Nang yarà si Pablo sa prisuhan, kadakò ang bulig ni Onesimo sa iya kay permi siya nagakarà kay Pablo para bisitahon. Pero, gusto manda ni Pablo nga magbalik si Onesimo kay Filemon. Nganì gingpadaya niya ang ini nga sulat kay Filemon. Sa iya sulat nagpangabay siya nga patawaron kag batunon kuntà ni Filemon liwat si Onesimo, bukon lang ulipon kundì hali niya kay Hesu-Kristo kay pareho sinda nga nagatuo sa Ginoo.

¹ Ako si Pablo nga napriso tungod sa akon pagserbisyo kay Kristo Hesus kag si Timoteo nga aton utod sa pagtuo, nagasulat sa imo Filemon, nga amon palanggà nga amigo kag kaibahan sa pagserbisyo. ² Kamusta kay Apia nga amon utod nga babayi sa pagtuo, kay Arquipo nga amon kapareho nga daw sundalo tungod sa amon matutom nga pagserbisyo kay Kristo, kag sa tanan nga nagatuo nga nagatipon para magsamba sa Dios dirà sa imo bayay.

³ Kabay pa nga mabaton nindo ang grasya kag katawhayan halin sa Dios nga aton Amay kag kay Hesu-Kristo nga aton Ginoo.

⁴ Nagapasalamat gid ako permi sa Dios kada ako magpangamuyò para sa imo, ⁵ kay nabatian ko ang parti sa paghigugmà mo sa tanan nga gingpabanal ng Dios, kag ang imo pagtuo kay Ginoong Hesus. ⁶ Nagapangamuyò ako nga tungod sa imo pagtuo kay Kristo maging maatag ka sa imo isigkatawo, labi na gid kung ginadumdom mo ang tanan nga mga grasya nga gingtao niya sa aton. ⁷ Pinalanggà ko nga utod kay Hesu-Kristo, nalipay gid ako kag nag-ayo ang akon buot kay ang imo paghigugmà sa kadamò nga gingpabanal ng Dios hay nagpaayo sa inda pamatyag.

⁸ Nganì, abir igwa ako ning otoridad halin kay Kristo nga magsugò sa imo kung ano ang imo dapat humanon, ⁹ pero, kay ginahigugmà ko ikaw, indì ako magsugò sa imo kundì pangabayon ta lang. Ginahuman ko ini bisan pa ako si Pablo nga maguyang na kag niyan hay napriso pa tungod sa akon pagserbisyo kay Kristo Hesus. ¹⁰ Nagapangabay ako sa imo nga patawara na abi si Onesimo.^a Kay ginakabig ko na siya nga daw akon ongà, kay paagi sa akon hay nagtuo siya kay Hesu-Kristo mintras yari ako diri sa prisuhan. ¹¹ Nang una, wayà mo siya napusli, pero niyan hay mapupuslan na gid naton siya. ¹² Niyan, ginapabalik ko dirà sa imo si Onesimo, nga palanggà ko gid. ¹³ Gusto ko kuntà nga diri na lang siya sa akon para siya ang kabaylo mo nga magbulig sa akon mintras napriso ako kay nagtudlò ako ng Maayo nga Balità^{b 14} Pero indì ko ini humanon kung indì ka nagsugot, kay gusto ko nga ang imo pagbulig sa akon hay halin sa imo kabubut-on kag bukon nga napipilitan ka lang. ¹⁵ Siguro plano ng Dios nga mabuyag anay sa imo si Onesimo sa matag-od nga tiyempo agud pag balik niya hay makaibahan mo mintras buhì pa siya. ¹⁶ Kag niyan bukon lang siya isa nga ulipon kundì subra pa dirà; isa na siya nga pinalanggà mo nga utod kay Kristo. Ginapalanggà ko gid siya, pero mas palanggà mo pa gid siya bilang isa nga ulipon kag utod mo sa Ginoo. ¹⁷ Nganì kung ginakabig mo ako nga kaibahan sa pagserbisyo sa Ginoo, batuna siya liwat pareho ng imo pagbaton sa akon. ¹⁸ Kung nakasalà siya o kung may utang sa imo, listahan lang sa akon pangayan kag ako na lang ang imo sukuton. ¹⁹ Ako gid ang nagsulat ini. Ako si Pablo, ang mabayad sa imo. Indì na kahinangyan nga ipadumdom ko pa sa imo nga may dakò ka nga utang sa akon, kay paagi sa akon nakilaya mo si Kristo. ²⁰ Nganì, utod ko kay Kristo, tuguti na lang abi ining akon ginapangabay, kay pareho da kita nga nagatuo sa Ginoo. Palipaya abi ako kay mag-utod da kita kay Kristo. ²¹ Nagasalig gid ako nga tumanon mo ang akon ginapangabay, nganì nagasulat ako sa imo. Kag nagapati ako nga mas subra pa dirà ang imo humanon para sa iya. ²² Igwa pa galì ako ning ipangabay sa imo, preparahi abi ako dirà sa indo ning madayunan, kay nagasalig ako nga itao ng Dios ang indo ginapangamuyò kag paluwason na gid ako sa prisuhan para makabisita ako liwat sa indo.

²³ Ginakamusta ikaw ni Epafras nga kaibahan ko diri sa prisuhan tungod da sa iya pagserbisyo kay Kristo Hesus. ²⁴ Nagapangamusta da ang akon mga kaibahan sa pagserbisyo sa Ginoo nga sina Marcos, Aristarco, Demas, kag Lucas. ²⁵ Kabay pa nga mabaton nindo tanan ang grasya halin sa aton Ginoong Hesu-Kristo.