18
Anahatana Itotoe honu osi Abraham ata mka Irui Anai Hanaie Isa
1 Anahatana ihoka ruai osi Abraham haineke ai onate poe nia Mamre. Tau rei, ranie katopu. Abraham iru-ruei poe ne numa wani sio onanai rerihoni makapana unte. Iruei poe mitanunue. 2 Ihetu unui, isira tau sio tonu wasoni oooso mai uai anoe nea. Inoo sanrei, iruma noi inapaso, oyo irike tune iakapuni aio. 3 Iahata, “Wea upu. Pene oniku we numa. Onusu mai na, oaimo ee. 4 Onusu mai na osohu aimo atua ee. Na oaranahamo mkane mai ai nohue reini ee, 5 na unoo runa muaine osimo. Oaimo na oamkona na oeu kua. Hokamo mai numa nea reiso, oaimo ee, samatoro oeumo.”
Oahata, “Iake. Aranahama mkane ee.”
6 Reiso Abraham imale suru ria suru nau. Inusui pani numa anoe, iasau osi sahai. Iahata, “Anana rapu tariku karuni isa mai. Tariku wani ohie rei, na auna poroti hua isa.”
7 Oyo iruma ria ne makapanau nene koka. Iroma koropou anae wani kopo-kopotuene. Nene henate mo, manne. Ihokai arihoni koka anoe rei samatoro, iruiki osi ne makahaie. Ne makahaie rei irehiki, oyo ihutui rapu-rapu. 8 Ta sanrei oyo, Abraham inana koropou nene susu, oyo inana nene susu wani mataanoe runa koropou anae nene henate wani masae nea rei. Inanare oyo iratare osi sio onata tonu rei. Wasoni oaiso, Abraham iooi isakaso poe ai nohue rei.
9 Oaiso suka oyo, oasei, “Sahamu, Sara oi?”
Iahata, “Waipani numa anoe.”
10 Ia isa iahata, “Nene hunana sia rainau, mka uhokaku mai honu. Tau rei mka sahamu isusu hanaie isa nea.”
Iasau sanrei, Sara iatinu haineke mitanunue pani ia onate rei totui. 11 Ne Abraham runa Sara uaso okore-kore oamtuaso nea. Sara isupu hunane tewa nea. 12 Reiso Sara iaumani pani anoe. Iahata, “Ukore-koreku na ukua tewa nea reini. Sapani na anoku mirike na ususu? Samatoro Abraham ikore-korei iamtuai nea reini!”
13 Oyo Anahatana iasei tau Abraham, “Sae eremuna na Sara iaumani rei? Sapani na Sara iasei iahata, ‘Sapani na ia pina kore-korene isa sani au reini mka ususu asi?’ 14 Au, Upumu, we kawasa una sae mani. Sani sinasi uasau wani mka hunana sia rainau uhokaku honu. Tau rei Sara anai hanaie iamrai nea.”
15 Sara ikaitau reiso iauhuni iahata, “Tewa. Au uaumani tewa.”
Ne Anahatana iahata, “Tewa. Ano sinasi aumani.”
Abraham Iainisi tau Anahatana osi Sio Sodom
16 Tonuso osima runa Abraham anai hanaie suka, oyo nanie onuniso. Abraham iautunuso. Oeu rotu-tu ateso ohokaso ria tihue otoe isa haineke kota Sodom. Haineke Sodom reiso onoo na poe Sodom. 17 Anahatana iasei pani anoi, “Kani mka upeneku tau usima runa sae wani nanie unai tau sio Sodom rei osi Abraham? 18 Ne arihoni ia sahoro nea upu momou sio panesi. Sio panesi reiso mka no kawasa mainae. Reiso uauhuni runai sapani? Mka urui iake osi sio niana pusire mai tuniai reini tau arihoni ia. 19 Tea mo, uromai nea. Uromai nanie iaisosi ne hehuka nea upu momou. Iaisosiso na opusuku. Iaisosiso nanie onana sae waroni manisata. Pusire waroni utotoe osi Abraham rei mka uuna suire. Uuna suire hete sae, opusuku. Onana sae waroni manisata rai.”
20 Oyo Anahatana iasau osi Abraham, “Sio wasoni osima osiku oahata, ‘Nia Sodom runa nia Gomora mo, nene kahatena panesi. Sapani na apasanaso tewa?’ Sio no rosau raimo kahatena mainaya. 21 Reiso mka uhokaku pani, na unoo sae waroni sio oasau runare rei. Unoo ata kani manisate te tewa.”
22 Oyo sio onata ua wasoni okata Anahatana rei, ruao oeuso na poe Sodom. Ne Anahatana ikata Abraham asi. 23 Uaso oeuso oyo Abraham iasei, “Upuku. Titue si? Mka ohunu sio wasoni anoo manisata runa sio wasoni anoo kahatena rei pusiso? 24 Sani sio hutu nima wasoni anoo kahatena tewa poe niane rei, kani mka ahunu sio Sodom pusiso utuso sirinia si? Te mka apuheu sio pusiso na sio hutu nima rei oamahaiso? 25 Pene ahunu sio wasoni anoo manisata rei runa sio wasoni anoo kahatena rei pusiso. Pene, Upu. Tea mo, ahunu sio wasoni anoo kahatena tewa rei okata sio rei, tea? Ano wani asau ata ia seia waini ia manisate ia seia waini ia isana reiso, kahurae auna sae wani manisate. Pene ahunu sio wasoni anoo manisata rei.”
26 Iahata, “Sani usupu sio hutu nima poe Sodom wasoni anoo manisata mo, mka uapuhai sio Sodom pusiso utuso noso sio hutu nima rei.”
27 Iahata, “Upuku. Pene akapuku tanuku ee. Tea mo, unesi-nesi uainisi tanua honu. Aikee au ikine honue. 28 Ne sani poe niane rei, sio hutu ate rahana nima mani wasoni anoo manisata. Mka ahunu pusiso tau hasae sio nima mani?”
Iahata, “Sani usupu sio hutu ate rahana nima rei wasoni anoo manisata, mka uhunu pusiso tewa.”
29 Iahata, “Upuku. Sani sio hutu ate mani mo, sapani?”
Iahata, “Noso sio hutu ate rei, mka uhunuso tewa.”
30 Iahata, “Upuku. Pene akapuku tanuku sani uanamana honu. Sani hasae sio hutu tonu mani mo, sapani?”
Iahata, “Sani usupu sio hutu tonu mo, mka uhunuso tewa.”
31 Iahata, “Upuku. Pene apasanaku ee. Tea mo, mka uainisi arihonia honu. Sani hasae sio hutu ua mani mo, sapani?”
Iahata, “Sani usupu sio hutu ua mani mo, mka uhunuso tewa.”
32 Iahata, “Upuku. Pene akapuku tanuku ee. Tea mo, au mka uainisi arihonia nai osa-sa honu. Sani asupu sio hutusa mani mo, sapani?”
Iahata, “Sani sio hutusa wasoni anoo manisata, mka uhunuso tewa sirinia.”
33 Anahatana ianamana pusi oyo ieu arihoni Abraham, oyo Abraham inuniki roe ne numa.