31
Yakub runa ne Pina Hehuka Orumaso Arihoni noa Ama
1 Nene ranie hatae isa Yakub iatinu ata nea saua oasau tanui. Oahata, “Sauri reimo, inana pusi amari ne makapanau reiso ne kaya. Inana re rusun pusire.” 2 Yakub iae inoo amai ne muirani runai sani naone tewa nea.
3 Reiso Upuri Anahatana iasau osiki. Iahata, “Anunia poe amamu ne niane poe amamu runa me mansiau poe otoe Kanaan nea. Mka ukata runaya.”
4 Taa sanrei oyo Yakub ianaha runa ne pinau uaso na opusui ria otoe wani isaka ne makapanau rai. 5 Ohokaso ria oyo iahata, “Mai na uasau sou reini osi uamo. Unoo amari iamuiraku sani naone rei tewa nea. Ne Anahatana waini amaku iainisi iainaa runai waini ikata runaku sirinia. 6 Uamo ruamo oanei nea, tea? Au pakariani osi amari rotu-tu uhunu-hunu ruaku. 7 Masike upakariani uhunu-hunu ruaku sanrei iae, amari iakarotaku sirinia. Iasa-sawariku rotu-tu nai hutusa raini. Ne Anahatana itapi amari iuna kahatene tanuku tewa. 8 Taue isa amari iahata, ‘Makapanau waroni nikapanta rai mka osi ano.’ Oyo rompau runa une-uneu rai rarue runa nene anaya rai poe oo, nikapanta. Ne munata iahata, ‘Makapanau waroni maniahua rai mka osi ano.’ Oyo makapanau rai rarue runa nene anaya poe oo, maniahua sirinia. 9 Reiso Anahatana inana makapanau waroni amari rei osiku.
10 Tau makapanau nene musum nanie rakata umau oyo uneke uamnii. Unoo une-une hanaia rakata une-une nikapanta runa maniahua. 11 Uneke uamnii Anahatana ne maisosie on roe noiyaha iasau osiku. Iahata, ‘Yakub.’
Oyo usana, ‘Oe. Upu.’
12 Iahata, ‘Masi anoo makapanau waroni rakata umau reimo une-une hanaia pusire nikapanta runa maniahua. Unoo sae waroni amamu hana-hanai iuna tanua rei nea. Reiso au unenire sanrei. 13 Au mo, au Anahatana wani uatuhete ruaku osia poe nia Betel rei. Uatuhete ruaku osia oyo asuhu mina zaitun roe hatu hahae wani anaka unumu tanui rei. Asuhu mina, samatoro asopa osiku. Reiso autotu me apia pusire nea, na anunia poe me niane.‘”
14 Ne pinau oahata, “Amari ne kausae wanae isa osima tewa nea. 15 Ami mo, inooma sani ami tamena. Iahenima nea. Inana ami hunonima pusire ne iapahia pusire nea. Iapahia iwena-wenare nea. 16 Anahatana inana makapanau waroni ami runa mani hehuka mani pahakiani inanare arihoni amari nea. Reiso auna sae wani Anahatana iaisosia rei.”
17-18 Taa sanrei oyo Yakub iautotu ne numa hutae pusiki, nanie inuniki poe amai Ishak, poe ne niane hahae poe otoe Kanaan. Iapusaa ne pina hehuka roe unta. (Unta mo, makapana wani nene totu unie mo, nene pupua sonota.) Iapusaa pusiso roe unta samatoro ikatu ne makapanau waroni isupure mai otoe Mesopotamia.
19 Ranie hatae wani sio oeuso rei mo, noa ama waira iatori ne rompau nene hunua. Tau ranie hatae rei iae Rahel inana iauhuni amai ne anahatana wani titue tewa nene siaie isa. Siaie wani ereruei mai numa eresakaso. 20 Oeuso rei, Yakub isima osi amai tewa. 21 Inana pusi ne numa hutae pusiki oyo orumaso. Osipu toha Wae Efrat na oeuso poe otoe Gilead, nanie opusu pupua poe rei.
Laban Isui Pusu ne Hehuka
22 Nene onona ua nau sanrei samatoro sio osima. Oahata, “Laban. Me hehuka wasoni suru poe oeuso arihonia nea. Osima osia oe?”
Iahata, “Tewa maa!”
23 Oyo Laban iamanou ne mansiau samatoro oeu opususo. Oeuso rotu-tu onona nome samatoro osupu nahao oyo opususo sui pupua Gilead. 24-25 Laban sio osupu Yakub sio mo, oapuoo no numa wani sio onanai arihoni makapanau unta nea. Oapuooi roe pupua ria Gilead rei. Ria pupua rei iae Laban sio onekeso oi. Nene mono rei ineke iamnii Anahatana ihokai mai tanui oyo iahata, “Ainati. Pene akapuku tau Yakub.”
26 Laban ineke iamnii oyo nene hanu omnanoe ieui roe tanui. Iahata, “Yakub. Ano auna au sanrei taa hae? Akarotaku nanie taa hae? Aruma arori we hehuka sani sio wasoni osotaso tau manahitane? 27 Amuna na on pani oeumo osima osiku tewa nea rei? Ne sani oasau osiku mka utapiso osia na anori miri-mirika. Mka iuna maisene. Iuna karisaa mainae. Iahinata. Iakapeti tihana waroni nene mamono inata. Iaise maisene isa nooi sani gitar. 28 Na umuki we hehuka wea momou na pusita iauhaa umau. Arirunea! 29 Au we kawasa una kahatene tanua. Ne monosi Anahatana waini amamu iainisi iainaa runai isopo na pene uanamana makae tanua. 30 Au uanei nea ata ano nanie anunia reimo anomu ererihu runa me niane. Ne amuna na anana we siaie wani eresaka we numa rei?”
31 Iahata, “Ama. Ueu umene-mene rei tau ukaitau, pene rotu-tu asopo mea momou runa noa inau. 32 Ne arihoni siaie wani asau runai reimo, masi ruamu aninai. Ne munata asupui mai ami reini pusima, ano ruamu ahunui. Pene apuhaiki. Anina, hitio me sae umau waroni reimo, ananare. Ananare na amanoure mai na uata re mansiau onoo.” Ne Yakub ianei tewa ata sahai Rahel sahoro inana amai ne siaie rei.
33 Oyo noa ama inusui pani ne msahane ne numa unta oyo ininai. Ita inina pani Lea runa no makahaia ua rei no numa unta oi. Ne isupui tewa. Samatoro inusui pani anai pina muie ne numa unta honu. 34 Ne Rahel inana siaie rei iaunutui pani tasi. Tasi wani sio okanihooi tau naniai wani iru-ruei tanui roe unta totu hahae. Inana siaie rei samatoro Rahel iruei iese tanui mai numa anoe. Amai ininai isui nehu ne numa anoe ne isupui tewa sirinia.
35 Rahel iahata, “Ama. Pene akapuku tanuku kee. Tewa mo, uhitio unapaya iake tewa. Tewa mo, au wani uneniku.”
Ne amai ininai ia-ia sirinia ne isupui tewa. 36 Isupui tewa reiso Yakub anoi eresaa. Iahata, “Ama. Au una isanae sae tanua? Te we masana mainae sae tanua na rotu-tu asui aka-kaohuku sani akaohu peni rei? 37 Ama. Anina sui nehu pusi mani numa anoa nea. Asupu me apia umau mai tanuma? Saka ahokare mai na autuere kua rei na re mansiau onoore. Onoore na oasau ia seia waini inanare rei.
38 Musum hutu ua urueku ukataya. Me rompau runa me une-uneu rasusu panesi nea. Ranahu tewa. Une-une hanaie isa nanie uaiki mani oo tewa oi. 39 Ne makapanau waroni binatang waroni rasea raaire rei oo, ununi rorire osia tewa. Ne ruaku ukatire. Waroni sio okimanakare tau mono te tau ranie oo, ano asau tanuku na ukatire. 40 Tau ranie, umataku tau ranie titie. Tau pumono, umataku tau mahatane. Nanie uneke mani oo, tewa oi. 41 Eresuniku tau pakariani sanrei rotu-tu musum hutu ua raini nea. Upakariani musum hutusa rahana ate tau nanie unana me hehuka pinau uaso. Ita musum nome rai upakariani nanie usupu une-uneu runa rompau arihonia. Upakariani nanie usupu makapanau arihonia ne asa-sawariku rotu-tu nai hutusa. 42 Sinana pene Anahatana waini amaku runa momoku Abraham uaso oainisi oainaa runai rei ikata runaku mo, mka aisosiku ununiku unaku-nakuku. Ne Anahatana waini amaku Ishak iamuirai ikata runaku. Ianei we kausa wanaya rai. Reiso monosi iasau osia rei, tea?”
Yakub runa Amai Uaso Osopa
43 Laban iasau osi Yakub iahata, “Lea runa Rahel, au we hehuka pinau. Uaso no hehuka, au we kawasa tanuso. Me rompau, me une-uneu rai, mo au. Ne sae waroni ano anoore mai rei mo, araimo au we numa hutae. Ne kani umuna na uni we hehuka, wea momou oi? 44 Reiso mai na uata isopa. Iapuoo hatu rei.”
45 Reiso Yakub inana hatu isa iapuooi na anoo rapeka tau uaso osopa rei. 46 Oyo iaisosi ne mansiau iahata, “Oamanou hatu mai na otanuhahare.”
Otanuhaha pusire oyo onana muaine na oaiso mai hatu nusue rei. 47 Amai ihete hatu rei nanae tau Yegar-Sahaduta. Ne Yakub ihete nanae tau Galed.
48 Laban iahata, “Mka inoo hatu waroni otanuhahare reini anori rapeka runa isopa rei.” Reiso otoe rei nanae Galed. Galed nene manariti “Hatu waroni otanuhahare na anoo rapeka.” 49 Ita iahata, “Uainisi na Upuri Anahatana isaka inoo uata masike irue hainau umau.” Reiso otoe rei nanae Mizpa. Mizpa nene manariti “Numa wani noa-noae osi sio mamsakaya.” 50 Ita iasau honu, “Munata auna kahatene tau we hehuka pinau te, anana sio pina tamena mo, masike ia isa ianei tewa iae, Anahatana waini inoota. 51 Hatu raini waroni otanuhahare runa hatu wani ereoo reini, inoore oyo anori rapeka. 52 Mka uniku hatu waroni otanuhahare na una kahatene tanua tewa. Ano iae, mka aniku hatu waroni otanuhahare runa hatu wani ereoo, ano mka anikure tewa na auna kahatene tanuku. 53 Uainisi na Anahatana waini Abraham runa amaku Nahor runa noa ama oainisi oainaa runai, isaka iapasanata.”
Ne Yakub isopa ihete Anahatana waini amai Ishak iamuirai. 54 Reiso Yakub irehi makapana roe pupue rei osi Anahatana, oyo ianaha runa ne mansiau na pusiso oaiso. Oaiso pusi oyo onekeso.
55 Nene hanu omnanoe Laban imuki nea momou runa ne hehuka pinau, iainisi na Anahatana irui iake osiso samatoro inuniki.