ईसून पिलातूसीन केय्य ती ओपीकतानो
27
1 पोकाई जाम्मा बेड़कूल पेलाचकूल आरू एऊदीकूलीन पोँच तो सियानकूल एटे-एटे ईसून आनकीकताम एनी राजी एञ्ञेर।
2 ओर ईसून काटकी किली उञ्ञेर आरू रोमी देचेत राजपालa पिलातूसीन केय्य ती ओपीक चिञ्ञेर।
एऊदा चार्र काट्टी एञ्ञेड
3 तेबे ईसून चुमीक चियरान एऊदा,
ईसून चाय्यीकतान डेन्ड बेटूरान बातेरतेड आय एनी चिड़ाकतानोन चूड़ी किली पाचताकतेड आरू आ तीस गोटा रूप तो पोयसेलीन बेड़कूल पेलाचकूल आरू एऊदीकूल पोँच तो सियानकूलूग मेनची चियू वेञ्ञेड।
4 आरू ओरीन,
“आन नाती केचूर चिला मांजेन चुमीक इड्डी किली पापदेरोम चाजेन नान” एट्टेड।
आदूग ओर,
“आम आदीन पूनाम;
ईनी पुट्टोत” एट्टेर।
5 आदूग एऊदा आ रूप तो पोयसेलीन गुडी ती तीनतेड आरू आना तीग चेनी किली तानी चार्र काट्टी एञ्ञेड।
6 बेड़कूल पेलाचकूल आ पोयसेलीन पेड्डी किली,
“ईव नेतीर तो पोयसेल आय आदूग ईवीन गुडीत गेदीये ती इडरानो,
नीती ती बानाया” एट्टेर।
7 आदूग ओर जाम्मा राजी एरी किली आ पोयसेलीन पोर देचेत लोगीन माटी चियू कुमालीन नेन्दीलीन पात्तेर।
8 आदूगी आ कामेयीन इनेत्तार्रे बेले नेतीर तो कामेय एन्डार।
9-10 तेबे “पोरबू आनीन तियारची मेन्डान आकाट,
इसराएल लोगीन तेरान तीग ओदो लोग,
ओन मोल्ला तीस गोटा रूप तो पोयसेल एनी चिड़ाक मेन्डीर आरू आ पोयसेलीन पेड्डी किली कुमालीन नेन्दीलीन पात्तेर”b एनी मापोरबून कान तीग काबेर वेन्नी किली लोगीन पोक चियरान इरमीया गुरू पोकी मेन्डान पाटा पूरा एञ्ञो।
रोमी देचेत राजपाल पिलातूसीन मुन्देल ईसू
11 ईसू रोमी देचेत राजपाल पिलातूसीन मुन्देल निलची मेन्डीड आरू राजपाल ओनीन “ईन एऊदीकूल कोस आय काय एटे?”
एट्टेड।
आदूग ईसू “ईन गो आटनी पोक्कूमोत” एट्टेड।
12 बेड़कूल पेलाचकूल आरू सियानकूल ईसून कुबे बानील बोदी चियेक ओड मुर्रे एनेडा।
13 आटनी बोदी चियरानूग पिलातूस ईसून “वेन,
इनीन आदरा बोदी चियमेर आरू ईन नांग नाती नी पोकाता?”
एट्टेड।
14 ईसू एके मुर्रे एनेडा।
ओकती बोदीन इसाब ती बेले ओड नाती नी पोका कान्डूग राजपाल काबा एञ्ञेड।
ईसून चाय्यीक बेटाकतानो
15 राजपाल एके बेरचीकारूग ओपोट तियार इसाब ती लोग आडूरान केयदाल ओकूरीन चायूरीड।
16 आतोड जेल बीतराम बरआब्बा एन्डान ओक मांजा मेन्डीड।
ओनीन कुबे लोग रेच्चा पुट्टेर।
17 आदूग जोप तो लोग उलजेक पिलातूस ओरीन “एरीन आन इमूंग चायूरान एनी इमूंग मेन्न लागूमो?
बरआब्बेन चिलाड मसीयाल एन्डान ईसून काय एटे?”
एट्टेड।
18 पिलातूस ईसून ओर कुचेरूग तान्न कान बेटाकतानोन पुन्नी किली आटनी पोकरीड।
19 आनातले पिलातूस नियाव चाजूरान गाद्दी ती उन्डी मेनेक,
ओन आयाल,
“ईन ई नाती केचूर चिला मांजेन केय्य एतीकमेन;
आन्डेक केलायकूड ती ओन चेत्तूग निक्के आबोड़ एञ्ञेन” एनी काबेर चोटतो।
20 बेड़कूल पेलाचकूल आरू एऊदीकूल सियानकूल एके “बरआब्बेन चाय काड आरू ईसून आनकीक एनी पिलातूसीन पोकूर एनी” जोप तो लोगीन उच उचाकतेर।
21 पिलातूस ओरीन,
“ओर इरूल कान तीग एरीन चोड़ाक इमूंग मेन्न लागूमो?”
एट्टेड।
आदूग ओर,
“बरआब्बेन” एट्टेर।
22 आदूग पिलातूस “मसीयाल एन्डान ईसून आन एटे चाजूरान?”
एनी जाच आडेड।
आदूग ओर जाम्मा “ओनीन कुरूस पारे ती कोटीक” एनी पोक्केर।
23 तेबे पिलातूस “नांग ओनीन आनकीकतानो आय?
ओड नातो केचूर चाजेड?”
एनी जाच आडेड।
ओर एके आगेर कोलार एरी किली “ओनीन कुरूस पारे ती कोटीक” एट्टेर।
24 तान पोकरानो पोका चेन्डानोन आरू लोग पोडे चेनूंग मुरीयाकतानोन पिलातूस चूड़ी,
नीर पात्तेड आरू जोप तो लोगीन मुन्देल केय्य नोड्डी किली,
“आन ई मांजेन नेतीरीन चेत्तूग केचूर चिलायेन आय;
ईमी ओनीन नातो एरको चाजूर” एट्टेड।
25 आदूग जाम्मा लोग,
“ओन नेतीर ओटीकतान पालटा आम्म पोडे आरू आम्म पापकूल पोडे वेरको” एट्टेर।
26 आनातले ओड बरआब्बेन ओरूग चाय चिञ्ञेड।
ईसून एके कोड़ेनोड चाडूक इट्टेड।
आरू कुरूस पारे ती कोटीक बेटाकतेड।
पालटेनकूल ईसून इजीत चुमरानो
27 तेबे राजपालीन पालटेनकूल ईसून राजपालीन माल ती उञ्ञेर आरू पालटेन मान्देन ओन लेग्गाट उड़चीकतेर।
28 ओर ओन कुड़तेन कुयकीक किली ओक नेतरो रेंग तो कुड़तेन ओनूग तुन्दीकतेर
29 आरू चाकेल तो तुरेयीन आन्डी किली ओन तेल्ल ती तुन्दीकतेर।
ओन वेला केय्य ती ओक बाड़येन चिञ्ञेर आरू ईसून मुन्देल माटीकूटेल चियी किली “एऊदीकूल कोसूग जुवार एरको” एनी मोसका पाटेल पोक्केर।
30 मारी ओन पोडे ऊचेर आरू आ बाड़येन पेड्डी किली गेन-गेन आदीनोड ओन तेल्ल ती ताप्पेर।
31 आटनी मोचका पाटेल चाजूरान पिटतेल आ नेतरो रेंग तो कुड़तेन कुयकीकतेर आरू ओन कुड़तेन तुन्दीकतेर।
मारी ओर ओनीन कुरूस पारे ती कोटीक उञ्ञेर।
ईसून कुरूस पारे ती कूटील कोटरानो
32 आनातले गेड़े तीग वाल चेनेक,
कुरेनी पोलूब तो सिमोनीन बेट गाट एञ्ञेर।
ओनीन बेरपेला कुरूस पारेन काञपीक किली उय्यू इट्टेर।
33 ओर ईसून गुलगूता एन्डान पाड ती उञ्ञेर।
(गुलगूता एनोड तेल्ल कापरा पाड आय।)
34 आना ओर आंगूर मेल ती,
मीर एन्डान केम्बूरीनc मिसाक किली आदीन ईसूग उनूंग चिञ्ञेर।
ओड एके आदीन चाक चूड़ी किली उनेडा।
35 आनातले ईसून कुरूस पारे ती,
लोव कूटील कोट्टेर।
मारी ओन गान्डेलीन बाटा पात्तू चिटील तीनची किली पायतेर।d
36 आरू आन्नी उन्डी किली ओनीन राका चाजेर।
37 “ऊड ईसू आय,
ऊड एऊदीकूलीन कोस” एन्डान केचूर तो लिकेन,
तेल्ल पोडी,
कुरूस पारे ती ऊटीकतेर।
38 ओन वेला केय्य तेल ओकूर आरू डेबरा केय्य तेल ओकूर,
इरूल डोंगालेरीन ईसून जोंरीया कुरूस पारेल ती लोव कूटील कोट्टेर।
39 आ पावोड चेन्डानेर तेल्ल मेलकाक-मेलकाक ईसून निन्दरेर।
40 ओर एके “ईन मापोरबून गुडीन उजड़ाक किली मारी मुचीच तीग काटरानोत आय।
ईन मापोरबून चिन्ड आय एरोड,
एबे कुरूस पारे तीग इड़ी किली इन जियोमीन बाचाक” एट्टेर।
41 आटनी बेड़कूल पेलाचकूल आरू मूसाल नीतीन मेरचीकतानेर आरू एऊदीकूलीन सियानकूल बेले ईसून मोसका पाटा ऊबूरीर।
42 ओर “ओड आवूर लोगीन बाचाकतेड,
आपला जियोमीन एके बाचाक ओड़ा कियाल ती मेन्डाड।
ऊड इसराएली लोगीन कोस आय एरोड,
ऊड कुरूस पारे तीग किड़ी इड़ी वेरकेड।
आटनी एरोड आदीन चूड़ी आम ओनीन बिसवात चाजूराम।
43 ओड मापोरबून पातीयाकमेड।
मापोरबूग लागोड ओड ओनीन बाचाकपेकेड।
एटे एनोड ओड,
‘आन मापोरबून चिन्ड आय’ एनी पोकरीड” एट्टेर।
44 आटनी ओन जोंरीया कुरूस पारे ती कोटरान डोंगालेर बेले ईसून कुबे लाज पाटेल ऊबेर।
ईसू चाय्यरानो
45 टिटे देलकूल तीग पात्ती आड़ बेरा आर्रे गुलाय देचेन पिरीचनाय चीकोड मूयोतो।
46 आड़ बेरा आत्ती ईसू “एली-एली लमा सबकतानी” एनी कोलार एरी पोक्केड।
आटनी एनोड,
“ए आन्न मापोरबूने!
ए आन्न मापोरबूने!
नांग ईन आनीन चाय काट्टोत नात?”
e एन्डानो आय।
47 आयची लेग्गे निलची मेन्डानेर ओदेर,
आदीन वेन्नी किली,
“ओड एलीयेन कूयूमेड” एट्टेर।
48 ओक मांजा तुरते तूलेरी किली ओक लुस लूसाट मेन्डान इसपाँच एन्डानोन,
टिर टिराट आंगूर रेस ती तुरबी ओक लाटी तीप ती काटकी किली ईसून चूवकीकतेड।
49 आरू ओदेर “तेबूर गाट एपोर एलीया ओनीन बाचाक वेर्राड काय एटे एनी आम्मोर चूड़ार गाट” एट्टेर।
50 ईसू मारी बेले निक्के कोलार एरी किली जियोमीन चाय काट्टेड।
51 आतोड एरूसेलेम गेड़ेत मापोरबून गुडी ती मेन्डान आड़बान्दा गान्डाf पोडी तीग किड़ीत आर्रे एकदाय चीकी एरी इरडू गोन्देल एर चेन्डो।
आरू नेन्दील मेली चेन्डो आरू गाडारूल पारंगी चेन्डोव।
52 माड़ाबाटेल बेले चानची एर चेन्डोव आरू मापोरबू तानूंग एलगाक मेन्डान कुबे लोगीन मोड़ील मारी जियोम पाड चेन्डोव।
53 ओर माड़ाबाटेल तीग पेची किली ईसू मारी जियोम पाड्डी चुलतान पिटतेल मापोरबू आची मेन्डान एरूसेलेम गेड़े ती चेनी किली कुबे लोगूग देका पाट्टेर।
54 ईसून लेग्गे राका मेन्डान सोव गोटा पालटेन मान्देन मुकीयाल आरू ओन चेंगे मेन्डानेर नेन्दील मेलूरानोन आरू एर्रानो जाम्मेनी चूड़ी नारचेर आरू,
“चेत्तेगी ई मांजा मापोरबून चिन्ड आय” एट्टेर।
55 कुबे आयचील आना कोमाड निलची किली चूड़रूव।
ईसू गलील ती मेनेक ईव ओन पोटतेल वेर्रूव आरू ओनीन देक-रेक चाजरूव।
56 आवीन कान तीग मगदलीत मरीयम,
याकूब आरू ईयोसेसीन ईय्या मरीयम आरू जबदीन चिन्डूलीन ईय्या बेले मेन्डूव।
ईसून माटी चियरानो
57 आन्डेक अरमीती गेड़ेत यूसूप एन्डान ओक सावकार मांजा वेञ्ञेड।
ओड बेले ईसून चेलाल एरी मेन्डीड।
58 ओड पिलातूसीन का चेनी किली ईसून मोड़ीन आडेड।
ओड ईसून मोड़ीन यूसूपूग चियू तियारतेड।
59 यूसूप मोड़ीन उय्यी किली आदीन मोल्लेत जेग जेगाट गान्डे ती गुड़ीयाकतेड।
60 आरू आ मोड़ीन चाटरे ती मेन्डान,
आपला पुन मोट कोलकी ती इड काट्टेड।
मारी ओक बेड़तो केल्लीन ओड़पीक एन्दरी कोलकीत वेलीन मूयेड आरू चेन काट्टेड।
61 मगदलीत मरीयम आरू आवूर तो मरीयम मोड़ीन इडरान पाडीन मुन्देल उन्डी मेन्डूव।
मोट ती पारा वालीयालेर राका चाजूरानो
62 पिटतेल तो चिरीक,
पाबूरान चिरीक बेड़कूल पेलाचकूल आरू परीसीकूल पिलातूसीन लेग्गाट चेनी किली,
63 “ए कोस!
आ टेगराल तान जियोम मेनेक-मेनेक,
‘आन मुचीच ती जियोम पाड्डी चुलतान’ एनी पोकी मेन्डानो आमूंग चुरता वेरमो।
64 आदूग मुचीच आर्रे मोट्टीन राका चाजू तियारूक;
चिलाड ओन चेलालेर वेरी किली ओन मोड़ीन डोंगी किली उयरार आरू ओड जियोम पाड्डी चुलतेड नाड एनी लोगीन पोक काडरार।
आटनी एरोड एबे एर्रान टेगरान पाटा मुन्नीत पाटेन ले कियाल तो एर्रा” एट्टेर।