ईसू जियोम पाड्डी चुलतानो
28
1 पाबूरान चिरीक पोलान पिटतेल,
आपतेत पोईल चिरीक,
मगदलीत मरीयम आरू आवूर तो मरीयम ईसून मोड़ीन इडरान गाडारेल चेन्डूव।
2 आतोड पोरबून सरग दूत सरग तीग इड़ी किली वेर्रानूग नेन्दील निक्के ऊञोतो।
ओड,
मोट कोलकीत वेल ती मूयूरान केल्लीन ओड़पीक किली आ केल्लीन पोडे उन्ड काट्टेड।
3 ओड बादोर मेडूरान आकाट देका पाट्टेड आरू ओन गान्डेल एदीर केलकूल आकाट जेग-जेगाचील मेन्डूव।
4 आदीन नार्रूग पारा वालीयालेर तिरी उयरीर आरू चाय्यरान लोगीन आकाट एर चेन्डेर।
5 सरग दूत आयचीलीन “ईम नारचूमोर।
ईम कुरूस पारे ती कोटीकतेर जे?
आ ईसून मोड़ीन चूड़ू इना वेञ्ञोर नार एनी पुट्टेन।
6 ओड इना चिल्लाड;
तान पोकरान आकाट जियोम पाड्डी चुलतेड नाड।
वेरूर आरू ओन मोड़ीन इडरान पाड्डीन चूड़ूर।
7 आरू आनातले ईम जेटके ओन चेलालेरेल चेनी किली ‘मापोरबू,
ईसून चाय्यरान कान तीग जियोम पाटतीकतेड नाड आरू ओड इमूंग ले मुन्नी गलील ती चेनमेड।
ओनीन ईम आना चूड़रार एनी पोक्कूर।
एबे आन इदीन इमीन पोक्केन नान’” एनी पोक्केड।
8 आदूग आ आयचील जेटके मोट कोलकी तीग वाल पेची किली,
नारचोड बेले निक्के वेड़का एरी किली चेलालेरीन पोक्कू तूलोव।
9 उदापड़े ईसू आवीन बेट गाट एरी किली,
जुवार एट्टेड।
आव ओन लेग्गाट वेरी किली ओन केलूल पाड्डी ओनीन मोड़कोव।
10 तेबे ईसू आवीन,
“ईम नारचूमोर,
चेनूर आरू आन्न चेलालेरीन गलील ती चेनूर एनी पोक्कूर आरू ओर आनीन आन्नी चूड़रार” एट्टेड।
पारा वालीयालेरीन टेगरान पाटा पोक्कू तियारतानो
11 आव चेन्डूवी आरू चूड़ पारा वालीयालेर कान तीग ओदेर गेड़ेकेल चेनी किली एर्रानोन जाम्मेनी,
बेड़कूल पेलाचकूलीन वेनपीकतेर।
12 बेड़कूल पेलाचकूल एऊदीकूल सियानकूल चेंगे उलजी किली ऊबेर आरू पारा वालीयालेरूग कुबे पोयसेल चियी किली,
13 ओरीन,
“आम चित्ता तुञ्ञूरानूग ईसून चेलालेर वेरी किली ओन मोड़ीन डोंगी उञ्ञेर एनी पोकरानो आय” एनी तियारतेर।
14 आरू “इदीन काबेर राजपालीन आर्रे एदोडी बेले आम ओनीन चोमजाकताम आरू इमीन बाचाकताम” एनी बेले पोक्केर।
15 आदूग पारा वालीयालेर पोयसेलीन पात्ती किली ओर तामीन मेरचीकतान आकाट चाजेर।
आदूग इनेत्तार्रे बेले ई पाटेन एऊदीकूल आटनी मानूरार।
गुलाय चेनी एडो पाटेन पोकरानो आय
16 आनातले इगारा जान चेलालेर गलील ती ईसू तामीन पोकी मेन्डान कोप्पेकेल चेन्डेर।
17 ओर ओनीन चूड़ी किली मोड़केर,
एरोड ओदेरूग एके ओड ईसू आय काय एटे एनी चेत्त एरा मेन्डू।
18 आनातले ईसू ओर लेग्गाट वेरी किली,
“सरग आरू मोंजीपूर तो जाम्मा पान्न आनूंग चियरानो मेन्डा।
19 आदूग चेनूर आरू जाम्मा देचेल-देचेल तो लोगीन आन्न चेलालेर एरीकपूर आरू बुवा,
चिन्ड आरू नाती केचूर चिला जियोमीन पिदीर ती बपतीसमा चियूर।
20 आरू आन इमीन तियारची मेन्डान जाम्मा पाटेलीन ओरीन मानू मेरचीकपूर।
आरू चूड़ूर मोंजीपूर मुरजारे रोजे तीग आन इम चेंगे नी मेन्डान” एट्टेड।