35
Yakub Sio Oeuso poe Nia Betel
1 Taue isa Anahatana iasau osi Yakub iahata, “Oeumo poe nia Betel na oruemo poe rei. Atanuhaha hatu na noore sani anau. Atanuhahare na ainisi ainaa runa au, Anahatana, tanure. Naone arumaya arihoni kakamu Esau, au Anahatana sahoro uatuhete ruaku osia rei.”
2 Reiso Yakub iasau osi ne pina hehuka runa sio wasoni okatai rei. Iahata, “Pesi sio rakana no siaia waromo tanumo. Siaia rerihoni anahatanau waroni titue tewa. Osohumo samatoro okati mo papita. 3 Mai na ieuta poe Betel. Mka utanuhaha hatu na iainisi iainaa runa Anahatana. Anahatana waini iatinu tau mainisie. Anoku ereruei tewa reiso uainisi arihoniki oyo iakahaiku. Ikata runaku sui supani mani.”
4 Reiso orui no siaia runa no pua-puana waroni opakere sani ai totua na raneteso rei. Oruire osi Yakub samatoro ikanire na pene opakere nea. Ikanire poe ai onate nohue haineke kota Sikhem.
5 Tau Yakub sio ohitio oeu oyo Anahatana iuna niana waisa okaitauso. Okaitau reiso osuiso tewa.
6 Oeu rotu-tu ohokaso poe otoe Kanaan. Ohokaso poe Betel wani naone nanae Lus. 7 Ohokaso poe, oyo Yakub itanuhaha hatu noore sani anau na iainisi iainaa runa Anahatana. Ihete otoe rei tau El-Betel wani nene manariti, “Anahatana waini iatuhete ruai osiku mai Betel.” Ihete otoe rei tau Anahatana iatuhete ruai osiki pani rei on irumai arihoni kakai.
8 Pani Betel iae Ribka ne mampakananae waini nanai Debora imatai. Imatai oyo okaniki poe ai onate nohue rei oi. Reiso ohete ai onate rei tau “Ai Mananokone.”
Anahatana Itotoe ata mka Irui Iake osi Yakub
9 Yakub inuniki on pani otoe Mesopotamia oyo Anahatana iatuhete ruai osiki honu. Itotoe ata mka irui iake osiki. 10 Iahata, “Ano mka sio oaoia tau Yakub tewa nea. Ne mka oaoia tau Israel. 11 Au mo, au Anahatana wani we kawasa mainae erenesi pusire. Mka asusu haha panesi. Mea upu mea momou mka ouna niana panesi. Ouna otoa panesi. Mea upu mea momou mka ouna aiau. 12 Tuamane wani uruiki osi momomu Abraham runa amamu Ishak reini iae, mka uruiki osi ano runa mea upu mea momou oi.”
Yakub nene manariti “Iakarota”. Ne Israel nene manariti “Ipalapaposona runa Anahatana”.
13 Anahatana ianamana pusi oyo ieu iarihoni Yakub. 14 Mai tihue wani Anahatana iatuhete ruai osi Yakub rei, Yakub iapuoo hatu isa. Iapuooi na sio anoo rapeka runa Anahatana iatuhete ruai osiki rei. Iapuooi oyo isona mina zaitun runa anggur nene sanaute roe hatu hahae rei. Isonare nanie iainisi iainaa runa Anahatana. 15 Ihete tihue rei nanae tau Betel. Nene manariti, “Anahatana ne numa.”
Rahel Imata Pina Mnotune
16 Yakub sio ohitio oeuso oarihoni nia Betel. Ne sio wasoni arena tinai tihue hainau arihoni nia Efrata asi, oimo Rahel ina-inaso nea. Ne anai rei iamrai eresuni. 17 Tiai ereuni mainae nea oyo ia pian iahata, “Rahel. Apamese anomu. Anamu reini mo, ia iki hanaie honu.”
18 Ne Rahel nahai nanie erenikui nea ihete anai rei nanai tau Ben-oni. Nene manariti “Anaku iuna sinsaraku.” Ne amai ihete nanai tau Benyamin. Nene manariti, “Anaku hanaku wanane.” Hanai wanane nene manariti sio oamuirai.
19 Rahel imatai oyo sio okaniki haineke arena nusue wani nanie ereeu poe Efrata rei. Muie reini Efrata, sio oiki tau Betlehem. 20 Yakub iapuoo hatu isa roe kupuro hahae na nanie sio onoo na oationa ata reini mo, Rahel ne kupuro. Hatu rei wapani rotu-tu muie reini.
21 Okaniki pusi oyo ohitio oeuso oyo oapuoo no numa wani sio onanai rerihoni makapana unta. Oapuooi paka otoe isa ereniku numa mamsakae roe naue wani nanae Eder. 22 Wasomo orueso pani rei, Ruben ineke runa amai sahai Bilha, Rahel ne pina makahaie rei. Taa iatinu sanrei oyo Yakub anoi eresaa.
Yakub ne Hehuka
Yakub ne hehuka hanaia sio hutusa rahana ua.
23 Areini mo Lea ne hehuka. Ne hehuka tau:
Ruben ia manaonete, Simeon, Lewi, Yehuda, Isakhar, Zebulon.
24 Areini mo Rahel ne hehuka. Ne hehuka tau:
Yusuf, Benyamin.
25 Areini mo Bilha, Rahel ne makahaie, ne hehuka. Ne hehuka tau:
Dan, Naftali
26 Areini mo Zilpa, Lea ne makahaie, ne hehuka. Ne hehuka tau:
Gad, Asyer.
Sio ikina reini oamrai pani otoe Mesopotamia.
Ishak Imatai