Ang Sulat Sa Mga
Hebreo
1
Ang Mensahe ng Dios Paagi sa Iya Ongà
1 Nang una, naghambay ang Dios sa aton mga kalulo-lulohan sa madamò nga paagi kag iba-iba nga tiyempo, paagi sa mga mensahiro ng Dios. 2 Pero ining ulihi nga mga adlaw, naghambay siya sa aton paagi sa iya Ongà. Paagi sa iya, ginghuman ng Dios ang kalangitan kag kalibutan. Siya da ang gingpilì ng Dios nga maging tag-iya ng tanan nga butang. 3 Sa iya mismo makikità ang gahom ng Dios nga nagahayag, kag kung sin-o ang Dios imaw da ang Ongà. Siya imaw ang nagapamahayà ng tanan nga butang sa kalangitan kag kalibutan sunò sa iya plano paagi sa iya makagagahom nga hambay. Pagkatapos nga nalimpyo niya ang mga salà ng tawo, nagpungkò siya sa tuo ng Makagagahom nga Dios didto sa langit. 4 Nganì naging mas mataas ang Ongà ng Dios kaysa sa mga anghel, imaw da nga mas ginatahod ang pangayan nga gingtao sa iya kaysa sa inda.
Ang Ongà ng Dios hay Mas Mataas kaysa sa mga Anghel
5 Kay tunà pa nang una, wayà gid ning anghel nga gingsilingan ng Dios,
“Ikaw ang akon Ongà,
kag niyan ipakilaya ko nga ako ang imo Amay.”a
Kag wayà da naghambay ang Dios parti sa abir kanin-o nga anghel,
“Ako hay maging iya Amay,
kag siya hay maging akon Ongà.”b
6 Kag pag day-on ng Dios ang iya panganay nga Ongà diri sa kalibutan liwat, naghambay siya,
“Ang tanan nga anghel ng Dios dapat magsamba sa iya.”c
7 Parti sa mga anghel, naghambay ang Dios,
“Ginahuman ng Dios ang iya mga anghel nga pareho sa hangin,
kag ang iya mga ulipon nga pareho sa nagadabadaba nga kalayo.”d
8 Pero sa iya Ongà, naghambay siya,
“O Dios, ang imo gingharian hay wayà gid ning katapusan,
kag matarong ang imo pagdumaya sa imo gingharian.
9 Naluluyag ka sa matarong, pero nauugot ka sa malain.
Nganì gingpilì ka ng Dios, nga imo Dios,
kag gingtaw-an ka ning kalipay nga subra kaysa sa gingtao niya sa imo mga kaibahan.”e
10 Nagsiling pa gid siya parti sa iya Ongà,
“Sa pagtunà ikaw, Ginoo, imaw ang naghuman ng kalibutan,
kag ang kalangitan hay ginghuman ng imo mga kamot.
11 Ang mga ini hay magakaduyà, pero magapadayon ka abir san-o.
Ang tanan magalumà pareho sa barò.
12 Kag pareho sa pangdoble nga noog tipigon mo ang kalangitan kag kalibutan; o pareho sa barò, ilisan mo ang mga ini.
Pero ikaw, imaw gihapon, wayà nagaguyang kag wayà da ning kamatayon.”f
13 Tunà pa nang una, wayà gid ning anghel nga gingsilingan ng Dios,
“Pungkò diri sa akon tuo hasta mapasukò ko sa imo ang imo mga kaaway.”g
14 Dì ba ang tanan nga anghel hay mga miyugserbisyo nga espiritu nga ginasugò ng Dios, agud magbulig sa mga tawo nga magbaton ning kaluwasan?