Ang Sulat Sa Mga
Hebreo
Ang Pang-una nga Hambay
Ini nga libro hay gingsulat para sa mga nagatuo nga Hebreo nga nakakaagi ning mga kasakit tungod sa inda pagtuo kay Kristo kag namimiligro nga matintar nga magtalikod sa ginapatihan ng Kristianismo. Ginapakusog ng nagsulat ang inda tagipusuon para maglig-on sa pagtuo. Ginghuman niya ini paagi sa pagpamatuod nga si Hesu-Kristo ang nagauna kag nagatapos sa pagdyagan pakadto sa pagtuo sa Dios. Tatlo ang kamatuuran nga iya gingsulat diri:
(1) Si Hesus ang wayà katapusan nga Ongà ng Dios, nga nagasunod gid sa Dios nga Tatay paagi sa pagpapakasakit nga iya gingtiis.
(2) Gingpakilaya ng Dios nga si Hesus ang wayà katapusan nga parì, mas mataas sa mga parì sa Lumà nga Kasugtanan. Bilang Ongà ng Dios, si Hesus hay mas mataas sa tanan nga mensahiro ng Dios sa Lumà nga Kasugtanan.
(3) Paagi kay Hesus, ang mga nagatuo hay naluwas na sa kasal-anan, kahadlok kag kamatayon. Bilang pinakapunò ng mga parì, si Hesus hay nagatao ning matuod nga kaluwasan nga imaw ang katuparan ng mga rituwal kag mga hayop nga ginahalad sa altar, sunò sa relihiyon ng mga Hebreo.
Sa pagmitlang sa mga halimbawà ng nagatuo ng pila ka kilaya nga mga tawo sa kasaysayan ng Israel (Kapitulo 11), ginapasayod ng nagsulat sa mga nagabasa nga magkabuhì sinda nga matutom, isentro kay Hesus ang panirò, kag tiison ang abir ano nga kahugaan kag mga kasakit nga puydi ninda nga masayangan. Ang pangkatapusan ng ini nga sulat hay ang mga laygay kag mga bilin.
Mga Suyod
I. Ang Pagtunà: si Kristo ang Bilog nga Mensahe ng Dios (1:1-4)
II. Ang Ongà ng Dios hay Pinakapunò ng mga Parì (1:5-2:18)
a. Si Kristo hay mas Mataas kaysa sa mga anghel (1:5-14)
b. Ang Una nga Paandam (2:1-4)
k. Si Kristo Pinakapunò ng mga Parì kag Manluluwas (2:5-18)
III. Si Kristo hay Masaligan kag Matutom (3:1-5:10)
a. Si Kristo hay mas Mataas kay Moises (3:1-6)
b. Ang Pagduha nga Paandam (3:7-4:13)
k. Si Kristo hay Matutom (4:14-5:10)
IV. Si Kristo hay Pinakapunò ng mga Parì (5:11-7:28)
a. Ang Pagtatlo nga Paandam (5:11-6:20)
b. Si Kristo hay mas Mataas kay Melkizedek (7:1-28)
V. Ang Pagserbisyo ng Pinakapunò ng mga Parì (8:1-10:18)
a. Mas Maayo ang Kasugtanan ni Kristo (8:1-13)
b. Mas Maayo ang Paghalad ni Kristo (9:1-10:18)
VI. Ang Pagtudlò parti sa Pagtuo (10:19-12:13)
a. Ang Pag-upat nga Paandam (10:19-39)
b. Ang Mahuhuman ng Pagtuo (11:1-40)
k. Dapat Matipay ang Nagatuo sa Pagtuo (12:1-13)
VII. Ang mga Pang-ulihi nga Laygay (12:14-13:21)
a. Ang Pag-upat nga Paandam (12:14-29)
b. Ang Iba-iba nga Pagtudlò (13:1-17)
k. Ang Pangabay sa Pangamuyo (13:18-21)
VIII. Ang Pangkatapusan nga mga Bilin (13:22-25)