21
Daud Irumai Iarihoni Saul
1 Reiso Daud ieui pani Ahimelekh ria nia Nob. Ahimelekh mo, ia waini ia mamkenu makapanau osi Anahatana. Inoo Daud ihokai ruai mani ikaitau reiso ikana-kananunu. Ihokai isupu Daud. Isupui oyo iasei tanui, “Ano ruamu ahokaya mai tau sae reini?”
2 Iahata, “Ama. Ia onate aia iaisosiku mai nanie una sae isa. Iahata au pene uasau runa anamanae rei osi ia isa oi. Reiso au uaisosi we soratatua onapaku noi otoe isa. 3 Reiso uainisi arihonia na uasei mkane. Muai sae wamo tanua? Arui we porotiu hua nimasa te sae muai sae waromo tanua mo arui osiku ee.”
4 Iahata, “Au we poroti tamene tewa. Hasae porotiu waroni aruire osi Anahatana nea. Mai na nanare hete sae mato-mato rei me soratatua oneke okata sio pinau tewa.”
5 Iahata, “E-e. We soratatua oneke runa sio pinau tewa. Munata ami aeu ahita sanreini mo, au we soratatua osaka ruao na pene oapaputiso. Osaka ruao na sio manisata onata. Masike oahita biasa iae osaka ruao. Sapani runa manahita monne sanreini?”
6 Reiso Ahimelekh irui porotiu waroni oruire osi Anahatana rei. Tau sae, porotiu tamene umau tewa. Porotiu rai waroni onanare arihoni meya wani sio oaunuture tanui. Onanare na oaunutu poroti honua osi Anahatana.