3
Si Hesus hay Mas Mataas Kaysa kay Moises
1 Nganì mga kauturan ko nga ginglain ng Dios para sa iya, kag kapareho ko nga mga gingtawag para maging kaibahan niya sa langit, isipa ning maayo nindo si Hesus. Siya ang apostol kag pinakapunò ng mga parì nga aton ginapamatuuran. 2 Matutom siya sa Dios nga nagbutang sa iya, pareho kay Moises nga matutom da sa Dios sa pagdumaya sa pamilyaa ng Dios. 3 Pero ginakabig ng Dios si Hesus nga mas mataas kaysa kay Moises, pareho sa bayay, mas marangal ang naghuman ng bayay kaysa sa bayay mismo. 4 (Kung may bayay, nasayuran ta nga may naghuman ini, kag ang naghuman ng tanan nga butang wayà ning iban kundì ang Dios.) 5 Bilang miyugserbisyo ng Dios, matutom si Moises sa iya pag-asikaso sa bilog nga pamilya ng Dios. Kag ang mga butang nga iya ginghuman hay anino ng mga butang nga matatabò sa paabuton. 6 Pero si Kristo hay masaligan bilang Ongà nga gingtugyanan ng pamilya ng Dios. Kag kita hay sa ini nga pamilya, kung nagapadayon kita nga maisog kag matutom sa aton paglaom nga wayà naton ginakahuyà.
Ang Kapahuwayan Para sa mga Ongà ng Dios
7 Nganì pareho ng ginahambay ng Espiritu Santo,
“Kung mabatian nindo arinyan ang bosis ng Dios,
8 ayaw pagpatugasa ang indo mga uyo;
pareho ng ginghuman ng indo mga kalulo-lulohan nang una nang nagrebeldi sinda sa Dios.
Kay nang yadto sinda sa malangkag nga lugar,
gingtilawan ninda ang Dios.”
9 Naghambay ang Dios,
“Didto gingtilawan ninda ako bisan nakità na ninda ang akon ginghuman sa inda sa suyod ng 40 ka tuig.
10 Nganì hangit gid ako sa adto nga henerasyon, kag naghambay ako, ‘Permi gid nagatayang ang inda tagipusuon, kag indì makasunod sa akon mga ginatudlò sa inda.’
11 Nganì sa akon kahangit nagsumpà ako, ‘Indì gid sinda makasuyod sa kapahuwayan nga halin sa akon.’ ”b
12 Mga kauturan ko kay Kristo, mag-andam kamo nga magkaigwa isa man sa indo ning malain nga tagipusuon nga imaw ang wayà pagtuo sa Dios, nga magadaya sa indo palayò sa buhì nga Dios. 13 Kundì ang humanon nindo, pakusugon nindo ang pagtuo ng kada isa adlaw-adlaw, mintras may opurtunidad nga mabatian ang bosis ng Dios arinyan, agud isa man sa indo hay indì magtugas ang uyo tungod sa pagpatayang sa indo ng salà. 14 Kay kita hay kaibahan ni Kristo kung nagapadayon kita sa pagsalig sa iya tunà nang una hasta sa katapusan. 15 Dì ba nakasulat sa Kasulatan,
“Kung mabatian nindo arinyan ang bosis ng Dios,
ayaw pagpatugasa ang indo mga uyo pareho ng ginghuman ng indo mga kalulo-lulohan nang una nang nagrebeldi sinda sa Dios”?c
16 Sin-o ba nga mga tawo ang nakabatì ng adto nga bosis ng Dios pero nagrebeldi sa iya? Dì ba ang tanan nga nagsunod kay Moises paluwas sa Ehipto? 17 Kag sin-o ba ang nahangitan ng Dios sa suyod ng 40 ka tuig? Dì ba ang mga tawo nga nagpakasalà kag nagkamatay didto sa malangkag nga lugar? 18 Kag sin-o ba ang gingtukoy ng Dios sa iya pagpanumpà nga indì gid sinda makasuyod sa kapahuwayan nga halin sa iya? Dì ba ang mga tawo nga nagsuway sa iya? 19 Nganì sayod gid naton nga wayà sinda nakasuyod sa kapahuwayan kay wayà sinda nagtuo sa Dios.