39
Yusuf runa Potifar Sahai
1 Reiso sio Ismael noa upu orori Yusuf poe otoe Mesir oaheniki osi Potifar rei. 2 Ne Anahatana ikata runa Yusuf reiso ne pakariani pusire raeu iake. Iahesa tau sae isa tewa. Iruei poe upui ne numa. Upui, reimo Potifar. 3 Potifar ianei ata Anahatana ikata runa Yusuf. Ianei ata Anahatana iakahaiki na ne pakariani raeu iake. 4 Potifar anoi iake tau Yusuf reiso ihitiki tau hanai wanane. Irui kawasa osiki na isaka ne numa hutae pusiki. Isaka ne sae mani. 5 Ihitiki oyo Anahatana irui iake osi Potifar ne numa hutae. Irui iake osi ne sae mani. Masike mai numa runa noi ne nisiu iae, irui iake osiki. Yusuf tutui reiso Anahatana irui iake osi Potifar. 6 Potifar iparisaa tau Yusuf reiso irui kawasa osiki na isaka ne sae mani. Reiso Potifar anoi erenoa runa sae isa tewa nea. Anoi erenoa runa ne muaine mani.
Yusuf mo, ia hehu iake. Ne patane maka-makae. 7 Reiso taue isa, Potifar sahai iasu-asumata Yusuf. Oyo iasau osiki, “Mai na uata ineketa.”
8 Ne Yusuf ipenei inekei runai. Iahata, “Au upeneku. Upuku Potifar iparisaa tanuku tau ne sae mani. Anoi erenoa runa sae isa mai numa anoe reini tewa nea. 9 Mai numa reini mo, we kawasa mainae. Sani upuku Potifar oi. Iparisaa pusire osiku nea. Hasae ano sahoro tewa. Sapani na nanie uuna kahatene sanrei na upalalosa tau Anahatana?”
10 Masike sanrei iae, Potifar sahai iapamanui iae, ne ipenei ineke ikatai. Iapamanui suiosa, ne ipenei sirinia.
11 Tau ranie hatae isa Yusuf inusui pani numa anoe nanie ipakariani. Ia osa-sa mani nooi pani numa anoe rei tewa. Numa rei huie naiosa. 12 Potifar sahai inesa tau ne papite iasau iahata, “Mai na uata ineketa.”
Ne ikoka ruai oyo ikasu heu ruai. Ikasu heu ruai oyo irumai. Ne ne papite wamo ia pina rei ikatai. 13 Ia pina rei inoo ata Yusuf irumai ne ne papite wani hanai atue 14 reiso ioi iakapona sio numa anoe rei. Ioiso oyo iasau iahata, “Masi onoo. Ia Ibrani rei waini sahaku iroriki mai numa reini iakarotata. Inusui pani we kakaranae anoe nanie iamanea runaku. Ne uakapona kuati. 15 Iatinu au uakapona kuati oyo irumai, ne iarihoni ne papite mai nusuku.”
16 Reiso Potifar sahai ikata Yusuf ne papite rei erenapa sahai inuniki. 17 Sahai inuniki samatoro isima nahu Yusuf osiki. Iahata, “Ia Ibrani waini aroriki mai rei, reimo inusui mai re kakaranae nanie iamanea runaku. 18 Ne uakapona runai reiso irumai iarihoni ne papite mai nusuku.”
19 Iatinu sanrei oyo anoi eresaa mainae. 20 Reiso iaisosi ne makahaia na onota Yusuf na onusui pani pui anoe. Pui wani sio osaka ia aia ne maresia tanui. Reiso onusui pani pui anoe.