लूका लिकूरान एडो पाटेत कागेत, ईसू इसराएली लोगीन आरू जाम्मा लोगीन बाचाकतानेड एनी पोक चियमो।

यावे मापोरबून जियोम, ईसून “नाती चिला लोगूग एडो पाटेन वेनपीक” कूयेड आरू नातो एरको बानील लागूरान लोगीन ईसू नेंजराक किली ओरीन चाकलूराड एनी ई एडो पाटे ती लूका लिकूमेड। पोईल आदयाय ती ईसू जेनमूरान इसाब तो पाटेल ती आरू चेरा चेरी ईसू सरग ती एतीक एर्रान इसाब तो पाटेल ती ओन चेत्तूग मोंजीपूर ती वेड़का एर्रा एन्डान पाटेन गेन-गेन पोड़ू एर्रा।

ईसू सरग ती एतीक एर्रान पिटतेल एटे-एटे एञ्ञो एन्डान इसाबूलीन लूका पोरबू नीतीकतानेर चाजूरान कामूल एन्डान कागेत ती लिकेड नाड।

सरग दूतकूल देका पाड्डी किली पाटेल पाडूरानो, गाडीकूल चेनी किली ईसून मोड़कूरानो, ईसू तान चेपाल मेनेक मापोरबून गुडी ती मूसाल नीतीन मेरचीकतानेर चेंगे ऊबा ऊबी एर्रानो, सामरीत रेच्चाल मांजेन इसाब तो चोमजाकतान डाग्गा, माय चेन्डान वीचीर तोल्लेडीन इसाब तो चोमजाकतान डाग्गा नातेक आमान लूका लिक चियरान एडो पाटेत कागेत ती मेन्डा। मापोरबून बिन्ती जोड़रान बीतेर ती, नाती केचूर चिला जियोमीन बीतेर ती, आयचील ईसून सेवा चाजूरान बीतेर ती आरू मापोरबू पापदेरोमूलीन मापी चाजूरान बीतेर ती ई एडो पाटेत कागेत ती लूका रेच्चा-रेच्चा लिकेड नाड।