¹ Abraham iausahai honu. Sahai honue reimo nanai Ketura. ² Isusu ne hehuka hanaia wasoni nanao: Zimran, Yoksan, Medan, Midian, Isybak runa Suah. ³ Yoksan isusu ne hehuka wasoni nanao Syeba runa Dedan. Dedan nea upu sahoro muie reini oaoiso tau sio Asyur, sio Letus runa sio Leum. ⁴ Midia ne hehuka tau: Efa, Efer, Henokh, Abida runa Eldaa. Sio rei pusiso noa upu tau Ketura.

⁵ Masike Abraham irui Ishak ne kawasa tau numa anoe rusuni aikuna ⁶ tau waini ikarihuru iamahai asi iae, isaka iru-rui apia runa muaina osi Ishak nea waniu rei oi. Oyo iaisosiso orue hainau arihoni Ishak. Orue ria otoe Kanaan on ria hae.

^7-8 Abraham ikore-korei iamtuai nea oyo imatai. Imatai tau ne musum utuni hutu itu rahana nima. ^9-10 Imatai oyo Ishak runa Ishmael uaso oautotui, oaunutui pani hatu nohue wani nanae Makhpela. Hatu nohue wani haineke nia Mamre on ria hae. Wani mai nisi anoe wani Abraham ihane arihoni Efrom. Efrom mo, Zohar anai, ia Het rei. Abraham ihanei na iaunutu sahai Sara tanui. Reiso oeu oaunutu Abraham tanui na ikata sahai oi. ¹¹ Abraham imatai, oyo Anahatana irui iake osi Ishak. Tau rei Ishak iruei haineke parike wani nanae Lahai-Roi asi. Lahai-Roi nene manariti “Ia inoo au suiosa”.

¹² Ismael mo, Abraham anai. Inai tau Hagar, ia pina Mesir rei. Sara ne makahaie. ¹³ Ismael ne hehuka wasoni nanao: Nebayot, ia manaonete; samatoro, Kedar samatoro Adbeel; samatoro Mibsam; ¹⁴ samatoro Misyma; samatoro Duma; samatoro Masa; ¹⁵ samatoro Hadad, samatoro Tema; samatoro Yetur; samatoro Nafis; samatoro Kedma ia iki muie tune rei. ¹⁶ Sio hutusa rahana ua sahoro ouna numa upua tau ipana hutusa rahana ua. No niana mo, ohetere pusu nanao. ¹⁷ Ismael ne musum utuni hutu tonu rahana itu oyo imatai. ¹⁸ Nea upu momou orueso sui otoa on poe Syur rotu-tu ohoka pani Hawila. Syur mo, wapo Mesir on ria hae, ria arena wani nanie ereeui ria Asyur. Orueso hainau arihoni Abraham nea upu momou umau honu.

¹⁹ Areini sou monae rerihoni Ishak. Ishak mo, amai tau Abraham. ²⁰ Ishak ne musum hutu ate samatoro inana Ribka. Ribka mo, Laban hotai. Noa ama tau Betuel. Betuel mo, upui tau Aram. Sio mo, arihoni otoe Mesopotamia.

²¹ Onana umau potuina nea ne Ribka isusu tewasi. Isusu tewasi reiso Ishak iainisi osi sahai arihoni Upuri Anahatana. Oyo Upuri Anahatana irui sae wani Ishak iainisiki rei. Reiso sira tau Ribka tinaini taua. ²² Ribka iahana sani sio ikina ua nisu-nisuo pani tiai anoe reiso iasau pani anoi, “Ira oe! Sapani na sio ikina ua reini nisu-nisuo oakarema umau pani tiaku anoe reini omi?” Reiso iainisi tau Upuri Anahatana sanrei, “Upuku Anahatana. Sapani na sio ikina ua reini nisu-nisuo na oakarema umau mai tiaku anoe reini?”

²³ Reiso Upuri Anahatana isima osiki iahata,

²⁴ Ta ne hunana mtuaya oyo, iruei runa sio iki alalekau. Sio ikina ua rei, sio iki hanaia. ²⁵ Ia waini iheta manahane ianaone mo, ia msinae, samatoro ne hunua noo sani papite wani nene hunua panesi rei. Reiso ohete nanai tau Esau. Esau mo, nene manariti, “Hunua.” ²⁶ Ita ia muie honu. Ne hanai atue wanane rekahuu kakai toui. Reiso ohete nanai tau Yakub. (Yakub nene manariti iakahuu toui. Iakahuu toui, areimo rekakina ata ia mo, mka iakarota.) Uaso oamrai pannuhu Ishak ne musum hutu nome nea.

²⁷ Esau runa Yakub sio mainaya nea. Esau ianei iakaohu. Reiso ia ne suka ieu inekei noi wesie. Ne Yakub mo, ia menene. Ia ne suka iruei mai numa mani. No numa wani onanai arihoni makapana unte. ²⁸ Reiso Ishak anoi runa Esau. Tea mo, ia ne suka iai peniu waroni Esau ihunure. Ne Ribka mo, anoi runa Yakub.

²⁹ Tau ranie hatae isa Yakub waini irie sanau kihue msinae. Waini irie sanaute oyo sira tau Esau ihokai on ria wesie. Imata muaine. ³⁰ Reiso Esau iasau osi Yakub sanrei, “Rui we sanau kihue msinae reino mkane mai. Tea mo, wani umata muaine nea reini!” Reiso ohete nanai tau Edom. (Edom atinui sani “Msinae” tau sou Ibrani.)

³¹ Yakub iahata, “Iake. Mka urui osia sirinia. Hete sae arui me kawasa manaonete rei na urime numa hutae, ipane taue pusiki.”

³² Iahata, “Iake. Nanie umata muaine nea reini! Umataku mka uuna sae runa we kawasa rei?”

³³ Iahata, “Reiso asopa osiku ee. Samatoro mka urui sanaute reini osia.”

Oyo Esau isopa mai Yakub uai anoe. Iahata, “Iake. Urui we kawasa manaonete osia nea. Hete sae uai sanau kihue msinae reino.”

Reiso iaheni ne kawasa manaonete rei osi wanini Yakub.

³⁴ Oyo Yakub irui poroti runa sanau kihue msinae osi Esau. Esau iaiki rotu-tu tiai pokone samatoro ihitioi ieui. Tau sanrei Esau ipenei tau ne kawasa manaonete rei.