3
Ia mansia ipalalosa
1 Anahatana ihaye tau binatang pusire. Pusire mo iaka. Hasae tekene sahoro ianei panesi ne iakarota. Tekene rei iasei arihoni ia pina rei, “Titue si? Anahatana isopo iahata, ‘Pene oai ai huae sae mani wani nisi anoe reini?’”
2 Iahata, “Ami aai ai huaya pusire iake. 3 Ne hasae ai isa wani ereooi paka nisi tihue mo, aiki tewa. Tea mo, Anahatana isopo. Akahuui mani iae tewa oi. Tea mo, sani aiki te akahuui mka amatama.”
4 Iahata, “Hmm. Iakarotamo. Ne titue tewa. Omi mka omatamo tewa. 5 Anahatana iasau sanrei tau ianei ata mka oai ai huae rei, oyo onoo hainau. Mka omi sani Anahatana. Omi sani Anahatana reiso, oanei sae sahoro mo hali iaka sae sahoro mo hali kahatena.”
6 Ia pina rei inoo ai huae rei, inooi marainie, reiso iahata iaiki iae mka iahanai iake. Iasau pani anoi iahata, “Nene iake mo, au uanei panesi.” Reiso ikure ai huae rei oyo iaiki. Iaiki samatoro iruiki osi sahai. Reiso sahai iae iaiki oi. 7 Uaso oaiki suka, oyo onoo hainau. Oanei ata sanakuso. Reiso uaso onana ai ara totua samatoro ohonire. Ohonire oyo oateire. Osou nete no patana.
8 Reiso nene ranie hatae rei tau ranie eremanu, oatinu Anahatana kinakai pani nisi rei. Reiso uaso oauhuniso sui ai aikuna. Oauhuniso na Anahatana pene inooso. 9 Ne Anahatana ioi ia hanaie rei. Iahata, “Ano. Ano wani sui supa?”
10 Iahata, “Upu. Au uatinu kinakamu mai nisi reini so, uauhuni runaya. Ukaitaua. Tea mo, usanakuku.”
11 Iahata, “Ia seia isima ata sanakua rei? Ano aai ai huae wani usopoa rei te sae rei?”
12 Iahata, “Ia pina waini ano aruiki osiku na ikataku rei, sahoro iruiki osiku. Iruiki oyo uaiki.”
13 Ita Anahatana iasei arihoni ia pina rei. “Amuna na auna me hali rei?”
Iahata, “Tekene rei sahoro iakarotaku. Reiso uai ai huae rei tea.”
14 Reiso Anahatana iasau osi tekene rei sanrei. Iahata,
“Ano me hali rei, reiso mka uapasanaya.
Arihoni binatang pusire hasae ano sahoro urui kahatene osia.
Urui kahatene osia rei, ranie hatae reini ro-rotu-tu ria supani ausu tau tiamu pokone.
Mka ausua pusu tapune hahae ria ro-rotu-tu amataya.
15 Ano runa ia pina rei, uamo mka ouna nisa runa umau.
Ano mea upu momou runa ia nea upu momou ohiti nisa runa umau.
Ano mka arutu upui toui.
Ne ia mo, mka iheta poho unumu.”
16 Ita iasau osi ia pina rei. Iahata,
“Tinaimu taua, au mka una eresunia.
Ia ikine iamrae, au mka una tiamu ereuni mainae.
Ne masike tiamu ereuni sanrei iae, anomu ereoto runa sahamu sirinia.
Masike eresunia iae atinu tanui sirinia.”
17 Ita iasau osi ia hanaie rei. Iahata,
“Ano atinu tau sahamu, reiso aai ai huae rei wani au usopo unete na pene aaiki.
Ano apusui reiso uapasanaya.
Urui kahatene osi tuamane.
Reiso kahurae apakariani eresuni-sunia rotu-tu amataya.
Apakariani akahi-kahia samatoro tuamane rei ereuna me atuhu isia iaka tau me muaina.
18 Akahi-kahia tau monota runa awaneu monota waroni nene unia.
Mka ai utana waroni orahure tewa.
19 Ne masike ai utana waroni orahure tewa iae,
mka apakariani mainae tau ruamu me kausa wanaya na arahu tuamane reini na asupu me muaina.
Me kausa wanaya rotu-tu amataya na ruamu auna tuamane honu.
Mataanoe uposoa arihoni tuamane, reiso anunia auna tuamane honu.”
20 Ia mansia mataanoe rei nanai Adam. Ihete sahai nanai Hawa. Ia pina rei iuna ina tau sio mansiau pusiso, reiso nanai Hawa. Hawa nene manariti, “Iapuhai.” 21 Reiso Anahatana iuna apia arihoni binatang unte, samatoro iausahure osi Adam runa sahai uaso.
22 Anahatana iahata, “Muie reini mansia nooi sani ita nea. Ianei sae sahoro no hali iaka runa sae sahoro no hali kahatena. Reiso kahurae inetei na pene iai ai huae wani ereuna okarihuru oamahai. Inetei na pene iamahaiki rotu-tu ria supani. 23 Reiso inei ia mansia rei uaso arihoni Nisi Eden rei. Iaisosiki irahu tau tuamane wani iposoi arihoniki rei. 24 Ineiso samatoro iaisosi sio mamsakaya on roe noiyaha osaka nisi rei, napi on ria ranie mata eresaa. Osaka nene mitanunue. Oyo iautue tunue wani ereita-itai. Tunue rei resawai eretope erenete mitanunue rei. Tunue rei runa sio mamsakaya rai nanie osaka arena wani ereeui nau ai wani nene huae ereuna mansia okarihuru oamahai. Reiso iuna sanrei na pene ia seia oi ieu haineke ai rei.