ईसू माटलालीन उजराकतान पाटा
2
1 इरने मुचीच आकाट एर्रानूग ईसू आरू ओन चेलालेर मारी कपरनाऊम गेड़े ती चेन्डेर।
आना ओड तान डेरा मेन्डान ओलेक ती मेन्डाड एनी लोगूग पुनूंग एञ्ञो।
2 आटनी एन्डानूग निक्के लोग उलजेर आरू कोरी ती बेले निलची मेनूंग पाड चिला मेन्डू।
ओरूग ईसू,
मापोरबून पाटेन मेरचीकतेड।
3 ओड मेरचीकपेक ओदो लोग लकवा तापरान बेमार तो मांजेन बाड़दे ती नेलवीरीन काञपीक किली ईसून कान एन्दरेर।
4 जोप मेन्डान चेत्तूग आ माटलालीन ईसून लेग्गे उय्यू ओड़ेर।
उय्यू ओड़ा कान्डूग इल पोडीa बोत्ता चाजी ईसून लेग्गे आ माटलालीन बोत्तेनोड चाट्टा चेंगे इड़कीकतेर।
5 ईसू ओर बिसवातीन चूड़ी किली,
आ लकवा तापरान बेमार तो मांजेन,
“ए बाबू,
इन पापदेरोमूल इनूंग माप एञ्ञोव” एट्टेड।
6-7 आना एके मूसाल नीतीन मेरचीकतानेर ओदो लोग उन्डी मेन्डीर।
ओर एके ईसू पोकरानोन वेन्नी किली,
“ऊड पापदेरोमूल माप एञ्ञोव एनी पोकरानो एरा।
मापोरबून चायी एडी आवूर लोगीन पापदेरोमूलीन माप चाजू ओड़ार।
ओड तान मापोरबून आकाट ईटे पोक्की किली मापोरबून निन्दरूरानो एरा” एनी मेन्न-मेन्न ती ऊबूरीर।
8 ओर ताम्म मेन्न ती ऊबूरानोन ईसू तान्न मेन्न ती तुरते नी ताड़ी किली ओरीन,
“ईम नांग इम मेन्न ती ईटे ऊबूमोर।
9 नातो पोकरानो चेचीत तो आय आले आदीन पोक्कूर।
माटलालीन पापदेरोमूल माप एञ्ञोव एनी पोकरानो चेचीत तो आय काय चुलूक आरू आपला चाट्टेन पात्त आरू ताक एनी पोकरानो चेचीत तो आय आदीन पोक्कूर” एट्टेड।b
10 मारी ईसू ओरीन,
“ई मोंजीपूर ती,
लोगीन पापदेरोमूलीन माप चाजू सरगd तो मांजेगc पान्न मेन्डा एन्डानोन ईम पुनूंग लागूरा” एनी लकवा बेमार तो मांजेन,
11 “आन इनीन पोक्कूमेन चुलूक।
आपला चाट्टेन चुनतीक आरू आपला ओलेक चेन” एट्टेड।
12 आटनी एन्डानूग लकवा बेमार तो मांजा चुलतेड,
चाट्टेन चुनतीकतेड आरू जाम्मा चूड़ेक ओलेक चेन्डेड।
आ माटलाल आटनी उजरी किली चेन्डानोन चूड़रान लोग काबा एञ्ञेर आरू मापोरबून,
“ए मापोरबू ईन जाम्मेन ले बेड़तोत आय।
ईटे उजराकतानोन आम आरे नी चूड़ाका मेन्डूम” एनी पोक्की किली चाराकतेर।
ईसू लेवीन चेलाल एरू कूयूरान पाटा।
13 मारी ओपोट ईसू सोमून्द कुडी चेन्डेड।
आना कुबे लोग ओन लेग्गे उलजेर आरू ईसू ओरीन मेरचीक मुरीयायतेड।
14 मारी ईसू ताकी चेनेक आलपाईन चिन्ड लेवी पोटी पोटाकतान ओलेक ती उन्डी मेन्डानोन चूड़ेड।
ओड पोटी पातरानेडe आय।
ओनीन ईसू,
“आन्न पोटतेल वेर” एट्टेड।
आटनी एन्डानूग लेवी चुलची किली ओन पोटतेल चेन्डेड।
15 आनातले ईसू,
लेवीन ओलेक बोजी तिनेक,
निक्के पोटी पातरानेर आरू पापीकूलf ओन पोटतेल वेर्रानूग,
ओर बेले ईसू आरू ओन चेलालेर चेंगे उन्डी किली तिन्दीर।
16 परीसीकूलg एन्डान मूसाल नीतीन मेरचीकतानेर,
ईसू पापीकूल आरू पोटी पातरानेर चेंगे तिन्दानोन चूड़ेर।
आरू ईसून चेलालेरीन,
“ईसू नांग पोटी पातरानेर आरू पापीकूल चेंगे उन्डी किली तिनमेड?”
एट्टेर।
17 ईसू आदीन वेन्नी किली,
“चुकनाय मेन्डान लोगूग केम्बूर चियरानेड लागाडा,
नोयरान लोगूग एके लागूराड।
आन देरमीकूलीन एरा,
एरोड पापीकूलीन कूयू गो आय आन वेञ्ञेन नान” एट्टेड।
नीवता मेन्डान बीतेर ती जाच आडूरानो।
18 आतोड बपतीसमा चियरान एऊनेन चेलालेर आरू परीसीकूल एके नीवता मेन्डीर।
ओदेर ईसून का वेरी किली,
“बपतीसमा चियरान एऊनेन चेलालेर आरू परीसीकूलीन चेलालेर नीवता मेनमेर।
एरोड इन चेलालेर एके नांग नीवता मेनारा?”
एट्टेर।
19 आदूग ईसू,
“ओदीर लोग चालनीडीन चेंगे मेनेक नीवता मेनारा।
आटनी आन चेंगे मेन्डानूग आन्न चेलालेर बेले नीवता मेनारा।
20 एरोड आटो बेरा बेले वेर्रा।
आतोड चालनीडीन तान्न कुचरेय लोग उयरार।
आ वादेक ओर नीवता मेन्डार।
21 आटा गान्डा चार्रोड,
पुन गान्डा दाड़केनोड एडी जोड़ाकपारा।
आटनी कुटोड पुन दाड़का डेन्डीक सुनीकता आरू आटा गान्डा आदीक चार्र चेन्डा।
22 एड एरको पुन आंगूर मेलीन तोल तो आटा जोरे ती पाच तापारा।
आटनी ताप्पोड आंगूर पाच पाड़ञेक आटा जोरा पोंगू ओड़ा कान्डूग पुन आंगूर पाच आदीन चारीकता आरू आंगूर पाच बेले वांगूरा।
आरू जोरा नाचरा।
पुन आंगूर पाचीन पुन जोरे ती तापरार” एनी चोमजाकतान डाग्गेन आकाट ईसू पोक्की किली “पुन नीतीन आरू आटा नीतीन मिसाकपोड एराया” एनी चोमजाकतेड।
पाबूरान चिरीकीन इसाब तो पाटा
23 ओकेच पाबूरान चिरीक ईसू आरू ओन चेलालेर कामेय पावोड चेन्डीर।
चेनेक ईसून चेलालेर गोंग चेन्नीन तिनूंग पुटकीकतेर।
24 आदीन चूड़ी किली परीसीकूल ईसून,
“इद चूड़!
ओर पाबूरान चिरीक एऊदीकूल नीती ती चाजू बाना कामीन चाजूमेर”h एट्टेर।
25 आदूग ईसू “दाऊद कोसi आरू ओन चेंगेतेरूग नाती तिनूंग चिला कान्डूग आरू आन्डरानूग ओड नातो चाजेड एनी ईम एतोडी पोड़ारी काय एटे?
26 आबीयात्तार एन्डान मुकीयाल पेलाचीन वादेक,
दाऊद कोस मापोरबून गुड़से ती तान्नी किली मापोरबूग चोत्तीक मेन्डान रोटीलीनj तिन्देड।
आरू तान्न चेंगाटतेरूग बेले चिञ्ञेड।
आ रोटीलीन पेलाचकूलीन चायी एरूगी तिनूंग बाना मेन्डू।
दाऊद कोस आटनी चाजोड बेले,
ओनूग पापदेरोम काटोया।”
27 एनी किली ईसू ओरीन,
“मापोरबू,
पाबूरान चिरीकीन मांजेन चेत्तूग गेड़ेड।
पाबूरान चिरीकीन चेत्तूग मांजेन गेड़ेडा।
आटनी एर्रानूग मापोरबून नेंजेर ती,
मांजा बेड़तेड आय।
पिटतेल गो पाबूरान चिरीक आय” एट्टेड।
28 आरू ईसू,
“आदूगी सरग तो मांजा गो पाबूरान चिरीक तो बेले पोरबू आय” एट्टेड।