ई कागेतीन लिकूरानेड मरकूस आय। देरोम सासतोर तो पुन नियोम ती नालू एडो पाटेल तो कागेतूल मेन्डाव। आवीन जाम्मेन तीग पिटीतो आरू पोईल लिकूरानो ई मरकूस लिकूरान एडो पाटा आय। ओड ईसून बारा जान चेलालेर ले ओकूर चिल्लाड। एरोड ईसून चेंगे मेन्डान बारा जान चेलालेर ले ओकूर सिमोन पतरस एन्डानेड मरकूसीन केडीकतानोन ओड लिकेड नाड।

मरकूस ई कागेत ती ईसू आपलेन लोगीन पापदेरोमूल तीग चोड़ाक आपला जियोमीन चियू वेर्रान सरग तो मांजा आय एनी पोक्कूमेड आरू ओनूग जाम्मेन पोडे पान्न मेन्डा एनी टोटीकमेड। आरू ईसू चाजूरान पोरलेत कामूलीन लिकी किली बूत डुमेन पोडे, सोमून्द पोडे आरू वाल्लीन पोडे ईसूग पान्न मेन्डानूग आव जाम्मा ओनीन मानूरान बीतेर ती बेले लिकेड नाड। मांजा नातो नियोमीन मानू लागूरा, नातोन मानू लागाया एन्डान पाटेन नीतीकतान पान्न बेले ओनूग मेन्डा आरू मापोरबू मेन्डानूग पापदेरोमीन माप चाजू बेले ओनूग पान्न मेन्डा एनी बेले लिकेड नाड।

पापदेरोम तीग आरू पापदेरोम तो ताकोत तीग बाचू लोग नातो-नातो कानची चूड़ूमेर। एरोड मांजा तान चाजूरान रेच्चाट कामूल तीग आपलेन बाचाक ओड़ार। एडो पाटा नातो पोक्कूमो एनोड: मापोरबू मोंजीपूर ती जेनोम एरी किली लोग चाजी मेन्डान पापदेरोम तो डेन्डीन तान बेटी किली, लोगीन पापदेरोम तो ताकोत तीग बाचाकतेड। ईसू आय मोंजीपूर ती जेनोम एर्रान मापोरबू। ओनीन मसीयाल एनी पोकरार। मसीयाल एनोड लोगीन पापदेरोम तीग बाचाकतान सरगपूर तो कोस एनी चोमजूरानो आय। ईसून, मापोरबू एनी मानी किली ओड लोगीन पापदेरोम तीग बाचाक मापोरबू चोटतान बाचाकतान कोस एनी बिसवात चाजूरान लोगीन पापदेरोमीन मापोरबू माप चाजूराड। ओड तानीन बिसवात चाजूरान लोगीन आपला चेंगे सरग ती उय्यू आरू तानीन बिसवात चाजा लोगीन एके डेन्ड चियू मारी वेर्राड। ईसून बिसवात चाजूर आरू आसतीर ती मेन्नी किली जुग-जुग तो जियोमीन बेटूर।