¹ Ako si Pablo miyugserbisyo ng Dios^a kag apostol^b ni Hesu-Kristo. Gingsugò ako sa mga gingpilì ng Dios para palig-unon ang inda pagtuo kag agud itudlò ang kamatuuran kung pauno ang pagkabuhì sa kabubut-on ng Dios. ² Agud paagi diri, magkaigwa sinda ning paglaom sa kabuhì nga wayà katapusan nga gingpromisa ng Dios bago pa ginghuman ang kalibutan, kay ang Dios wayà nagapinusong. ³ Kag sa tamà nga tiyempo, iya gingpasayod ang Maayo nga Balità nga gingsalig sa akon, tapos ginawali ko sa mga tawo. Gingpilì ako para magwali sunò sa sugò ng Dios nga aton Manluluwas. ⁴ Nagapangamusta ako sa imo Tito, ikaw nga akon ongà kay nagatuo ka da pareho sa akon. Kabay pa nga mabaton mo ang grasya kag ang katawhayan halin sa Dios nga Amay kag kay Kristo Hesus nga aton Manluluwas.

⁵ Ang rason kung basì gingbilin ko ikaw dirà sa Krete, agud ang mga bagay nga wayà pa matapos hay dapat imo ibutang sa tamà. Kahinangyan magbutang ka ning mga miyugdumaya sa kada lugar nga may mga nagatuo, pareho ng akon mga gingsugò sa imo. ⁶ Ang imo pilion dapat wayà ning kapintasan nga makità, isa lang ang asawa. Ang iya mga ongà hay nagatuo sa Dios, bukon masuwayon kag indì magpinabuang sa inda ginahuman. ⁷ Kahinangyan ang miyugdumaya hay wayà kapintasan nga makità kay gingsaligan siya ng Dios nga magdumaya sa mga nagatuo. Bukon siya hambugon, mahangiton, manginginom, mapintas kag hakog sa kuwarta. ⁸ Kundì madiparahon siya sa mga bisita, mahilig sa maayo, magkabuhì ning tamà, matarong, malimpyo ang tagipusuon, antigo magpugong sa kaugalingon. ⁹ Kag kahinangyan ang miyugdumaya hay matibay sa kamatuuran nga gingtudlò sa iya. Agud puydi da niya mapakusog ang mga nagatuo paagi sa maayo nga pagpanudlò kag maipakità niya sa mga nagakuntra nga salà ang inda gingtudlò.

¹⁰ Ang rason kung basì ginahambay ko ini sa imo kay madamò gid nga mga tawo ang nagakuntra sa kamatuuran, nga nagatudlò ning wayà puyos kag miyugpangluko, labi na ang nagasunod sa ritwal ng Judio.^{c 11} Kahinangyan paparahon mo ini nga mga tawo sa pagpanudlò ning bukon tamà kay nagulo na ang pagtuo ng bilog nga mga panimayay. Ang gusto ninda hay mangwarta paagi sa pagdinayà. ¹² Isa sa inda kaibahan nga ginakilaya ng iya mga kasimanwa sa Krete nga miyugbalità ng mensahe ng Dios, ang naghambay parti sa inda, “Ang mga taga-Krete hay mga pusong, mapintas, tamad kag makagod.” ¹³ Ini nga pamatuod hay masasaligan. Nganì kahinangyan hambayan gid sinda, basì sa tiyad ini nga paagi ang inda pagtuo hay maging tamà kag magakusog. ¹⁴ Agud indì ninda panginanuhon ang mga isto-istorya ng Judio kag ang mga kasuguan nga humanhuman lang ng mga tawo^d nga nagtalikod na sa kamatuuran. ¹⁵ Tanan nga bagay hay malimpyo sa mga tawo nga malimpyo ang tagipusuon.^e Pero wayà ning malimpyo sa mga tawo nga mahigkò kag wayà nagatuo kay ang inda isip kag konsinsya hay mahigkò. ¹⁶ Ginahambay ninda nga kilaya ninda ang Dios, pero indì ini makità sa inda mga ginahuman. Sinda hay makauugot kag matugas ang uyo, nganì indì ninda kaya maghuman ning abir ano nga maayo.