एऊना ईसूग पाव तायार चाजूरानो
3
1 आ दिनेल ती बपतीसमाa चियरान एऊना एऊदी देचेत चिड़ा बाट ती वेरी किली,
2 “मेन्नीन उजराकपूर एटे एनोड मापोरबू जाम्मेनी आंगरूरानोb लेग्गे एदेरनो ना”c एनी मेरचीकतेड।
3 “‘पोरबूग पाव तायार चाजूर
आरू ओनूग बाकड़ी पावीन टिट्टे चाज चियूर’d
एन्डान ओक पोल्लेन चिड़ा बाटतेल वेनूंग एर्रा”e
एनी मापोरबून कान तीग काबेर वेन्नी किली लोगीन पोक चियरान गुरू एसाया ऊन इसाब ती नी गो आय लिकी मेन्डीड।
4 एऊना ऊँट गेच्चील तो गान्डेल नूड़ी मेन्डीड आरू आपला किटे ती तोल तो केरदेन काट्टी मेन्डीड।
आरू ओड मिटाकेल आरू मेराम तो तीन नेय्यीन तिन्दीड उन्डीड।f
5 तेबे आतोड एरूसेलेमतेर,
एऊदीया देचेत जाम्मा लोग आरू एरदन पेरेड लेग्गे लेग्गेत जाम्मा लोग पेची किली ओन लेग्गाट वेञ्ञेर,
6 आरू आपला-आपला पापदेरोमूलीन मानी किली ओन कान तीग एरदन पेरेड ती बपतीसमा एतेर।
7 एरोड ओड एके,
कुबे परीसीकूलg आरू सदूकीकूलh ओन लेग्गाट बपतीसमा चियरान पाड ती वेर्रानोन चूड़ी किली,
ओरीन,
“ए किरीच बाम्बीन पापकूल आकाट तो एड़जालेरे!
i वेर्रान डेन्ड तीग बाचू लेक ती मेन्नी तूलेरपूर एनी इमीन एड आय पोक्केड नाड?
8 ईम मेन्नीन उजराकतोर एन्डानोन टोटीकतान तिर्राट पालकूल आकाट तो रेच्चाट कामूल चाजूर।
9 आरू आपलेन मेन्न ती ‘आम्म बुवा इबराईम आय;
आदूग आम डेन्ड बेटामा’ एनी पोक्कू एर्रा एनी चुरता चाजूरानो एरा।
मापोरबू ई केलकूल तीग इबराईमूग पापकूल जेनमाक नाम्बीकताड एनी आन इमीन पोक्कूमेन
10 आरू एपोर मेरकूल मोदेल ती माड़ीन इडरानो मेन्डा।
रेच्चाट पालकूल पाताकोड आवीन कात्ती किली किच ती कुमरार।
आटनी मापोरबू मेन्नीन उजराकपा लोगीन आपला लोगीन कान तीग गुचाक तायार मेन्डाड।
11 आन गो,
ईम मेन्नीन उजराकतान चेत्तूग,
नीरोड इमूंग बपतीसमा चियमेन;
एरोड आन्न ले पिटतेल वेर्रानेड एके आन्न ले बेड़तेड आय।
आन ओन पानेयूलीन केय्य ती पात्ती किली चेन्डान ओन कामीयाल एर्रान बातेरतेन बेले चिल्लान।
ओड इमूंग मापोरबून नाती केचूर चिला जियोमोड आरू किच्चोड बपतीसमा चियराड।
12 तान्न टुटीकतान केटी तान्न केय्य ती मेन्डा।
आदीनोड ओड गोंगकूलीन तुलाक किली पोल्लीन एलगाक किली गोंगकूलीन डिकी ती इडराड आरू पोल्लीन एतोडी चिटा किच ती तीनताड”j एट्टेड।
ईसू बपतीसमा एतानो
13 आतोड ईसू गलील तीग एरदन पेरेड कुडी एऊनेन लेग्गे,
ओन तीग बपतीसमा पात्तू वेञ्ञेड।
14 एरोड एऊना एके,
“आनूंग इन केय्य तीग बपतीसमा पातरानो मेट्टो;
ईन एके आन्न लेग्गाट वेञ्ञोत नात” एनी किली ओनीन बारजाक मुरीयाकतेड।
15 आदूग ईसू,
“एबे गो आटनी एरू इड।
ईटे चाजी आमूंग देरोमूल जाम्मेनी पूरा चाजूरानो रेच्चा आय” एनी पोक्केड।
आदूग एऊना राजी एञ्ञेड।