Tɔná 23

¹ Kà Pɔ́dì é n'wáń ye sídàsàpu yam̀ma è yɔ̀: N kúcàpa-nà, nà n yàma wɛǹni-dà n deháà-ma Weèdi kpɛ́mú háá nà yenì. Yècḭ́ḭ̀ mɛ̀ɛ pú kɔkapú n yàma n cèmu mɛhɛká nà Weèdi.

² Kà dɔ̀hàdi kpɛ̰́ǹn, Ànàníyásì é kɔ̰́ɔ̰́ nùdi mɛ̀m̀pà de ò hɛ́dí-nà-pa è yɔ̀ pá potá o nùdi. ³ Kà Pɔ́dì óò caka è yɔ̀: Weèdi kó wáńtá áa potá-ma, yam̀pèǹtayà fɔ̰́ń! A kaàdi ye pesà, è kó n síi-nà kpɛ̰́ńtìnùka hḭ́mpú-dà, há̰ ǹtɛ k'à kà yetà-nà, é kɔ̰́ɔ̰́ nùdi è yɔ̀ pá n potá! ⁴ Mɛ̀m̀pà de ò hɛ́dí-nà-pa, kà p'óò caka è yɔ̀: A teù Weèdi dɔ̀hàdi kpɛ̰́ǹn-dà? ⁵ K'ó pà tɛ̰́ná è yɔ̀: N kúcàpa-nà, n de pú yá̰á̰ è yɔ̀ dɔ̀hàdi kpɛ̰́ǹn-dà, è yá̰á̰ pà wà̰tà Weèdi pɔ̀kàta mɛhɛká è yɔ̀: A pú yònà é wɛɛ́ kpákpààma a bookú kpɛ̰́ǹn hḭ́ǹka.

⁶ Pɔ́dì de yá̰á̰-ma è yɔ̀ ye sídàsàpu yam̀ma pàcɔ̰́ yòǹ Sàdúkìpa-dà, kà tɔɔ̀pa yòǹ Fàdísìpa. Ye kú kpɛ́mú-dà tee, k'ò de é wɛɛ́ kpeéma pa yìhìka è yɔ̀: N kúcàpa-nà, n yòǹ Fàdísì-dà, kà n báàa yòǹ Fàdísì. N dań-ma kpɛ́mú-dà è yɔ̀ kpíípa kó wáńtá yá̰ńtá kà pà n síí-nà.

⁷ Ò wɛɛ̀-ma mɛma, kà Sàdúkìpa nà Fàdísìpa é cetá nɔ̀nɔ̀hicí, k'yèe sídàsàpu nìku é totá é hḭn cɛ̰má màdɛ́ɛ́. ⁸ Sàdúkìpa mɛmpa de cakú è yɔ̀ kpíípa pú kó wáńtá yá̰ńtá, mɛ̀ɛkà sèka nà Weèdi tɔntɔndipá kɔ́ɔ́. Kà Fàdísìpa mɛmpa dań è yɔ̀ ye kú niì wɛǹni péé-ma. ⁹ Kà hoodí sàdi é tódá pa cɔhàka. Kà kpɛ̰́ńtìnùka biɔhànapá pàcɔ̰́, kà pà yòǹ Fàdísìpa cɔ̀ku kpɛ́ɛpá, é yídá wɛɛ́ kpeéma è yɔ̀: Tḭ́ńti pú dɛ́hà kpákpààma màcɔ̰́mà ye dɔɔɔ̀ mɛnǹ hḭ́ǹka. K'yè púdí sèdi yoo Weèdi tɔntɔndikó-dà ò wɛɛ̀-nà!

¹⁰ K'yèe nɔ̀nɔ̀hicí é dɔ̀hà é kpeka dɛ́dɛ́í, háá k'yèe kɔ̰̀màǹdáǹn é yó wampa pà dá yetá é cɛ̰-cɛ̰tá-ma Pɔ́dì. K'ó kɔ̰́ɔ̰́ nùdi o sósìpa è yɔ̀ pá cútá óò dèda pa cɔhàka, óò tɛ̰́ná sósìpa hɔ̰́ɔ̰̀ta mɛhɛká.

¹¹ Ye daadí yèǹka, kà Teó é bɛka o cɔ̰́ɔ̰̀di Pɔ́dì óò caka è yɔ̀: A wɔ̰̀ǹti dá yá̰a̰ka! A cakáàma kú bookú miì n wɛmá Sèdìsàdɛ́m̀ mɛhɛká, a yònà è mɛ̀ɛ té mà caka-má kó bookú-dà Hɔ̀dɔ́m̀ yɔtí mɛhɛká.

Sùwífùpa múnà nùdi è kó kɔ̀ù Pɔ́dì

¹² K'yé weka ká̰ńyɛ̰̀ǹfa, kà Sùwífùpa pàcɔ̰́ é múná nùdi, é wɛ̰́ha è yɔ̀, pà pú kó dii pà mɛ̀ɛ pú kó yà̰à̰ yècḭ́ḭ̀, kà pà pú kɔù Pɔ́dì. ¹³ Mɛ̀m̀pà de múnà-pa nùdi é pa̰á̰ ye kú wɛ̰́hɛ̀dì de ha̰tà-á-ma púnàhì. ¹⁴ Kà pá taá é peèta-nà dɔ̀hàka yam̀ma kpɛ̰́m̀ma, nà Sùwífùpa kpɛ̰́m̀ma é pà caka è yɔ̀: Ti wɛ̰́háà-á-ma Weèdi yìhìka, è yɔ̀ ti pú kó dii yècḭ́ḭ̀ kà ti pú kɔù Pɔ́dì. ¹⁵ Wɔ̀ǹ mɛnì, nɛ́ kɔ̰dà-nà sídàsàpu yam̀ma, kà nɛ́ taá é cɔhà Hɔ̀dɔ́m̀ sósìpa kɔ̰̀màǹdáǹn, è yɔ̀ ó tɛɛ̀ní Pɔ́dì nɛ yìhìka. N'ɔ́ɔ̀ cɔ̀hà, k'yé n'yònà nɛ kó dɔ̀hà é cɔ́ɔ́-ma sukú o wɛmá. Tḭ́ńti, ti sɔ̀do kó m'bií-ma, kà t'óò kɔ̀ù k'ò mun pú ta̰ntà-ní miì.

¹⁶ Àmá, kà Pɔ́dì potɔ̰ɔ̰̀-bíitá é yekà ye wɛmá, é taá ye sósìpa hɔ̰́ɔ̰̀ta mɛhɛká, é tɛ̀i dúú é mà caka Pɔ́dì. ¹⁷ Kà Pɔ́dì é yíí sósìpa kɔ̀ta kpɛ̰́ǹn òcɔ̰́ǹ, óò caka è yɔ̀: Tanà dapàm̀bíítà mɛntà kɔ̰̀màǹdáǹn pesá, tà káá màcɔ̰́mà-dà è k'óò caka.

¹⁸ K'yèe sósìpa kpɛ̰́ǹn é tà tanà kɔ̰̀màǹdáǹn pesá, é tɛ̀i óò caka è yɔ̀: Kpenáku Pɔ́dì-dà n yíí é n cɔhà è yɔ̀ m'áa tɛɛ̀ní dapàm̀bíítà mɛntà, tà káá màcɔ̰́mà-dà è k'áa caka. ¹⁹ K'yèe kɔ̰̀màǹdáǹn é cɛ̰ɛ̰́ ye dapàm̀bíitá nɔ̀ku, é tà dɛ̀di kà pá taá bɛ́ɛ́kú pa cɔ̰́ɔ̰̀di pesá. K'ó tɛ̀i é tà béka è yɔ̀: A káá m̀mɔ́ma-dà è kó n caka? ²⁰ Kà t'óò tɛ̰́ná è yɔ̀: Sùwífùpa-dà kɔ̰̀daà, è k'áa cɔhà, k'á tɛɛ̀ní Pɔ́dì kṵ́ńweǹni sídàsàpu hɔ̰́ɔ̰̀ta. Pà yɔ̀ pà k'áa caka è yɔ̀ pà kó dɔ̀hà é cɔ́dí o wɛmá-dà sukú. ²¹ A dá teha pà k'áa cɔhà-sa, è yá̰á̰ pa mɛhɛká, nìpa ha̰tà púnàhì è kpɛ̀i é wòci cɔ̀ku, óò kɔ̀ù. Pà wɛ̰́háà-á-ma Weèdi yìhìka, è yɔ̀ pà pú kó dii yècḭ́ḭ̀ pà mɛ̀ɛ pú kó yà̰à̰ yècḭ́ḭ̀, kà pà pú kɔù Pɔ́dì. Pa sɔ̀do bií-ma wɔ̀nì, pà ceí a tehàma-dà sá̰à̰di. ²² K'yèe kɔ̰̀màǹdáǹn é caka ye dapàm̀bíitá, è yɔ̀ tà dá yetá caka òcɔ̰́ǹ ye wɛmà t'òò cakáà-mà. Ye wɔ̀ni, k'ó tà hédá kà tá kòǹ.

Pà tanà Pɔ́dì tempáàku yìkàǹyìko Fèdísì pesá

²³ K'yèe kɔ̰̀màǹdáǹn é ceḿ yíí o sósìpa kɔ̀ta kpɛ̰́m̀ma pàdɛ́ɛ́, é pà caka è yɔ̀: Tíká-nà Sósìpa kɔ̀ɔnà dɛ́ɛ́, nà sa̰ndáápa púyehì, nà kpa̰à̰ka yam̀ma kɔ̀ɔnà dɛ́ɛ́. Pa wɛǹni sɔ̀do é m'bii, kà pá ka̰há Sèsàdéè yɔtí yohokú máàku màwɔ́ì. ²⁴ Nɛ́ mɛ̀ɛ té dɔ̀hà sa̰nhí, é tódá Pɔ́dì óò ta̰hìna tempáàku yìkàǹyìko Fèdísì pesá, nà naakú.

²⁵ K'ó yídá é wa̰hà pɔ̀kàta è yɔ̀:

²⁶ Mmí Kódótì Dìsìyásì, n dɔń dapàǹkpɛ̰́ǹn, tempáàku yìkàǹyìko Fèdísì. ²⁷ Sùwífùpa-dà cɛ̰ɛ̰́ dɔɔɔ̀ m'a naǹci-kò-hɔ̰ mɛnǹ, è kpɛ̀i óò kɔ̀ù. N yeèkaà-ma è yɔ̀ ò yòǹ Hɔ̀dɔ́m̀ kóoó-dà, ká n taá nà n sósìpa óò fèda. ²⁸ Kà n ní n'kpɛ̀i é yá̰dá p'òò pṵ́ṵ́nì-sa kú hḭ́ǹka, óò tanà pa sídàsàpu yam̀ma yìhìka. ²⁹ Ká n dɛ́há é n'hɔ̰́tà, p'òò nɔ̀hù-nà pa kpɛ̰́ńtìnùka hḭ́ǹka-dà, ò pú pa̰à̰ yetádi nìcɔ̰́nì kà nì sànà p'óò kɔ̀ù yoo óò kpená. ³⁰ Pà há̰ n cakáà è yɔ̀ Sùwífùpa-dà múnà nùdi è kpɛ̀i óò kɔ̀ù. Ye kú kpɛ́mú-dà tee, ká n ò nà nàǹci-ho fen-fem̀ma. N cakáà mɛ̀m̀p'òò pṵ́ṵ́nì-pa, è yɔ̀ pá taá óò yíí a pesá-dà sídàpu.

³¹ K'yèe sósìpa é pa̰á̰ ò de pà kɔ̰́ɔ̰̀ nùdi è yɔ̀ pá pa̰á̰-sa. Kà pá tódá Pɔ́dì, óò ka̰há-nà yèǹka yɔtí pà yún-tí À̰ǹtìpàtísì. ³² K'yé weka, kà sósìpa mɛ̀m̀pà de centì-pa tàka é tón é kòǹ pa hɔ̰́ɔ̰̀ta, kà mɛ̀m̀pà dáá-pa sa̰nhí é sɔ̰kadá-nà Pɔ́dì. ³³ Kà pá ta̰ntá Sèsàdéè, k'yèe sa̰ndáápa é kɔ̰́ɔ̰́ ye pɔ̀kàta ye tempáàku yìkàǹyìko, é taàa-nà Pɔ́dì o nɔ̀hi mɛhɛká. ³⁴ K'yèe tempáàku yìkàǹyìko é kaàn ye pɔ̀kàta, é béka Pɔ́dì tempáàku p'òò pɛɛ̀-ku kú mɛhɛká.

K'óò tɛ̰́ná è yɔ̀: Sìdìsíì tempáàku. ³⁵ K'yèe tempáàku yìkàǹyìko óò caka è yɔ̀: Mɛ̀m̀p'àà pṵ́ṵ́nì-pa kó tɛ̀ni tḭ́ń wɔ̀ni-dà, n k'áa béka-má mɛ̀mà dɛ̀ɛ̀-ma. K'ó kɔ̰́ɔ̰́ nùdi è yɔ̀ pá hḭ́ná Pɔ́dì, Hèdótì wóo-hɔ̰́ɔ̰̀ta mɛhɛká.