¹ Sio maisosia ua on roe noiyaha oeu arihoni Abraham nanie oeuso poe kota Sodom. Ohokaso poe tau pumono. Lot waini iru-ruei mai kota rei nene mitanunue. Ta inoo uaso, oyo iooi inapaso. Ohoka mai tanui, oyo irike tune iakapuni uaso aio. ² Iahata, “Wea upu. Osinimo mai we numa ee. Na osohu aimo. Onekemo mai we numa ee. Na hanu roe samatoro wea upu uamo oeumo tau omnano tunne honu.”

Oahata, “Iake. Ruae nea. Mka anekema mai tuama huie mai kota tihue reini.”

³ Ne Lot iapa-apamanuso. Iahata, “Tewa wea upu. Mai na poe onekemo poe we numa nea.” Iapamanuso rotu-tu uaso opusui pani numa anoe. Lot iaisosi ne makahaia na okotu poroti wani erepake nehue tewa osiso samatoro iratare runa muaina waroni iaka osi uaso na oaire.

⁴ Ne uaso omakawanaso asi, sira tau sio hanaia pusiso poe Sodom ohoka on ria on nau ohori pusi numa rei. Pusiso ohoka ohori Lot ne numa rei. Sio mtuana kore-korena runa sio honua pusiso utuso.

⁵ Pusiso oakapona Lot. Oasei, “Sio hanaia ua wasoni ohokaso onekeso mai me numa rei wasoni wanpa? Ahokaso mai osima, na asoulahaso!”

⁶ Lot ihokai arihoni numa anoe oyo iraru mitanunue. ⁷ Iahata, “Wea amau, wea kakau waniu. Uainisi arihonimo. Pene ouna kahatene sanrei. ⁸ Ne masi oatinu. Au we hehu pinau tunna ua wasoni. Reiso uruiso osimo na ounaso pusu ruamo mo maue. Hete sae, pene una sae isa tau sio ua wasoni ohokaso reini. Tea mo, uapusaaso mai we numa nea. Reiso kahurae uneteso.”

⁹ Ne oahata, “Aeua! Ano mo, ano rakane mani rei! Ano nanie aisosi ami si? Reiso aeua teria kahu matamu. Tea mo, mka auna kahatene mainae tanua ranesi sio ua reino.”

Oyo oruru heu Lot, nanie oruru heu mitanunue. ¹⁰ Ne sio ua wasoni ohokaso rei, oakahuu Lot hanai atue, samatoro onesai pani numa anoe. Onesai oyo oraru mitanunue. ¹¹ Uaso ouna sio panesi rei onoo mosa tewa reiso sio panesi rei onoo mosa mitanunue rei tewa nea. Oyo pusiso utuso matao usena raputiso.

¹² Uaso oasau osi Lot. “Sani me hehuka hanaia umau, me hehuka pinau umau, me msahana runa me enau umau mai kota reini mo, asau osiso na pusimo ohokamo. ¹³ Tea mo, kota reini mka ami apumokoi. Sio panesi osima osi Anahatana oahata, ‘Sio Sodom no kahatena mainaya. Reiso apasanaso tewa ta hae?’ Reiso Anahatana iaisosima mai, na apumoko Sodom reini tea.”

¹⁴ Reiso Lot ieui iasau osi ne hehuka pinau uare no hanaia wasoni nanie onanaso rei. Iahata, “Orapu na ihokata arihoni kota reini. Tea mo, Anahatana nanie iapumokoi nea.”

Ne sio ata kani noa ama iakasiru mani.

¹⁵ Tau ereputi-puti asi sio maisosia ua rei oaisosi Lot sio oeuso on sini. Oahata, “Sisaa! Aeua runa sahamu runa me hehuka pinau uaso na pene omokomo. Pene omatamo tau kota wani nanie eremokoi reini.”

¹⁶ Lot iarinii asi. Ne Anahatana anoi runai. Reiso sio onata ua rei oakahuu hanai oyo onesai runa sahai runa ne hehuka pinau. Pusiso ohokaso arihoni kota rei. ¹⁷ Hokaso arihoni kota rei, oyo ia isa arihoni sio ua rei iahata, “Orumamo na oamahaimo. Pene onoo hae muie. Pene oaranahamo sui ekote reini. Orumamo na roe pupua. Orumamo na pene omatamo.”

¹⁸ Ne Lot iahata, “Ira oe, upu! Pene aisosima arumama na roe pupua. ¹⁹ Upu. Omi oakahaima na amahaima nea mo, muna? Ne pene aisosima orumama roe pupua raimo hainau maa! Pene rotu-tu ahokama roe rei tewasi oimo, kota reini eremokoi nea. Mka amatama oi! ²⁰ Reiso masi anoo pani uae reipani. Nia ikine isa waria haineke nea. Reiso otapima arumama na ria nia ikine rei mani na amahaima.”

²¹ Iahata, “Iake. Nia ikine rei, mka uapumokoi tewa. ²² Oruma rapu. Tea mo, au iae uapumoko kota Sodom tewasi rotu-tu ahokaya ria nia ikine rei ee samatoro uapumokoi.”

Lot iasau iahata, “Niane rei ikine mani reiso ohete nanae tau Zoar.” Nene manariti “Nia ikine”.

²³ Lot ihokai pani Zoar mo, ranie eresaa nea. ²⁴ Sira tau Anahatana irati aspal wani usa ereai-ai tanui nooi sani uane. Iratiki poe Sodom runa Gomora hahaya. ²⁵ Kotau ua rai ramokoso. Runa ekota hanaya, atuhu ai nohua, runa mansia pusiki wasoni orueso sui tihue rei pusiki oi. ²⁶ Ne Lot sahai inoo hae muie reiso ineniki tau masine, nooi sani hatu.

²⁷ Nene omnano tunne rei, oyo Abraham ieui roe tihue wani iooi ikata Anahatana rei. ²⁸ Inoo na poe Sodom runa Gomora. Inoo usa wenue ereputi sui ekote rei pusiki. Inoo sani usa reinuna. ²⁹ Anahatana iapumoko kotau waroni Lot iruei tanure. Ne anoi erepeka runa Abraham reiso itapi Lot irumai.

³⁰ Lot ihitio ieui iarihoni nia Zoar ikata ne hehuka pinau uaso. Tea mo, ikaitau. Reiso oeuso roe pupua nanie orueso roe rei. Orueso pani hatu nohue isa anoe. ³¹ Taue isa ia iki pina manaonete iasau osi wanini sanrei. Iahata, “Amari ikore-korei nea. Mai tihue reini ia iki hanaie isa tewa. Sapani na mka iausahata na isusu? ³² Reiso mai na uata iuna amari ininu tihu minne na imukei. Imukei oyo ineketa runai na isusu.”

³³ Oyo nene mono rei ouna noa ama ininu tihu minne, oyo amai imukei. Imukei oyo anai pina manaonete inekei runai. Ne amai imukei mainae reiso ianei ruai tewa naiosa. Ianei ata inekei runa anai pina tewa.

³⁴ Nene hanu roe omnanoe iasau osi wanini. Iahata, “Monosi unekeku runa amaku nea. Reiso nene mka-mka mono iuna amari ininu honu na ano anekea runai. Mka uata isusu re hehuka.”

³⁵ Reiso nene mono rei uaso ouna noa ama ininu honu rotu-tu imukei mainae. Ita ia iki pina muie inekei runai honu. Ne amai imukei mainae reiso ianei ruai tewa naiosa. ³⁶ Reiso ne hehuka ua rei tinaio taua tau noa ama ruai. ³⁷ Ia iki pina manaonete iruei runa anai hanaie. Ihete nanai tau Moab. Ia sahoro sio Moab no numa upue rotu-tu reini. ³⁸ Ia iki pina muie isusu anai hanaie oi. Ihete nanai tau Ben-Ami. Arihoni ia sahoro sio Amon no numa upue rotu-tu reini.