǹ péé-ko Pìsìdíì tempáàku. Kà pá tɛ̀i, ye wɔ̀ni Sùwífùpa damuhipàdi daadí, kà pá dúú Weèdi wɛmá biɔhà-nàmɔ̀ni mɛhɛká, é kaàdi. ¹⁵ Kà pá kaàn wɛmá kpɛ̰́ńtìnùka pɔ̀kàhi nà Weèdi wɛtɛ̰́nápa kpɛ́hí mɛhɛká, ye wɔ̀ni kà ye Weèdi wɛmá biɔhà nàmɔ̀ni kpɛ̰́m̀ma é tɔn kà pá pà caka è yɔ̀: Ti kúcàpa-nà, kà nɛ káá-ma wɛmá è kó nakàna nìpa yàma, kà nɛ́ tódá wɛmá sá̰mà.

¹⁶ Kà Pɔ́dì é yídá, é pa̰á̰ yḭdó n'ɔ̀ɔ nɔ̀ku è yɔ̀ pá kpḭ́ḭ́, ye wɔ̀ni è yɔ̀: Ìsìdàyɛ́dì kpɛ́ɛpá-nà, nà nɛ́na mɛ̀m̀pà kú wɛnnì dɔń-pa Weèdi, besí-nà! ¹⁷ Tḭ́ńti Ìsìdàyɛ́dì nìku, ti Weèdi de ta̰kadà ti yààpa, é hédá kà ti bookú é wɛ́dá Èsípútì teǹka mɛhɛká-dà kù de wèe-sá. Ye kú dàhàka, kà ní kù dèna-ní o mɛhɛká nà ni kpeèti. ¹⁸ Kà ní pà púsí càwenkú mɛhɛká beeká púnàhì kpɛ́ɛmá. ¹⁹ É yídá, kà ní fíɔ́wá boocí cìyehì Kànàáà teǹka mɛhɛká, é tódá ci teǹka é kɔ̰́ɔ̰́ ni nìku, kà kú kà teeka, ²⁰ háá beeká kɔ̀ɔnà nàhì nà púnùm̀ kpɛ́ɛmá. Ye kú dàhàka, kà ní pà kɔ̰́ɔ̰́-ní sídàpa háá Weèdi wɛtɛ̰́náko Sàmùɛ́dì wɔ̀ni. ²¹ Ye kú dàhàka, kà pá béka wódo. Kà Weèdi é pà kɔ̰́ɔ̰́-ní Sàúdì, Kísì bíitá, k'ò yòǹ Bɛ̀ǹsàmɛ́ɛ̀ nahàku kóoó, k'ó wódí pa hḭ́ǹka beeká púnàhì. ²² Ka kú dàhàka, kà Weèdi óò wɛ́í, é pà kɔ̰́ɔ̰́ Dàfítì k'ò yòǹ pa wódo. Mɛnń kú hḭ́ǹka-dà, Weèdi de wɛdà-ma è yɔ̀: N dɛ́tà nìdo n yàma kpɛ̀i-kó-dà, Dàfítì, Sɛ̀ɛ̀séè bíitá. Ò kó pa̰á̰-ma n kpɛ̀i-sá wɛǹni. ²³ Ye kú Dàfítì yaàbíiká mɛhɛká-dà, Weèdi denà-ma-ní Sèsíì, k'ò yòǹ Ìsìdàyɛ́dìpa Fḭ́hìnɔ é n'yònà ò de hḭ́nà-ma nùdi. ²⁴ Kà Sèsíì é nɛɛ́ tɛ̀ni, Ìsá̰à̰-dà de dɛnà é caka Ìsìdàyɛ́dì nìku wɛǹni Weèdi wɛmá è yɔ̀ kú peǹta fòùmu, é héé kà pá kù cóńtá. ²⁵ Ìsá̰à̰ de yɔhɔ̀ta-ká daàka mɛhɛká o tɔná, ò de cakú è tonà: Nɛ maàhu è tonà n yòǹ wodà? N pú yòǹ nìdo nɛ ceí-ko. Ò pení-ma-ní n dàhàka, n mɛ̀ɛ pú sànà n fḭ́dá o tàka nɛ̀ùti.

²⁶ N kúcàpa nà n potɔ̰ɔ̰̀pa-nà, nɛ́na mɛ̀m̀pà yòǹ-pa Àbààhám̀ yaàbíiká, nà nɛ́na mɛ̀m̀pà dɔń-pa Weèdi, tḭ́ńti-dà Weèdi kɔ̰́ɔ̰̀-ma-ní fḭ́hìnamá wɛmá. ²⁷ Sèdìsàdɛ́m̀ nìpa nà pa wóópa pú bantà Sèsíì héé-ko, pà mɛ̀ɛ pú yeèkaà Weèdi wɛtɛ̰́nápa wɛmá pà de kaǹ-ma damuhipàka wɛǹni. Àmá, pà de denà nùdi-dà è yɔ̀ p'óò kɔ̀ù. Ma kú bookú-dà pà de pa̰à̰-ma ye wɛmá hḭ́mpú. ²⁸ Nà pà de pú dɛ́hà-sà pà kó pṵ́ṵ́-sa o hḭ́ǹka óò kɔ̀ù, kà pá cɔhà Pìdátì è yɔ̀ óò kɔ̀ù. ²⁹ Pà pa̰à̰-ma Weèdi wɛmá de wa̰tà-sa wɛǹni o hḭ́ǹka é yɔ̀ɔ, ye wɔ̀ni óò cúhìna-ní kpíidɔkú hḭ́ǹka, é taá óò tàa híúdi mɛhɛká. ³⁰ Àmá, kà Weèdi óò yá̰hìna kpíípa mɛhɛká. ³¹ Daàka dɔ́ɔ́di mɛhɛká, k'ó bɛka o cɔ̰́ɔ̰̀di mɛ̀m̀pà de ò bɛ́hìnà-pa-ní nà Kàdìdéè háá Sèdìsàdɛ́m̀, mɛmpá-dà mɛ̀ɛ cakú sá̰mà pà dɛ́hà-sa nà pa nɔ̀ǹci Ìsìdàyɛ́dì nìku cɔhɔ̀ka. ³² Tḭ́ńti mɛ̀ɛtékà, ye kú wɛnaamá-dà ti nɛ toó-ma-ní. Weèdi de hḭ́nà nùdi ti yààpa è yɔ̀ nì kó pa̰á̰-sa, ³³ nì yè pa̰à̰ tḭ́ńti pa yaàbíiká kpɛ́mú-dà, é yá̰hìna Sèsíì é n'yònà pà wà̰tà-ma Nɛ́yɛ̰̀ǹci pɔ̀kàta mɛhɛká nɛ́yɛ̰̀ǹdɛ́ɛ̀fa mɛhɛká è yɔ̀:

A yòǹ n bíitá-dà,

mmí-d'àà pɛdà yenì.

³⁴ Weèdi de wɛdà è yɔ̀ nì k'óò yá̰hìna-á-ma kpíípa mɛhɛká, k'òo wɔ̰̀ǹku dá tón híúdi mɛhɛká é pɛ̰̀ḭ. Nì de hḭ́mpú-dà è yɔ̀:

N kó nɛ kɔ̰́ɔ̰́ kónáma mɛ̀mà weni-má-dà è yòǹ mɔ́ma,

n de hḭ́nà nùdi è yɔ̀ n kó kɔ̰́ɔ̰́-ma Dàfítì.

³⁵ Mií-ì tee pà wà̰tà-ma páàku tɔkú è yɔ̀:

A pú kó hédá

a ta̰kadáko k'ó pɛ̰̀ḭ híúdi mɛhɛká.

³⁶ Dàfítì há̰ de pa̰à̰-á̰-ma Weèdi de kpɛ̀i-sá o kú wɔ̀ni-hɔ̰. Ye kú dàhàka, k'ó kpíí, kà p'óò dáná, k'ó hɔ̰́tá o báàpa, k'òo wɔ̰̀ǹku é pɛ̰̀ḭ. ³⁷ Weèdi há̰ yá̰hìnà-ko, mɛnn kú wɔ̰̀ǹku pú pɛ̰̀ḭ. ³⁸ N kúcàpa nà n potɔ̰ɔ̰̀pa-nà, nɛ́ n'yá̰á̰ è yɔ̀ nà mɛnń kú yèdi-dà pà nɛ cakú-ma sḭ̀ḭ̀ma deèdamá wɛmá. ³⁹ Mɛ̀ǹǹ kú wɛnnì kó taàa-kó o dandaní o hḭ́ǹka, ò k'óò fḭ́hìna-á-ma sḭ̀ḭ̀ma wɛǹni mɛhɛká, Mɔ̀yísì kpɛ̰́ńtìnùka de pú kó nɛɛ́ óò fḭ́hìna-má. ⁴⁰ Ye kú kpɛ́mú, nɛ́ pa̰á̰ yɔkàma kà Weèdi wɛtɛ̰́nápa de wɛdà-sa pa pɔ̀kàhi mɛhɛká dá nɛ tɛ̀ni. Pà de yɔ̀:

⁴¹ Wáńtá-nà, nɛ́na yɔ̰́sàma sṵ́n-pá kú mɛhɛká,

yé nɛ dii, kà nɛ́ sèǹ,

è yá̰á̰ n kó pa̰á̰ dehèmu mùcɔ̰́mù-dà kà nɛ káà fòù,

dehèmu nɛ pú kó teha-mú kú wɛmá

bá kà nìi mà nɛ cakáà.

⁴² Pɔ́dì nà Bànàbásì yɛ̀ni tḭ́ń wɔ̀ni ye Weèdi wɛmá biɔhà-nàmɔ̀ni mɛhɛká, kà pá pà cɔ̀hà è yɔ̀ pá tóní damuhipàdi mɛ̀nì pení-di-ní, é pà wɛɛ́-nà ye wɛnɔ̀dì ni cɔ̰́ɔ̰̀di hḭ́ǹka. ⁴³ Pà wìhìta-má, kà Sùwífùpa dɔ́ɔ́di nà mɛ̀m̀pà de pú yòǹ-pa Sùwífùpa è há̰ tṵ̀n pa weèdɔɔ̀pu, é tṵṵ̀na Pɔ́dì nà Bànàbásì kà pà pà wɛì-nà, è yahikànì pa wɔ̰̀ǹti è yɔ̀ pá dɔ̀hà é daàdi-nà pa̰á̰suumá Weèdi pà pa̰à̰-ma.

⁴⁴ Ye damuhipàdi mɛ̀nì de pení-di-ní tɛ̀ni-má-ní, k'yèe yɔtí nìpa pa sàpa é tíká è kó besí Weèdi wɛmá. ⁴⁵ Sùwífùpa dɛ́hà-ma kà nìku dɔ́ɔ́di tíkà, kà yantimú é yeda, kà pá cetá è nɔ̀hù Pɔ́dì de cakú-sa, òò tèù. ⁴⁶ Kà Pɔ́dì nà Bànàbásì é pà caka pópóí è yɔ̀: Nɛ́na Sùwífùpa-dà ti de yònà é cedí caka-má Weèdi wɛmá. Nɛ há̰ mà yeéè-mà, nɛ bɛkáà ye pesà è yɔ̀ nɛ pú sànà é dɛ́tá fòùmu mɛ̀mù bá yɔ̀ɔpú-dà. Ye kú kpɛ́mú-dà tee, kà tí fidí sá̰mà mɛ̀m̀pà pú yòǹ-pa Sùwífùpa bɛ́ka, ⁴⁷ è yá̰á̰ Bateó ti hḭ́nà nùdi o dehèmu hḭ́ǹka è yɔ̀:

M'a ta̰kadà è yɔ̀ á n'yòǹ

wenkú-dà boocí tɔcí mɛhɛká.

Á cèn teǹka nà ka nùdi

é caka nìpa è yɔ̀

Weèdi-dà fḭ́hìnì.

⁴⁸ Mɛ̀m̀pà pú yòǹ-pa Sùwífùpa de yeèkaà-ma mɛma, k'yé pà naaka sàma, kà pá sɛɛ́ Weèdi nà ni wɛmá. Mɛ̀m̀pà kú wɛnnì de yòǹ-pa fòùmu mɛ̀mù bá yɔ̀ɔpú kpɛ́ɛpá, kà pá taàa pa dandaní Sèsíì hḭ́ǹka.

⁴⁹ Kà Teó wɛmá é pidá ye teǹka wɛǹni mɛhɛká. ⁵⁰ Àmá, kà Sùwífùpa é fucí poòpa mɛ̀m̀pà de dɔń-pa Weèdi è yòǹ niìsàpa, nà yɔtí kpɛ̰́m̀ma, kà pá yíkàna fá̰kápàma Pɔ́dì nà Bànàbásì hḭ́ǹka, é pà dèna pa teǹka. ⁵¹ Kà pá n'yɛtì ye teǹka é kpá̰-kpá̰dá pa tàka tá̰mú, é ka̰há Ìkòníyɔ́m̀ yɔtí. ⁵² K'yèe À̰ǹtìyɔ́sì yɔtí weèdɔɔ̀pa mɛmpa, kà yaǹnaakú pà sṵ́nà nà Weèdi Sèdi.