23
Daud Iapuheu Sio Kehila
1 Taue isa sio osima osi Daud oahata, “Sio Filistin wasoni oahita runa sio arihoni kota Kehila. Oahita na nanie onana no maneiu waroni matoro onanare arihoni nisiu.” (Manei, nooi sani ana.)
2 Reiso Daud iasei tau Anahatana sanrei, “Au ueuku uahita runa sio Filistin iake?”
Anahatana iahata, “Iake. Aeu ahita runaso na apuheu sio Kehila.”
3 Ne Daud ne soratatua oasau osiki sanrei, “Upu. Mai otoe Yehuda reini mani ikaitau hunu ruari. Sapani na nanie ieuta pani Kehila na nanie iahita runa sio Filistin?”
4 Reiso Daud iasei arihoni Anahatana honu. Iahata, “Ami aeuma ahita runa sio Filistin iake?”
Anahatana iahata, “Iake. Pene kaitau. Oeu pani Kehila. Mka urui sio Filistin osimo.”
5 Reiso Daud ieu ikata ne soratatua pani Kehila. Hoka pani oyo oahita runa sio Filistin. Ohunu sio Filistin panesi runa onana no makapanau. Taa sanrei reiso Daud iapuheu sio Kehila.
6 Taa Saul iatinu ata Ahimelekh iakahai Daud na Daud irumai oyo ihunu Ahimelekh runa sio mamkenu makapanau osi Anhatana sio hutu wanu rahana ate. Ne Ahimelekh anai hanaie, Abyatar, irumai iauhuniki. Irumai mai Daud na ikata Daud mai Kehila. Ia iae irori papi monne wani ia onate iausahui. Ia onate tau sio mamkenu makapanau osi Anahatana.
Saul Isui-sui Daud
7 Sio osima runa Daud osi Saul oahata, “Daud waipo Kehila.”
Reiso Saul iasau pani anoi iahata, “Anahatana irui Daud osiku nea. Ia waipa kota anoe. Kota wani nene pakelo noa-noae onanai arihoni hatu. Kota wani nene mitanunua tau mamono.”
8 Reiso Saul ianaha runa ne soratatua nanie iaisosiso oeuso poe Kehila nanie oahita runa Daud na ne soratatua.
9 Ne sio umau osima osi Daud oahata, “Mka Saul ne soratatua ohoka mai osotaya.” Reiso Daud ianei ata Saul nanie iuna kahatene tanui. Iatinu sanrei reiso ioi Abyatar, ia mamkenu makapanau osi Anahatana. Iahata, “Aeu mai. Arori me papi monne reino mai.”
10 Iroriki mai oyo Daud iainisi. Iahata, “Upuku Anahatana ano wani ami Israel ainisi ainaa runaya. Au uatinu ata Saul nanie ihokai mai Kehila na ikohu pakelo runa numau pusire. Ikohure tau au wani rei. 11-12 Au uatinu sou rei mo, titue? Upuku Anahatana ano wani ami Israel ainisi ainaa runaya uainisi na ano asima osiku.”
Anahatana iahata, “E-e. Titue. Saul mka ihokai mai.”
Ita Daud iasei honu, “Upu. Mka sio Kehilau reini orui au runa we soratatua osiki?”
Anahatana isana, “E-e. Mka sio oruimo osiki.”
13 Reiso Daud runa ne soratatua wasoni utuni nome sanrei oeuso arihoni Kehila. Oeuso oyo orueso tau niane isa ita osuka-suka tau niana umau honu. Taa Saul iatinu ata Daud waipo Kehila tewa nea oyo Saul ieu poe rei tewa nea.
14 Daud sio orumaso arihoni Kehila oyo orueso roe pupue ria otoe huie ria otoe Zif. Saul isaka isui-suiki ne Anahatana iruiki osiki tewa. 15 Masike sanrei iae Daud ikaitau sirinia. Tau sae, Saul inina nanie ihunui.
Taue isa Daud waipa otoe Hores haineke otoe huie Zif. 16-17 Yonatan iatinu ata waipa Hores oyo ieu pani tanui. Ieu pani nanie iaunaui. Hoka pani oyo iahata, “Waniku. Pene kaitau. Apamese anomu. Anahatana waini ikata runaya. Waini isakaya. Anahatana mka iruia osi amaku tewa. Amaku iae ianei ata mka ano auna aia tau sio Israel. Ianei au mka urue mai hanamu wanane.”
18 Iaunaui pusi oyo uaso osopa honu. Osopa Anahatana inoo. Uaso osopa pusi oyo Yonatan inuniki poe ne numa. Daud iruei mai Hores sirinia.
19 Ita sio umau arihoni nia Zif ohoka pani nia Gibea osima osi Saul honu. Oahata, “Upu. Daud waipo iauhuniki poe otoe Hores haineke ami mani niane. Wairo Pupue Hakhila poe otoe huie Yehuda on poe hae. 20 Ami anei ano anina nanie asotai reiso ahokaya poe tanuma. Ahoka poe mka ami asakai na isotai.
21 Saul iahata, “Omi ouna iake osiku reiso uainisi na Anahatana irui iake osimo. 22 Oeu poe osaka na ono-noo ata kani naniai wainpa titue. Ia seia sahoro inooi poe rei? Au uatinu ata ia mo ia ianei iau-auhuniki iruma-rumai suiosa. 23 Reiso onoo ia-ia sui naniai waroni iauhuniki sui tanure rei. Onoo na onuni mai osima osiku ia-ia. Samatoro au mka ueu ukatamo. Munata waipo otoe rei mka uninai. Masike unata nahai poe otoe Yehuda reipo pusiki iae uninai sirinia.”
24 Sio Zif oatinu sanrei oyo onuniso poe no niane oeu oanaoneso. Daud sio wasopo otoe huie Maon poe ekote wani huie poe otoe huie poe Yehuda on poe hae. 25 Reiso Saul runa ne soratatua ohokaso poe onina Daud ne sio umau osima osi Daud. Oahata, “Saul runa ne soratatua wasoni oninaya.”
Daud iatinu sanrei oyo ieu ikata ne soratatua roe hatu tinetae wapo otoe huie Maon oyo orueso roe rei. Ne Saul iatinu ata Daud waipo rei reiso isuiki. 26 Saul runa ne soratatua osuiki rotu-tu ohokaso roe hatu tinetae rei. Wasoni onina Daud sio on mai hae ne Daud sio wasoni on poe hae. Daud irapu-rapu nanie irumai na Saul pene isotai. Tau sae, Saul sio wasoni ohainekeso nea nanie osotaso nea. 27 Ne sira tau ia isa ihokai mai isima osi Saul. Iahata, “Upu. Anuni rapu pani. Tau sae, sio Filistin wasopa nanie oahita runata.”