26
Ishak Iruei poe Nia Gerar
1 Poe otoe Kanaan reimo muaina tewa sani naone Abraham iamahaiki asi rei. Muaina tewa reiso Ishak sio ohitio oeuso na poe nia Gerar. Hoka poe oyo, iainisi arihoni Abimelekh ia ona aia Filistin na orueso poe rei. 2 Ieu poe Gerar. Tea mo, Upuri iatuhete ruai osiki nea, iasau sanrei. Iahata, “Pene aeua poe otoe Mesir nea. Aruea pani otoe wani mka uasau osia reini. 3 Aruea mai otoe reini mkane ee. Mka ukatamo na urui iake osimo suiosa. Otoe Kanaan reini pusiki mka uruiki osia. Uruiki osia runa mea upu momou pusiso utuso. Mka urui sae waroni utotoe osi amamu Abraham rei. 4 Mka urui mea upu momou panesi nooi sani oneu roe nante. Au mka urui otoe reini osiso oi. Mka urui iake osi sio niana pusiso pusu upumu isa. 5 Mka urui iake osimo. Tau Abraham iatinu tanuku. Ipusu we maunauna pusire uture.”
6 Reiso Ishak iruei poe Gerar. 7 Orueso poe nia Gerar oyo sio onoo Ribka mo, ia iake. Oasei tau Ishak sanrei, “Ribka mo, hotamu te sahamu?”
Ishak iausau iahata, “Ia mo, sahaku tewa ne hotaku.” Tea mo, Ishak ikaitau sio poe niane rei mka ohunui sani iasau ata sahai. Tau Ribka mo, nooi ia iake naiosa.
8 Ishak iruei poe nia Gerar nea. Ranie hatae isa ia ona aia inoo pusu yanela. Inoo Ishak iasa-asamau Ribka. 9 Reiso ioi Ishak na iasei tanui, “Ia pina reimo titie sahamu te hotamu?”
Iahata, “Ia pina rei, sahaku. Sani sinana uasau uahata, ‘Sahaku’ mka ohunuku reiso uasau uahata, ‘Hotaku’ rei tea.”
10 Iahata, “Ano auna sae tanuma reini? Sinana we sio iki hanaia mai niane reini oneke okatai sapani? Reiso pene apasanama. Tea mo, ruamu asana.”
11 Taa sanrei oyo, iasau osi ne sio iki hanaia poe niane hahae rei. Iahata, “Sani ia isa mai niane reini iakarema ia hanaie reini te, isoulaha ia pina reini te, mka imatai.”
12 Reiso Ishak iruei poe niane rei. Iruei poe niane rei oyo inana ne tanei apia, irahu ne nisi. Irahu ne nisi rei, Upuri irui iake osiki reiso isupu muaina panesi. Sani irahu atuhu anae osa mani ne isupu ne atuhu utuni. 13 Isupu ne atuhu panesi reiso ne kaya. 14 Ne manianeu panesi. Ne rompau ne une-uneu panesi. Ne koropou panesi. Reiso sio Filistin oananai. 15 Oananai reiso osou no parikeu tau tapune. Parikeu raimo, amai Abraham ne manianeu okanire on Abraham iamahai asi.
16 Taa ia ona aia iatinu sanrei oyo, ioi Ishak. Ishak ihoka mai oyo, ia aia iasau sanrei, “Aeu arihoni mani otoe reini nea. Tea mo, ano me kawasa anesi ami nea.”
17 Reiso Ishak sio ohitio oeuso rotu-tu ohokaso poe watane Gerar. Hoka poe samatoro oapuoo no wanane wani sio ounai arihoni makapana unta. Oapuooi pusi oyo orueso poe rei. 18 Sio okani parikeu umau honu. Parikeu rai iae, sio Filistin sahoro osoure tau tapune. Parikeu raimo Abraham ne manianeu okanire on Abraham iamahai asi. Imatai oyo sio Filistin osoure. Parikeu rai Ishak ihete nanaya sani amai naone ihete nanaya rai.
19 Ishak ne manianeu okani parike poe Watane Gerar, osupu tihu panesi. 20 Ne sio mamsaka rompau on poe Gerar oatana runa Ishak ne sio mamsaka rompau. Oahata, “Waene reini mo, ami mani waene.” Reiso Ishak ihete parike rei nanae Esek wani nene manariti “Atana Runa Umau.”
21 Ita Ishak ne manianeu okani parike isa honu. Ne oatana runa umau sinia. Reiso Ishak ihete parike rei nanae Sitna wani nene manariti “Nisa.”
22 Ita oeuso arihoni rei, oyo okani parike isa honu. Parikeu tonu nea. Parike isa reini honu mo, oatana runa umau tewa nea. Reiso Ishak ihete nanae Rehobat wani nene manariti “Tuamana Ralai.” Reiso Ishak iahata, “Upuri irui iake osita na irueta mai otoe reini. Mka ita panesi iuna kaya mai niane reini.”
23 Ita Ishak ieui honu, ihokai pani nia Bersyeba. 24 Tau mono rei Upuri iatuhete ruai osiki. Iahata, “Au mo, au Anahatana waini amamu iainisi iainaa runaku. Pene akaitau. Au mka ukata runaya. Urui iaka osia. Mka mea upu momou panesi sani sae wani utotoe osi amamu rei.”
25 Oyo Ishak itanuhaha hatu noore sani anau samatoro iainisi iainaa runa Upuri. Oyo iapuoo ne wanane pani otoe rei. Ne wanane rei mo, ounai arihoni makapana unta. Ita ne manianeu okani parike isa honu.
Ishak Runa Abimelekh Uaso Osopa
26 Taue isa ia ona aia Abimelekh on poe nia Gerar ihokai pani Ishak. Ihokai ikata Ahuzat runa Pikhol. Ahuzat mo, isaka iau-aunaui. Pikhol mo, isaka iai-aisosi sio tentara. 27 Ohokaso pani, oyo Ishak iasei tanuso, “Ohokamo mai tanuku muie reini nanie taa hae? Aikee naone mo, openemo tanuku rei. Rotu-tu oneiku arihoni mo niane rei, tea!”
28 Abimelekh iahata, “Ama. Muie reini mo, ami mato anei ata Upuri ikata runaya. Reiso ami nanie aeuma mai tanua na asau osia na uata isopa. Uata isopa 29 na pene omi ouna kahatene tanuma. Nooi sani ami iae auna kahatene tanumo tewa rei. Auna iake runamo reiso atapimo oeumo anori kaia runa umau. Auna kahatene isa tanumo tewa. Reiso ami anei ata Upuri Anahatana ikata runaya. Irui iake osia.”
30 Oanamana pusi oyo, Ishak iaisosi ne manianeu onana muaine oyo oaiso. 31 Nene hanu omnanoe wapani ereputi-puti asi oimo, uaso ototoe osopa nea. Osopa pusi oyo, Ishak iahaaso, “Eu noi. Oeu ainati rotu-tu ohokamo poe mo niane.” Oyo Abimelekh sio onuniso.
32 Tau ranie hatae rei, Ishak ne manianeu ohokaso tanui osima osiki. Oahata, “Ami akani parike isa honu. Asupu nene tihu panesi.” 33 Reiso Ishak ihete nanae tau “Syeba” wani nene manariti ‘Sopa’. Reiso niane rei nanae sanrei rotu-tu reini. Nanae Bersyeba.
Esau Iasusahai Inana Sio Pina Rakana