30
1 Ne Rahel mo, isusu tewa sirinia. Reiso ianana kakai. Iasau osi Yakub sanrei, “Ano auna au anaku isa tewa? Munata auna anaku isa tewa mka umataku!”
2 Yakub iatinu sanrei oyo anoi eresaa tau Rahel. Iahata, “Au mo, au Anahatana tewa. Ia sahoro irui ano asusu tewa rei.”
3 Reiso iahata, “Mai na anana Bilha, we ia makahaie reini na anekea runai na isusu osiku. Tau ia isusu mka sio oaoi au tau inai.”
4 Reiso irui ne makahaie Bilha osi sahai. Oyo sahai inekei runai. 5 Ineke runai sanrei oyo tinaini taua. Oyo Bilha iruei runa anai hanaie. 6 Rahel iahata, “Anahatana iatuhete ata au we isanae tau reini tewa. Reiso iatinu tau we mainisie. Reiso irui ia iki hanaie reini osiku.” Reiso ihete nanai tau Dan. Dan nene manariti, “Iapasanaku tewa.”
7 Ita Bilha tinaini taua honu. Iruei runa ia iki hanaie isa. Sio iki hanaia ua nea. 8 Rahel iahata, “Aapataruna runa kakaku oo au we untu.” Reiso ihete ia ikine rei nanai tau Naftali. Nene manariti, “Apataruna.”
9 Taa Lea ianei ata ia mka isusu tewa nea, reiso irui ne ia makahaie rei osi sahai. Ne makahaie rei nanai Zilpa. Reiso Yakub inekei runai oyo tinaini taua. 10 Oyo iruei runa ia iki hanaie isa. 11 Lea iahata, “Au usupu iake nea!” Reiso ihete nanai tau Gad. Gad nene manariti, “Usupu iake.”
12 Ita Zilpa tinaini taua honu. Iruei runa ia iki hanaie isa honu. 13 Lea iahata, “Anoku mirike. Mka sio pinau oasau oahata au anoku mirike.” Reiso ihete ia iki hanaie rei nanai tau Asyer. Nene manariti, “Anoi mirike.”
14 Tau musum manei nanie. (Manei, nooi sani ana.) Ruben ieui napi ria nisi. Hoka ria oyo isupu ai totue isa nanie ereuna sio osusu. Oyo iroriki osi inai. Ne hoka nau numa oyo Rahel inooi. Inooi oyo iainisi arihoni kakai. Iahata, “Asamaku tau me ai totue wani anamu hanaie isupui reini na mkane osiku.”
15 Iahata, “Ano anana au sahaku nea. Ineke ikataku tewa nea. Mka nanie anana ai totue wani anaku hanaie isupui reini?”
Iahata, “Reiso arui anamu hanaie ne ai totue reino mai. Samatoro mka-mkasini mono sahaku inekei ikataya.”
16 Reiso taa Yakub inuniki on ria nisi tau nene ranie manne rei mo, Lea inapai. Oyo iahata, “Ano tau mono reipani aneke akatama mai numa. Tewa mo, uasau osi sahamu nea. Urui anaku hanaie ne ai totue wani isupui ria nisi. Reiso usehaya tau ai totue rei nea.”
Nene mono rei oyo Yakub inekei runa Lea.
17 Lea iainisi reiso Anahatana iatinu tanui. Reiso tinaini taua. Ita isusu ne ia iki hanaie isa honu. Ne hehuka hanaia sio nima nea. 18 Oyo iahata, “Anahatana irui iake osiku. Tau sae urui we ia makahaie osi sahaku.” Reiso ihete nanai tau Isakhar. Nene manariti, “Anahatana iuni iake.”
19 Ita Lea tinaini taua honu. Iruei runa ia iki hanaie isa honu. Ne sio iki hanaia sio nome nea. 20 Iahata, “Anahatana irui ia ikine rei sani sinente wani iake naiosa. Reiso muie reini mka sahaku iamuiraku. Tau sae? Ususu ne sio iki hanaia nome nea.” Reiso ihete ia iki hanaie rei nanai tau Zebulon. Nene manariti, “Anahatana irui iake.”
21 Ita tinaini taua honu. Iruei runa anai pina isa. Ihete nanai tau Dina.
22 Oyo Anahatana anoi runa Rahel. Iatinu tau ne mainisie reiso Anahatana iruiki isusu. 23 Oyo tinaini taua. Iruei runa anai hanaie isa. Iahata, “Anahatana iunaku ususu nea na pene sio ouna pumaaku.” 24 Reiso ihete nanai tau Yusuf. Nene manariti, “Hete ususu honu.” Ihete nanai oyo iahata, “Uainisi na Upuri Anahatana irui anaku hanaie isa honu.”
Yakub runa Amai Oasau osi umau na Yakub Isupu ne Makapanau
25 Taa Rahel iruei runa Yusuf oyo Yakub iasau osi amai. Iahata, “Ama. Uainisi arihonia na ununiku poe we niane nea. 26 Runa arui me hehuka runa mea momou. Tau sae? Upakariani osia reimo noso sio. Tapiso osiku na pusima anunima. Tewa mo, ukonaupua rotu-tu reini nea rei tea.”
27 Amai iahata, “Atinu ee. Au usupu akakinate ata Upuri Anahatana irui iake osiku rei tau ano arue mai tanuku. Reiso pene aeu nea. 28 Ainisi sae arihoniku?”
29 Iahata, “Ama. Ano ruamu anei nea, tea?. Upakariani panesi osia nea. Reiso me makapanau panesi tau au uapiarare. 30 Tau uhoka tewasi, reimo me makapanau panesi tewasi. Ne muie reini mo me makapanau panesi nea. Reiso me kaya nea. Upuri Anahatana irui iake osia rei pusu au. Reiso au ruaku nanie upakariani osi ruaku we pina hehuka pani muie oi.
31 Iahata, “Sae wani mka uruiki osia honu?”
Iahata, “Ruae nea. Ama. Pene arui sae isa osiku nea. Mka usaka me makapanau sirinia. Hete sae amanaku we anamanae reini. 32 Ranie hatae reini ueuku uarinii me makapanau na unana rompau waroni nikapanta runa waroni maniahua. Unana rompa anaya waroni metena. Unana une-uneu waroni nikapanta runa waroni maniahua. Unanare osi ruaku. Hasae uainisi rai mani. 33 Pani muie samatoro amaku ruamu anei. Ata kani we manisate te tewa. Sani taue isa ahoka arinii we makapanau asupu une-uneu waroni nikapanta tewa, te waroni maniahua tewa runa rompa anaya waroni metena tewa samatoro anei noi rei ata unehure.”
34 Iahata, “Iake. Ita iuna sae wani ano asaui rei.”
35 Ne ranie hatae rei amai ianena une-une waroni nikapanta runa waroni maniahua osi ruai. Ianena rompa anaya waroni metena osi ruai. Oyo iaisosi ne hehuka hanaia osakare. 36 Oyo ne hehuka hanaia rei oeu okata makapanau rai rahainau arihoni Yakub. Oeu onona tonu samatoro ohokaso pani tihue rei, oo makapanau nesia rai, osi Yakub isakare.
37 Ne Yakub inana ai sana mataya rerihoni ai hawar, ai badam, runa ai berangan oyo inuki nene unta nanie iunare makinikata. 38 Iuna pusire oyo iaunuture mai makapanau nene tihu naniae. Tau sae? Makapanau rai nanie raninu mo, rakata umau ee. 39 Reiso munata makapanau rai rakata umau mai ai sanaya waroni makinikata rai, mka nene anaya makinikata maniahua sanrei oi.
40 Ita Yakub inana rompau ramanane une-uneu waroni makinikata. Iuna sanrei na ruai isupu ne makapanau na ineare arihoni amai ne makapanau.
41 Yakub inapa rotu-tu inoo makapanau waroni ramkona nanie rakata umau samatoro iuna ai sanaya rai poe tihu. 42 Ne inoo makapanau waroni rakua tewa nanie rakata umau mo, iaunutu tewa. Reiso makapanau waroni putia reimo rakua tewa. Araimo amai hana-hanai ne makapanau. Ne makapanau waroni metena, nikapanta, runa maniahua waroni ramkona reimo Yakub ne makapanau. 43 Reiso Yakub ne makapanau panesi. Ne une-uneu, ne rompau, ne unta, ne keledaiu panesi. (Unta mo, makapana wani nene totu unie mo, nene pupua sonota. Keledai, nooi sani naitanane ne ikine.) Ne manianeu panesi. Reiso Yakub iakanihu amai sanrei reiso ne kaya mainae.