Tɔná 24

Tɛ̀tùdúsì pṵ́ṵ́nì Pɔ́dì

¹ Kà daàa kànùm̀ é ka̰há, kà dɔ̀hàdi kpɛ̰́ǹn Ànàníyásì é tɛ̀ni Sèsàdéè yɔ̀ti, è nɔɔ̀-nà-ní Sùwífùpa kpɛ̰́m̀ma pàcɔ̰́, nà Àfòkáà òcɔ̰́ǹ, kà p'òò toò Tɛ̀tùdúsì. Kà pá tɛ̀ni tempáàku yìkàǹyìko Fèdísì pesá, é caka Pɔ́dì pa̰à̰-sa. ² Kà pá yíí-ní Pɔ́dì k'ó tɛ̀ni, kà Tɛ̀tùdúsì é cetá o pṵ́ṵ́pu è yɔ̀: Dapàǹkpɛ̰́ǹn, nà fɔ̰́ń kú nɔɔ̀ti-dà ti fòù-ma wɛ̀ɛ̀di sàdi mɛhɛká. N'àa kú nɔɔ̀ti-dà mɛ̀ɛ dɛɛ̀, cehènamá pa̰à̰-ma ti nìkù mɛnkù kú kpɛ́mú, nà yaǹfòùma a káá-ma. ³ Ti mɛ̀ɛ teháà-á-ma ye kú pa̰á̰suumà wɔ̀ka wɛǹni nà páàti wɛǹni, àà sɛdí sàma mɔ́ma. ⁴ Há̰kà, ti pú kpɛ̀i áa tódá wɔ̀ni sàma. Ti pú kó wɛdá sàma. Ye kú kpɛ́mú, m'a cɔɔ̀hu è yɔ̀ a nììma mɛhɛká, á ti besí. ⁵ Ti cɔ́ɔ́ é n'hɔ̰́tà dɔɔò mɛnǹ yòǹ niìkpákpàdo mɔ́nń-dà. Ò cèǹtì teǹka nà ka nùdi-dà, è kà̰à̰nì Sùwífùpa. Mɛnń-dà nihí weèdɔɔ̀-cɔ̀ku pà toò-ku Nàsàdɛ́tì kpɛ́ɛpá. ⁶ Ò múńtà bɛń-ma, è kó pa̰á̰ yɔ̰́káma Weèdi hɔ̰́ɔ̰̀ta, kà t'óò cɛ̰ɛ̰́. [Kà tí n'kpɛ̀i óò síi-nà ti kpɛ̰́ńtìnùka hḭ́mpú, ⁷ àmá kà kɔ̰̀màǹdáǹn Dìsìyásì, é tɛ̀ni óò fèda ti nɔ̀hi mɛhɛká nà kpeèti. ⁸ Ye wɔ̀ni é ti caka è yɔ̀ t'óò yíí a pesá.] A kó nɛɛ́ ò béka-á-ma a mɔ́nń, é dɛ́há kà t'oò pṵ́ṵ́nì-sa wɛǹni pú yòǹ bemú.

⁹ Kà Sùwífùpa é teha ò wɛdà-sa wɛǹni, è yɔ̀ ò wɛdà pópóí-dà.

Pɔ́dì pṵ́ṵ́kú o cɔ̰́ɔ̰̀di Fèdísì yìhìka

¹⁰ Ye wɔ̀ni, k'yèe tempáàku yìkàǹyìko é pa̰á̰ yḭdó Pɔ́dì, è yɔ̀ ó wɛdá. K'ó tódá wɛmá è yɔ̀: N yá̰á̰-ma è yɔ̀ n'àa sídí-ma ti teǹka mɛhɛká, yè yɔ̀ɔ beeká dɔ́ɔ́di. Ye kú kpɛ́mú-dà tee n dań-ma, è kó caka n kpɛ́ɛmá é pṵ́tá n cɔ̰́ɔ̰̀di. ¹¹ Yè pú ha̰tà daàka píì-kàdɛ́ɛ́, nà n póńtà-ma Sèdìsàdɛ́m̀ è kó dɔa Weèdi. A mɔ́nń kó nɛɛ́ é béka-á-ma é dɛ́há kà mɔ́ma-dà. ¹² Òcɔ̰́ǹ pú n dɛ́hà daadí yèni Weèdi hɔ̰́ɔ̰̀ta mɛhɛká, yoo Weèdi wɛmá biɔhà-nàmɔ̀ka mɛhɛká, yoo yɔtí mɛhɛká, kà n há̰kádí n'ɔ̀ɔ̀cɔ̰́ǹ, yoo kà n fukù nìku. ¹³ Ye nìpà mɛmpà n pṵ́ṵ́nì-sà wɛnnì-ní sá̰mà, p'oòcɔ̰́ǹ pú káá ò kó bɛka-sá k'yè yòǹ bemú. ¹⁴ Ǹtɛ há̰kà n teháà-sa a yìhìka: N tṵ̀n cɔ̀ku-dà, kà mɛmpa kù dìi è yɔ̀ kù pú sudi. Mɔ́masí hḭ́ǹka, n dehú n yààpa Weèdi kpɛ́mú-dà. N dań-ma pà wà̰haà-sa wɛǹni kpɛ̰́ńtìnùka pɔ̀kàhi mɛhɛká, nà Weèdi wɛtɛ̰́nápa kpɛ́hí mɛhɛká. ¹⁵ N káá-ma ye kú daḿma Weèdi pesá, kà pa mɔ́mpá mɛ̀ɛ té mà káá, è yɔ̀ Weèdi kó wáńtá yá̰hìna-á-ma niìcoópa nà niìsḭ̀m̀ma. ¹⁶ Ye kú kpɛ́mú-dà tee, kà n mɛ̀ɛ té wɛ̰́dì wɔ̀ka wɛǹni, è fòù Weèdi yìhìka nà nìpa yìhìka yè kó hḭmá kà n yàma dá nà n kɔkapú. ¹⁷ N pa̰à̰ beeká dɔ́ɔ́di-dà cà̰ǹku. N tón é koní Sèdìsàdɛ́m̀, è toó-ní dící-dà, è kó tempa-nà n bookú kpɛ́ɛpá, é kɔ̰́ɔ̰́-nà Weèdi pa̰ká.

¹⁸ N tɛ̀ni Weèdi hɔ̰́ɔ̰̀ta ye kú kpɛ́mú-dà, kà pá n dɛ́há, è hɔ̰́tà n káà yɔ̀hɔ̀ta-ní wekànamá kákámú. Nìku de pú n yéńtà, kɔkapàma màcɔ̰́mà mɛ̀ɛ de kɔ́ɔ́. ¹⁹ Há̰kà, Àsíì tempáàku Sùwífùpa pàcɔ̰́ de yè péé-ma, mɛmpá-dà de yònà é tɛ̀ni a yìhìka é n pṵ́á̰, kà pà de káá màcɔ̰́mà n hḭ́ǹka. ²⁰ Yoo, mɛ̀m̀pà péé-pà miì, pá caka-ní yetádi pà dɛ́hà-di n hḭ́ǹka pà n tanà tḭ́ń daadí pa sídàsàpu yam̀ma yìhìke-è! ²¹ Pà kó nɛɛ́ é caka-sá sá̰à̰di-dà héé, n de nɛɛ̀hi-sá pa yìhìka, é wɛɛ́ kpeéma è yɔ̀: N dań-ma kpɛ́mú, è yɔ̀ Weèdi kó wáńtá é yá̰hìna kpíípa, ye kpɛ́mú-dà tee kà pà n síí-nà nɛ yìhìkà yenì. ²² Fèdísì há̰ de yɔ̀ɔ békàpu-dà, è yá̰á̰ ye biɔhànamá yòm̀pu sukú. K'ó fa̰ǹta ye sídàma daadí, è yɔ̀: Kà kɔ̰̀màǹdáǹn Dìsìyásì tɛ̀ni tḭ́ń daadí, n kó sída nɛ wɛkú.

²³ K'ó kɔ̰́ɔ̰́ nùdi sósìpa kɔ̀ta kpɛ̰́ǹn, è yɔ̀ ó n'ceí Pɔ́dì, àmá óò m'pɔ̰n foóma, é tṵ́má hédá k'òo kpɛ́ɛpá é n'kɔ́dì-ní òò tempú-nà.

Pɔ́dì nɛ̀hi Fèdísì nà Dùùsídì yìhìka

²⁴ Kà daàka kàcɔ̰́kà é ka̰há, kà Fèdísì é tɛ̀ni n'ɔ̀ɔ poòo Dùùsídì, k'ò yòǹ Sùwífù. K'ó tɔn kà pá tóó-ní Pɔ́dì. K'ó besí ò de káá-ma, dandaní taàa-má Sèsí-Kídísì hḭ́ǹka. ²⁵ Àmá, Pɔ́dì cetà tḭ́ń wɔ̀ni è wɛì coóma wɛmá, nà cɔ̰́ɔ̰̀di cɛ̰ɛ̰́ma wɛmá, nà sídàma mɛ̀mà pení-ma-ní wɛmá, kà wantafɔ̰̀di é cɛ̰ɛ̰́ Fèdísì, k'óò caka è yɔ̀: A kó nɛɛ́ ka̰há-ma sá̰mà-ní. Kà n dɛ́tà tḭ́ń daadí bòdi, n kó tṵ́m'áa yíí-ní. ²⁶ Ò mɛ̀ɛ té de ceí Pɔ́dì k'óò pa̰a̰-má-dà dící. Ye kú kpɛ́mú-dà tee, k'ò d'oò yún wɔ̀ka wɛǹni, òò kɔ̰̀di-nà.

²⁷ Kà beeká kàdɛ́ɛ́ é ka̰há, kà Pɔ̀sìyúsì Fɛ̀sìtúsì é ta̰ǹta Fèdísì, wóòti hḭ́ǹka. Fèdísì há̰ de kpɛ̀i-má Sùwífùpa óò n'naanà tá, k'ó hédá Pɔ́dì kódeedí mɛhɛká.