2
Dapat Dahanan ang Parti sa Kaayo-ayo nga Kaluwasan
1 Nganì kahinangyan naton nga mas dahanan pa gid ning maayo ang mga kamatuuran nga aton nabatian agud indì kita ianod. 2 Tungod sa Kasuguan nga gingpadaya paagi sa mga anghel hay napamatuuran nga ipiktibo gid, kag ang kada isa nga naglabag kag nagsuway diri hay gingparusahan sunò sa iya nahuman nga salà, 3 sigurado gid nga kita hay indì da makaluwas sa parusa kung wayà naton ginapanginanuha ining kaayo-ayo nga kaluwasan nga wayà gid ning kapareho. Ang Ginoo imaw ang una nga nagpasayod ng ini nga kaluwasan, kag gingpamatuuran ini sa aton ng mga tawo nga nakabatì sa iya. 4 Kag gingpamatuuran pa gid ini ng Dios paagi sa mga tandà kag makatitingaya nga mga butang; sa iba-iba nga mga milagro kag sa pagpanao ng Espiritu Santo sunò sa iya kabubut-on.
Ang Pagpakababà ni Kristo kag Pagtahod sa iya
5 Niyan, parti sa paabuton nga kalibutan nga ginahambay namon, bukon ang mga anghel ang ibutang ng Dios nga magadumaya; 6 pero imaw ini ang nakasulat sa Kasulatan bilang pamatuod,
“ O Dios, ano ang tawo nga imo gid ginadumdom?
Kag ano ang ongà ng tawo nga imo gid ginakabayak-an?
7 Sa matag-od nga tiyempo, ginghuman mo siya nga mas mababà kaysa sa mga anghel.
Pero gingtaw-an mo siya ning paghimayà kag pagtahod nga para sa harì,
8 kag gingpasakop mo sa iya ang tanan nga butang.”a
Ang ginahambay ng Kasulatan nga sakop niya ang tanan nga butang, gusto silingon, nga wayà gid ning butang nga indì ipasakop sa iya. Pero sa niyan nasayuran ta nga bukon pa sakop niya ang tanan nga butang. 9 Pero kung parti kay Hesus, nasayuran ta nga sa matag-od nga tiyempo ginghuman siya ng Dios nga mas mababà kaysa sa mga anghel, kag niyan gingtaw-an siya ng Dios ning paghimayà kag pagtahod nga para sa harì tungod sa kamatayon nga iya gingtiis. Sa matuod lang, tungod sa kaluoy ng Dios, nabatyagan ni Hesus ang iya kamatayon para sa tanan nga tawo.
Nag-abot ang Kaluwasan Paagi sa Pag-antos ni Kristo
10 Angay lang gid nga ginghuman ng Dios nga kuwalipikado si Hesus bilang ginahalinan ng kaluwasan paagi sa iya pag-antos, agud madaya ng Dios ang madamò nga mga ongà para makaparte sa iya himayà. Siya imaw ang naghuman ng tanan nga butang, kag ginghuman niya ini para sa iya kauglingon.
11 Kay si Hesus ang nagalimpyo sa aton mga salà, kag kita ang ginglimpyo niya. Siya kag kita hay may isa nga Amay. Nganì wayà siya nahuyà magtawag sa aton nga iya mga kauturan. 12 Imaw ini ang iya ginghambay sa Dios nga iya Amay,
“Ipapasayod ko sa akon mga kauturan ang imo mga ginghuman;
kag magakanta ako ning pagdayaw sa imo sa inda mga pagtipon-tipon.”b
13 Kag naghambay pa siya,
“Magasalig gid ako sa Dios.”c
Kag naghambay pa gid siya,
“Yari ako kag ang mga ongà ng Dios nga gingsalig niya sa akon.”d
14 Kag tungod ining ginatawag niya nga mga ongà hay mga tawo nga may lawas kag dugò, si Hesus mismo hay naging tawo da agud ihalad niya ang iya kaugalingon para sa inda. Kay paagi sa iya kamatayon, gingduyà niya ang gahom ni Satanas nga imaw ang may gahom sa kamatayon ng mga tawo. 15 Sa tiyad nga paagi, gingluwas niya sinda nga naging ulipon ng kahadlok sa bilog ninda nga kabuhì tungod sa inda kahadlok sa kamatayon. 16 Sigurado gid kita nga bukon ang mga anghel ang ginabuligan ni Hesus, kundì ang mga inapo ni Abraham.e 17 Nganì kahinangyan gid nga naging tawo si Hesus nga pareho gid sa iya mga kauturan sa tanan nga butang, agud naging siya ang pinakapunò ng mga parì nga maluluy-on kag masaligan, nga makahalad sa Dios para mapatawad ang mga salà ng tawo. 18 Siya mismo hay nakaagi da ning mga pag-antos nang gingtintar siya, nganì makakabulig gid siya sa mga tawo nga ginatintar.