47
Ia Ona Aia Nanie Iationa Yakub
1 Taa sanrei oyo Yusuf iautunu nea kakau nima nanie ia ona aia iationaso. Iahata, “Upu. Amaku runa wea kakau wasoni ohokaso on pani otoe Kanaan, orori no une-uneu, no rompau, no koropou runa no apia pusire. Wasoni otoe Gosyen nea.”
Oahata, “Upu. Ami mo, ami mamsaka rompau sani mania upu, mania momou.” 4 Ahokama mai otoe Mesir reini tau pani Kanaan muaina tewa. Ihu titie erehunu pusi monota rotu-tu une-uneu runa rompau rasupu nene muaina tewa nea. Ami ainisi arihonia na aruema pani Gosyen.”
5 Iahata, “Yusuf. Amamu runa mea kakau wasoni rei nea. 6 Aroma pusu ruamu otoe sae wani nanie orueso tanui. Rui otoe wani iake mai Mesir reini. Otoe Gosyen iae iake. Runa rui we makapanau osi ia seia waini mka isaka iake.”
7 Yusuf iatuhete amai osi ia ona aia oi. Oyo Yakub iainisi na Anahatana irui iake osi ia ona aia 8 samatoro ia ona aia iasei tanui, “Ama. Me musum ina nea?”
9 Iahata, “Au we musum utun hutu tonu. Ueu uhori suru poe suru pani rotu-tu reini. Au sinsaraku on au honue rotu-tu reini. Ne uhori rotu-tu potuina sani wea upu wea momou tewa.”
10 Taa sanrei Yakub iainisi na Anahatana irui iake osi ia ona aia oyo iauhaai na nanie inuniki. 11 Yusuf iakahai amai runa nea kakau orueso poe Mesir. Irui otoe rei osi ruao mai haineke Gosyen. Gosyen, tau muie sio oiki tau Ramses. Gosyen, areimo otoe wani iake mai otoe Mesir. Iruiki sani ia ona aia iaisosiki 12 oyo Yusuf iakapena muaina osi amai, nea kakau, runa nea enau pusiso. Irui muaina pusu sio ina noi numa anoe rei.
Tuamana Poe Mesir Pusire Osi Ia Ona Aia
13 Mai otoe rei muaina tewa nai osa rotu-tu sui supani-supani oai tewa nea. Sio Mesir runa sio Kanaan omakaneaso reiso omankae hunu ruao, reiso okua tewa nea. 14 Yusuf iamanou kepeni pusire waroni sio Mesir runa sio Kanaan ohane manei tanure. (Manei nooi sani ana.) Iamanou kepeni rai poe ia ona aia ne numa. 15 Kepeni poe Mesir runa pani Kanaan pusire osi Yusuf nea. Oyo sio Mesir ohokaso mai tanui oahata, “Upu. Masi arui mania muaina umau mai. Pene atapima na amatama ee. Mania kepeni pusire nea.”
16 Iahata, “Munata mo kepeni pusire nea, orui mo makapanau na urui muaina osimo.”
17 Oyo orui no makapanau osiki. Oruire osiki oyo irui muaine osiso na ikati no naitanana, no rompau, no une-uneu, no koropou runa no keledaiu waroni noore sani naitanane ne ikine. Tau musum rei Yusuf irui muaina osiso. Ohane tau no makapanau.
18 Tau musum isa honu ohokaso mai tanui ita oasau, “Upu. Ami nanie asau osia ia-ia. Mania kepeni pusire nea. Mani makapanau waroni osia nea. Mani sae isa tewa nea wani mka arui osia. Hasae mka auna manianeu tanua runa arui mani tuamane osia. 19 Reiso pene atapima rotu-tu amatama. Pene atapi mani nisiu rotu-tu rakaimeneso. Ananama tau me manianeu. Ahane mani tuamana tau maneiu. Ami runa mani tuamane osi ia ona aia. Rui mani maneiu runa manei kania umau na ahurarare noi mani nisiu. Ruire na pene amatama muaine.”
20 Reiso Yusuf ihane tuamane pusiki poe Mesir osi ia ona aia. Sio poe Mesir oaheni no tuamana pusire osiki tau musum muaina tewa. Omata muaine. Reiso no tuamana rai pusire osi ia ona aia ruai. 21 Sio Mesir pusiso ouna manianeu tau Yusuf. 22 Ne hasae sio wasoni osaka oanori runa sio Mesir no anahatanau waroni titue tewa. Sio wasoni osaka rei, no tuamane sahoro oahenire tewa. Tau sae? Sio osupu muaine rerihoni ia ona aia. Reiso oaheni no tuamane tewa.
23 Yusuf iasau osi sio Mesir sanrei, “Masi onoo, mo tuamana, uhanere osi ia ona aia nea. Omi ruamo, unanamo tau manianeu osi ia ona aia nea. Onana manei kania raini na oahurarare noi mo nisiu. 24 Munata maneiu mtuaya nea, mka osama mo maneiu rai tau pahakiani nima samatoro orui pahakiani osa osi ia ona aia. Nesia rai osi ruamo orahure na oaire. Osi ruamo runa mo hehuka.
25 Oahata, “Upu. Ano apuhaima nea, reiso ami ainisi iake rerihonia. Aamanaku auna manianeu osi ia ona aia.”
26 Reiso Yusuf iasau runa maunaune isa poe Mesir. Maunaune rei, areimo wani tau muie reini sio osama no atuhu tau pahakiani nima-nima na orui pahakiani osa osi ia ona aia. Ne hasae atuhu arihoni sio wasoni osaka oanori runa sio Mesir no anahatanau waroni titue tewa sahoro orui atuhu tewa. Maunaune rei ereeu rotu-tu reini.
Yakub Iainisi Na Pene Yusuf Iaunutui Pani Hatu Nohue Poe Mesir
27 Reiso sio Israel orueso poe Mesir. Orueso poe otoe wani nanae Gosyen. Sio okikasi oasinena poe Mesir. 28 Yakub iruei poe Mesir ne musum hutusa rahana itu rotu-tu ne musum utuni hutu ate rahana itu. 29 Haineke nanie imatai nea reiso ioi Yusuf, anai hanaie rei nanie iasau osiki. Iahata, “Aunutu hanamu atue poe karaku na asopa ata mka umataku mo, mka aunutuku pani hatu nohue mai Mesir tewa. 30 Unina na aunutuku pani hatu nohue wani sio oaunutu wea amau wea momou tanui. Arori we tihane hatae arihoni otoe reini na aunutuku pani hatu nohue rei.”
Iahata, “Ama. Au mka una sae wani asaui rei.”
31 Iahata, “Asopa ata mka aunai.”
Reiso Yusuf isopa oyo Yakub iainisi iainaa runa Anahatana roe naniai.