4
Kain ihunu wanini
1 Adam inekei ikata sahai Hawa oyo tinaini taua. Anai iamrai, ia hanaie. Iamrai poe, Hawa iahata, “Anahatana iakahaiku reiso ususu we ia iki hanaie.” Reiso ihete nanai tau Kain. Nene manariti, “Ususu.” 2 Ita ia iki muie isa iamrai honu. Nanai Habel. Uaso sio mainaya, oyo Kain isaka irahu nisi. Ne Habel mo, isaka rompau runa une-uneu.
3 Ereeu mai, taue isa Kain inana atuhu oyo iruire osi Anahatana. 4 Habel iae sanrei oi. Ne ia mo, irui rompau. Rompau anaya manaoneta. Irui nene minaya. Reiso Anahatana ikaumini runa Habel irui rompau nene minaya rai. 5 Ne Kain mo, ipenei iararumai runa ne atuhu rai. Reiso Kain anoi eresaa hunu ruai rotu-tu uai anoe remtukui.
6 Reiso Anahatana iasau osi Kain. Iahata, “Amuna na anomu eresaa rei? Na uamu anoe remtukui rei? 7 Sani auna iake, mka uamu anoi kaie. Mka anoku iake runaya. Ne sani auna kahatene mo, ainati. Rosa wani rekaohua haineke nea. Ano nanie apalalosa. Ne kahurae apamese anomu.”
8 Nene taue isa Kain iasau osi wanini sanrei. Iahata, “Mai, na uata ieuta na ria nisi.”
Iahata, “Mpanei. Ia seia ianeiki? Au usaka waniku?”
10 Iahata, “Amuna na auna kahatene sanrei? Wanimu ne nasini wani reasei nea. 11 Au nanie urui kahatene osia, reiso wani uneia arihoni tuamane reini. Tuamane wani ereninu wanimu ne nasini rei. Tau ahunu wanimu, tuamane rei ereninu ne nasini. Reiso nanie uapasanaya. 12 Sani nanie arahua mka atuhu isia tewa. Mka aeu ahori-horia asupu nainiamu manisate isa tewa mai tuniai reini.”
13 Iahata, “Upu. Ira oe! Mka umataku tea! Apasanaku mainae sanrei mana mo, ukua tewa! 14 Aneiku arihoni tuamane reini. Aneiku arihoni uamu anoe. Mka uhori-horiku, usupu naniaku mai tuniai reini tewa. Reiso sani ia isa isupuku mka ihunuku.”
15 Iahata, “Tewa. Sani ia isa ihunua, mka ia rei, uapasanai mainae rotu-tu nai itu.” Oyo Anahatana iakakinai na sio umau osupui pene ohunui. 16 Oyo ieui iarihoni Anahatana uai anoe. Iruei pani tuama Nod pani napi ranie mata eresaa, pani Eden on pani hae.
Kain nea upu nea momou
17 Kain iausahai, oyo sahai uaso osusu no ia iki hanaie isa nanai Henokh. Iamrai poe, Kain waini iapuoo niane isa reiso ihete niane nanae tau Henokh erepusu anai hanaie. 18 Ita Henokh iausahai, isusu anai hanaie isa waini nanai Irad. Ita Irad iausahai, isusu anai hanaie waini nanai Mehuyael. Ita Mehuyael iausahai, isusu anai hanaie waini nanai Metusael. Ita Metusael iausahai, isusu anai hanaie waini nanai Lamekh. 19 Lamekh inana ne pinau ua. Ia isa nanai Ada. Ia isa honu nanai Zila. 20 Ada isusu Yabal. Ia sahoro nea upu nea momou oapiara makapanau. Orueso tau numau waroni onanare arihoni makapana unta. 21 Yabal wanini nanai Yubal. Ia sahoro nea upu momou oaise sae isa wani nooi sani gitar runa oauhona suling. 22 Lamekh sahai muie Zila isusu Tubal-Kain. Ia sahoro nea upu momou otuka alatiu arihoni tampaka runa mamono. Tubal-Kain hotai nanai Naama.
23 Lamekh iasau osi ne pinau uaso, irui ruai roe uae. Iahata,
“Ada runa Zila uamo. Saka ono-noo au.
Sani ia honue isa nanie ihitaku mo, mka uhunui.
24 Sani ia isa ihunu Kain, Anahatana iapasanai mainae nai itu.
Mka sani ia isa ihunu au mo,
Anahatana iapasanai mainae naiosa, nai hutu itu rahana itu.”
Set iamrae
25 Adam inekei ikata sahai honu. Oyo isusu anai hanaie isa honu. Anai hanaie rei nanai Set. Inai iahata, “Anahatana irui anaku hanaie isa honu ikati Habel waini kakai ihunui.” Set nene manariti, “Irui.” 26 Set iausahai oyo isusu anai hanaie isa nanai Enos. Tau muie rei samatoro mansiau oainisi oainaa runa Anahatana.