34
Sikhem Inesi tau Dina na Ineke Runai
1 Yakub sio orueso mai kota Sikhem mai otoe Kanaan oyo ereeu taue isa Yakub anai pina Dina ieui iaisei sui ne netau, sio pina Kanaan rei. Dina mo, inai tau Lea. 2 Ieui iaisei oyo Hemor anai hanaie Sikhem inooi. Hemor mo, ia arihoni ipa Hewa. Ia sahoro irime otoe rei. Reiso Sikhem inooi oyo iruma iroriki na nanie inesiki na ineke runai. 3 Ne iaunutu anoi tanui rotu-tu anoi pusiki runai oi. Reiso ianamana iake osiki. 4 Sikhem iasau osi amai sanrei, “Ama. Au uainisi arihonia na anusu ainisi ia pina hehuke rei osiku na unanai.”
5 Yakub iatinu ata anai pina nanai rekahatei nea. Ne ne hehuka hanaia wasomo osaka no makapanau ria otoe huie wani nene monota asi. Reiso iamaturui runa masana rei rotu-tu ne hehuka hanaia onuniso on ria otoe huie rei.
6 Hemor ihokai mai Yakub na nanie iainisi Dina osi anai hanaie. 7 Ihokai oyo sira tau Yakub ne hehuka hanaia ohokaso. Oatinu masana rei osira anoo rasaa hunu ruao. Tau oatinu ata Sikhem iapahia noa hota. Areimo iuna pumaa sio Israel pusiso. 8 Hemor iasau osi Yakub iahata, “Upu. Au anaku hanaie Sikhem anoi pusiki runa anamu pina. Reiso uainisi arihonia na arui anamu pina osiki na uaso onana umau. 9 Mai na uata iapamata sou. Ano me hehuka runa au we hehuka mka oausaha onusu hoka umau. 10 Oruemo mai tanuma sui supani mai kota reini pusu ruamo mo maue. Oaheni sae mani ohane sae mani mai kota reini.”
11 Sikhem iasau osi Dina amai runa nea hotau sanrei, “Wea upu. Uainisi arihonimo na oamanaku we sou reini. Mka urui sae mani wani omi ainisiki. 12 Oasau runa hunonini ina mani iae mka uruire osimo. Hete sae orui mo ia iki pina reini na unanai.”
13 Sikhem iuna noa hota nanai rekahatei reiso nea hotau oakarota Sikhem runa amai uaso. 14 Oahata, “Munata ami arui mania hota inana omi wasoni oeu waene tewasi mo, ami aumaa. 15 Ami amanaku hete sae omi sani ami. Areimo omi hanaia pusimo kahurae oeu waene. 16 Oeu waene samatoro arui mania hota osia na iausaha inusu ihoka umau. Ami mka arue akatamo. Ioi umau tau kaka wani. 17 Ne munata omi openemo tau oeu waene mo, ami mka anana mania hota arihonia oyo aeuma.”
18 Sikhem runa amai oatinu tau sou rei iake. 19 Reiso Sikhem inina nanie oeu waene on sini. Tau sae? Anoi pusiki runa Dina. Mai kota rei Sikhem sahoro sio oamuirai mainae arihoni ne numa anoe pusiso.
20 Oanamana osi Yakub sio pusi oyo Hemor runa anai hanaie uaso oeuso pani kota rei nene mitanunue. Pani mitanunue rei sio kota anoe pusiso osaka oamanouso oana-anamana osi umau. Reiso uaso oasau osi sio kota anoe sanrei. 21 Oahata, “Wea amau pusimo utumo. Arinii we sou reini. Sio Israel wasoni orueso mai ita re kota reini mo, ita re netau. Reiso itapiso orueso mai reini okatata. Orueso onusu ohoka oaheni ohane sui supani mani ruao no maue. Otoe reini mo hekani. Reiso orueso tanui iae iake. Ita iausahata inusu ihoka iake. 22 Ne sio rei nanie orue okatata na ioi umau tau kaka wani, hete sae ipusu sio no sou isa. Areimo kahurae ita hanaia pusita ieu waene sani sio ruao. 23 Mka no makapanau runa no numa hutaya pusire osita, tea? Reiso mai na ipusu no sou rei na orue okatata.”
24 Sio pusiso mai kota anoe rei wasoni oamanouso oamanaku tau Hemor runa anai hanaie uaso no anamanae rei. Reiso sio hanaia pusiso mai kota rei oeu waene.
25 Ereruma nene onona tonu sio hanaia wasoni oeu waene rei oahana raina asi. Yakub ne hehuka hanaia ua onana no tunua. Uaso wasoni Dina nea hotau. Nanao Simeon runa Lewi. Onana no tunua oyo onusu oauhuniso pani kota anoe. Ohunu sio hanaia pusiso. 26 Ohunu Hemor runa Sikhem oi. Ohunuso oyo onana Dina arihoni Sikhem ne numa samatoro oeuso. 27 Ohunu pusiso samatoro uaso noa kakau noa waniu ohokaso mai owahu sio Sikhem no numa hutaya pusire. Owahu pusire tau Sikhem iuna noa hota nanai rekahatei. 28 Onana no makapanau. Areimo onana no une-uneu, no rompau, no koropou, runa no keledaiu. (Keledai nooi sani naitanane ne ikine.) Onana no sae mani waromo pani kota anoe rei runa no nisiu. 29 Onana no apia pusire waroni nene hunonia mainaya. Osota sio pinau runa no hehuka pusiso. Owahu pusi no numa hutaya.
30 Ohokaso mai numa oyo noa ama iasau osi Simeon runa Lewi uaso sanrei. Iahata, “Omi ouna siraka reini tanuku tau sae rei? Mka sio mai Kanaan runa sio Feris wasoni orue mai otoe reini openeso tanuku. Ita mo, ita panesi tewa. Munata sio reini pusiso okata umau na oahita runata, mka pusita imatata.”
31 Oahata, “Ami atapi mania hota osi sio unai sani ia pina numa naue tewa.”