38
Yehuda runa Tamar
1 Nene muie rei Yehuda ihitio ieui iarihoni nea kakau nea waniu oyo iruei ikata ia hanaie isa arihoni nia Adulam. Ia hanaie reimo, nanai Hira. 2 Mai niane rei Yehuda inoo ia pina hehu Kanaan isa. Ia pina rei amai nanai Sua. Uaso onana umau. 3 Oyo sahai tinaini taua. Iruei runa anai hanaie manaonete ohete nanai tau Er. 4 Ita sahai tinaini taua honu. Iruei runa anai hanaie isa honu. Ohete nanai tau Onan. 5 Ita tinaini taua honu. Iruei runa anai hanaie isa honu. Ohete nanai tau Syela. Ne Syela iamrai rei Yehuda waira nia Kezib.
6 Er ia mainae nea oyo amai inina sahai isa waini nanai Tamar. 7 Anahatana inoo Er ne kahatena panesi reiso ihunui.
8 Er imatai nea reiso amai iasau osi anai hanaie autihue. Iahata, “Onan. Aeu poe kakamu pina na ananai. Kahurae ananai na aneke runai. Me hehuka rei tau kakamu nanai. 9 Ianei ata mka ne hehuka rei osi ia ruai tewa reiso inekei ikata sahai ne ipenei tau iunai tinaini taua. Inekei ikatai suiosa ne ipenei tau iunai tinaini taua reiso Onan iohui poe tuamane. 10 Ipenei iunai tinaini taua reiso Anahatana iapasanai reiso imatai.
11 Imatai reiso Yehuda iasau osi ne mananue, Tamar. Iahata, “Anunia poe me numa. Aruea poe inamu runa amamu tau ano uhanu nea. Aruea poe inamu runa amamu sio rotu-tu Syela ia mainae samatoro uamo onana umau.” Iasau sanrei tau ikaitau pene rotu-tu Anahatana ihunu Syela sani ihunu nea kakau uaso rei. Amai, Yehuda iaisosiki sanrei, reiso Tamar inuniki poe inai runa amai.
12 Kani nene musum isa sanrei ereniku oyo Yehuda sahai imatai. Sahai mo, Sua anai pina rei. Iatamisi sahai suka oyo Yehuda runa ne neta isa oeuso roe nia Timna roe sio wasoni oatori rompau nene hunua. Ne neta rei nanai Hira. Ia arihoni nia Adulam.
13 Sio osima osi Tamar oahata, “Amamu tanaite waini ihokai. Nanie ieui roe Timna na nanie iatori ne rompau nene hunua.”
14 Iatinu sanrei reiso inosu ne papi uhanu rei oyo iausahu papi wani erenete uai anoe pusiki. Inete uai anoe pusi samatoro iruei haineke niane rei nene mitanunue. Niane rei nanae Enaim. Niane rei erehaineke arena wani nanie ereeu roe Timna. Iuna sanrei tau ianei ata anai hanaie Syela ia mainae nea ne amai irui uaso oausahaso tewasi.
15 Reiso Tamar iruei mai mitanunue oyo amai inooi iahata kani ia pina numa naue waini iaheni ruai. Tewa mo, inete uai anoe. 16 Inooi oyo ieui haineke. Iahata, “Ano ainisi ina na uneke ukataya?” Iationa ne mananue tewa.
Iahata, “Pusu ruamu arui, upu.”
17 Iahata, “Au mka urui me une-une honue isa.”
Iahata, “Iake. Hete sae arui sae isa osiku mai ee. Rotu-tu arui une-une rei osiku samatoro on mai uniki.”
18 Iahata, “Reiso ainisi sae rei?”
Iahata, “Rui me mamono inate reino mai runa nene awane. Rui me karupae reino wamo akatai reino mai oi.” Mamono inate rei sio ouna siaie tanui na oanei ata Yehuda ne mamono.
Yehuda irui ne apia rai oyo uaso onekeso. Onekeso oyo Tamar tinaini taua. 19 Onekeso pusi oyo Tamar inuniki poe ne numa. Ihoka poe inosu ne papite rei oyo iausahu ne papi uhanu rei honu.
20 Nene onona inasa nau sanrei oyo Yehuda iaisosi ne neta rei. Iaisosi Hira na irori une-une rei na inana ne apia rai. Inana ne mamono inate runa karupae waroni naone iruire rai. Ne Hira isupu ia pina rei tewa nea. 21 Reiso iasei suru ria suru nau tau sio poe Enaim. Iahata, “Ia pina numa naue waini iruei inapa mai arena nusue rei wainpa?”
Sio oahata, “Ia pina numa naue isa mai rei tewa.”
22 Reiso inuniki pani, iasau osi Yehuda sanrei, “Au usupu ia pina rei tewa. Sio poe niane rei iae, oasau ata ia pina numa naue isa poe rei tewa.”
23 Iahata, “Apia rai ruaya osiki mani nea, tea? Hete sae ita pene ihana kaumaate rei. Unina nanie usenu, ne aninai nea ne asupui tewa.”
24 Reiso nene hunana tonu nau sanrei oyo sio oasau osi Yehuda oahata, “Me mananue iuna ruai sani ia pina numa naue reiso waipo tinaini taua nea.”
Iahata, “Onana ia pina rei mai na iakanupui na imatai arihoni tuniai nea.”
25 Taa Tamar ihokai arihoni numa oyo iaunau osi amai. Iahata, “Tinaiku taua rei tau ia hanaie waini ne apia rai. Arinii kani ia seia ne apia rai?”
26 Yehuda iationa ne apia rai. Iahata, “Ia pina reimo isana tewa. Au sahoro usana. Uahata nanie inuniki poe ne mansia mainaya inapa-napa Syela rotu-tu ia mainae samatoro uaso onana umau. Ne urui uaso onana umau sani uasau rei tewa. Reiso au sahoro usana.”
Yehuda ineke-neke runa Tamar tewa nea.
27 Tamar iruei runa anai hanaie rei poe sira tau sio iki lalekau. 28 Pannuhu uaso nanie oamrai rei ia ikine isa ihoka hanai atue naone. Ia pina ona pian ikanihoo ia ikine waini hanai atue erehokai naone rei tau pola msinae. Iahata, “Ia ikine rei sahoro ihokai naone.” 29 Ne ia ikine rei isaru hanai atue honu reiso ia ikine isa iamraiki naone. Ia pina ona pian iahata, “Reiso ano arapu nanie ahokaya sanrei si?” Reiso ohete ia ikine rei nanai tau Peres. Peres nene manariti “ihokai naone”. 30 Ihokai samatoro ia ikine waini ikanihoo hanai atue tau pola msinae rei ihokai. Ohete nanai tau Zerah. Zerah nene manariti, “Msinae”.