¹ Pero ikaw Tito, kahinangyan ihambay mo ang tamà kag maayo nga pagpanudlò. ² Laygayan mo ang maguyang nga mga lyaki nga magpugong sa inda mga kaugalingon, magkabuhì ning tamà para tahuron ng mga tawo kag magkabuhì ning tamà. Kahinangyan makusog ang inda pagtuo. Dapat sinda mahigugmaon kag matiniison. ³ Imaw da ang maguyang nga mga babayi, tudluan mo sinda nga kahinangyan magkabuhì sunò sa kabubut-on ng Dios. Bukon sinda tsismusa, bukon buratsa, kundì magtudlò sa iban kung ano ang maayo, ⁴ agud matudluan da ninda ang mga batà nga babayi kung pauno higugmaon ang inda asawa kag mga ongà, ⁵ kag kung pauno magkabuhì ning tamà, pauno maging malimpyo ang tagipusuon, mahugod sa bayay, mabuot sa isigkatawo kag masinundanon sa inda asawa. Kung ipangabuhì ninda ini nga mga batasan, wayà ning malain nga maihambay kuntra sa hambay ng Dios nga aton ginatudlò. ⁶ Laygayan mo da ang mga batà nga lyaki, tudluan mo kung pauno magkabuhì ning tamà.

⁷ Ikaw, maging maayo ka nga halimbawà sa inda, parti sa tanan nga imo ginahuman. Kahinangyan ginapangabuhì mo ang imo ginatudlò kag ginataw-an mo ini ning importansya. ⁸ Siguraduhon mo gid nga tamà permi ang imo ginatudlò kag wayà ning salà nga makikità sa aton agud mapapahuyà ang mga nagakuntra kay wayà gid sinda ning maihambay nga malain sa aton.

⁹ Ang mga ulipon naman hay dapat gid magsunod sa tanan nga ginasugò ng inda amo agud malipay ang inda amo. Kag ang mga ulipon indì magsinabat, ¹⁰ indì sinda magpangupit, kundì ipakità ninda nga sinda hay mapipiyahan kag maayo, para makità ng mga tawo nga kaayo ang aton ginatudlò parti sa Dios nga aton Manluluwas.

¹¹ Kay gingpakità ng Dios sa tanan nga tawo ang iya grasya nga nagatao ning kaluwasan. ¹² Kag gingtudluan kita nga magtalikod sa malain kag sa kalibutanon nga hilig. Kahinangyan magkabuhì kita sa ini nga kalibutan nga antigo magkabuhì ning tamà, matarong kag nagasunod sa kabubut-on ng Dios. ¹³ Imaw ini ang aton humanon, mintras ginahuyat naton ang malipayon nga adlaw nga aton ginalauman. Adto hay ang pagbalik ng aton Manluluwas nga si Hesu-Kristo, nga mahimayaon kag makagagahom nga Dios. ¹⁴ Gingtao niya ang iya kabuhì para sa aton, agud makaluwas kita sa tanan nga gahom ng kasal-anan kag malimpyo kita para maging iya mga tawo, nga ang gusto gid hay maghuman ning maayo.

¹⁵ Ini nga mga bagay, hay itudlò mo sa mga nagatuo, pakusugon mo ang inda tagipusuon, sabyawon mo kung kahinangyan kay igwa ka ning otoridad. Ayaw magpadaog-daog sa iban nga mga tawo.