¹ Taue isa sio umau oeuso poe Yusuf osima oahata, “Yusuf. Amamu ikupui mtinte.”

Reiso Yusuf ieu ikata ne hehuka hanaia uaso wasoni nanao Manasye runa Efraim. ² Hoka poe oyo sio osima oahata, “Ama. Anamu Yusuf waini ihokai nea.” Iatinu sanrei oyo iamkona runa ruai nanie ihanui. Ihanui oyo iruei roe naniai. ³ Iruei oyo iasau osi Yusuf, iahata, “Anahatana waini ne kawasa mainae erenesi pusire iatuhete ruai osiku pani nia Lus pani otoe Kanaan. [CK: Nia Lus sio oiki tau Bethel oi.] Iatuhete ruai osiku samatoro irui iake osiku. ⁴ Iasau osiku sanrei, ‘Au mka una me hehuka tau ipana panesi. Mka ipana rai rakikasi rasinena. Mka urui otoe Kanaan reini osi me hehuka osi ruao rotu-tu ria supani.’ ⁵ Reiso me hehuka ua wasoni oamrai mai otoe Mesir reini on uhokaku mai Mesir tewasi, mka unanaso tau au ruaku we hehuka. Areimo unoo me hehuka Efraim runa Manasye sani ruaku we hehuka, Ruben runa Simeon. ⁶ Munata sahamu isusu honu, me hehuka rei mka unooso sani we hehuka tewa. Ne ano ruamu me hehuka. Mka onana rusuni arihoni Efraim runa Manasye. ⁷ Au una sanrei tau inamu Rahel. Ununiku on pani otoe Mesopotamia inamu imatai pani otoe Kanaan, haineke nia Efrata. Reiso anoku repunokoi mainae. Ukaniki pani rei, paka arena nusue. Arena rei nanie ereeu napi poe Efrata.” (Muie reini Efrata nanae Betlehem.)

^8-10 Yakub inoo iake tewa nea. Tau sae? Ikore-korei nea. Matai kania haineke raputiso nea. Reiso inoo Yusuf ne hehuka oyo iasei, “Seia ne hehuka reini?”

Iahata, “Sio ikina reini au we hehuka wasoni Anahatana iruiso osiku mai Mesir reini.”

Iahata, “Haineke me hehuka reino mai na uainisi na Anahatana irui iake osiso.” Yusuf haineke ne hehuka rei osi amai oyo iatipuniso runa imukiso. ¹¹ Oyo Yakub iasau osi Yusuf, “Au uahata kani amataya nea reiso unooa tewa nea. Aikee muie reini Anahatana itapiku nanie unoo me hehuka.”

¹² Oyo Yusuf inana ne hehuka uaso arihoni amai karai oyo ruai ihahue mai amai uai anoe.

¹³ Ihahue pusi oyo iakahuu ne hehuka uaso tau hanai atua na iroriso na ohaineke noa momo. Manasye, ia manaonete, mai momoi hanai atue wanane. Oo Efraim, ia muie rei, mai momoi hanai atue pante. ¹⁴ Ne Yakub hanai atua rasupa neka umau. Hanai atue wanane iaunutui roe Efraim ia muie unui. Hanai atue pante iaunutui roe Manasye ia manaonete unui. ¹⁵ Samatoro iainisi na Anahatana irui iake osi Yusuf. Iainisi sanrei,

¹⁶ Ano sahoro aisosi me maisosie on roe noiyaha na iakahaiku tau we susau pusire.

^17-18 Yusuf inoo amai hanai atua rasupa neka umau sanrei oyo iakahuu amai hanai atue wanane iasau, “Ama. Pene auna hanamu atue wanane rei roe Efraim unui tau ia mo, ia muie. Ne una hanamu atue wanane rei mai Manasye unui tau ia mo, ia manaonete.”

Iakahuu hanai nanie inea amai hanai atue wanane rei arihoni Efraim unui nanie iunai mai Manasye unui.

¹⁹ Ne amai ipenei. Iahata, “Anaku. Au uanei. Au uanei. Manasye mka ne kawasa mainae na ne ipane mka rekikasi resinena. Ne wanini mka ne kawasa mainae inesi ia. Na ne ipane iae, rekikasi resinena panesi erenesi ia.”

²⁰ Ita iainisi arihoni Anahatana honu na irui iake osi sio ikina ua rei tau ranie hatae rei sirinia. Iahata, “Upuku Anahatana. Uainisi na arui iake osi we hehuka reini tau me kawasa. Pani muie, mka sio Israel oainisi na arui iake osi ia isa, mka oainisi sanrei, ‘Uainisi na auna ia reini sani Efraim runa Manasye.’”

Reiso Yakub ihete Efraim nanai naone arihoni Manasye.

²¹ Oyo Yakub iasau osi Yusuf iahata, “Ano anoo nea, nanie haineke umataku nea. Ne Anahatana mka iakahaimo na ohokamo arihoni otoe Mesir reini na oeumo pani moa upu moa momou no otoe. Areimo otoe Kanaan. ²² Urui nia Sikhem osi ano ruamu. Uruiki osi mea kakau tewa. Sikhem wani uahita runai arihoni sio Amori.”