4
1 Pero abir imaw adto ang natabò sa inda, nagapabilin gihapon ang promisa ng Dios nga puydi kita makasuyod sa kapahuwayan nga halin sa iya. Nganì mag-andam gid kita kay basì kung igwa sa aton ning indì makasuyod diri. 2 Kay nakabatì da kita ng Maayo nga Balità pareho sa inda nang una. Pero wayà ninda napusli ang inda nabatian kay wayà sinda nagkaisa sa mga nagbaton ng mensahe paagi sa pagtuo. 3 Kita nga nagatuo imaw ang nagapasuyod sa kapahuwayan nga halin sa Dios. Pero ang wayà nagatuo indì makasuyod diri, kay naghambay ang Dios,
“Sa akon kahangit, nagsumpà ako nga indì gid sinda makasuyod sa kapahuwayan nga halin sa akon.”a
Bukon ini gusto hambayon nga wayà pa ang kapahuwayan, kay ang matuod, igwa na ning kapahuwayan tunà pa nang iya ginghuman ang kalibutan. 4 Dì ba imaw ini ang nakasulat sa Kasulatan parti sa ikapito ka adlaw,
“Kag sa ikapito ka adlaw nagpahuway ang Dios sa tanan niya nga paghuman.”b
5 Kag nakasulat pa gid,
“Indì gid sinda makasuyod sa kapahuwayan nga halin sa akon.”c
6 Ang mga una nga nakabatì ng Maayo nga Balità hay wayà nakasuyod sa kapahuwayan kay wayà sinda nagsunod sa Dios. Pero ang matuod hay igwa gihapon ning mga makakasuyod sa kapahuwayan, 7 nganì nagatao ang Dios ning isa pa gid ka opurtunidad niyan nga adlaw kay pagkaligad ng madamò nga mga tinuig naghambay siya paagi kay David, pareho ng nasambit na nang una,
“Kung mabatian nindo arinyan ang bosis ng Dios,
ayaw pagpatugasa ang indo mga uyo”?d
8 Kay kung matuod nga nadaya na ni Josue ang mga tawo nang una sa kapahuwayan, wayà na kuntà naghambay ang Dios nga may isa pa gid ka adlaw nga itatao niya ang kapahuwayan sa mga tawo. 9 Nganì may kapahuwayan pa gid nga ginatagana ang Dios para sa iya mga tawo, kag ini nga kapahuwayan hay pareho ng pagpahuway ng Dios sa ikapito ka adlaw. 10 Kay ang abir sin-o nga makasuyod sa kapahuwayan nga halin sa Dios hay makapahuway na sa iya mga himò, pareho ng Dios nga nagpahuway pagkatapos nga nahuman niya ang tanan. 11 Nganì tinguhaon ta gid nga magsuyod sa ini nga kapahuwayan, para tanan kita hay makasuyod, bukon pareho sa mga tawo nang una nga wayà nagsunod sa Dios.
12 Kay ang hambay ng Dios hay buhì kag makagagahom, kag mas maduyot pa sa tanan nga espada nga duha ang tayom. Nagaduyot ini hasta sa kalag kag sa espiritu, kag hasta sa mga lutaluta kag sa utok ng mga tuy-an. Nasayuran niya ang mga butang nga ginahunahunà kag ginahandom ng tagipusuon ng mga tawo. 13 Sa tanan nga ginghuman ng Dios, wayà gid ning may maitagò sa iya; nakikità niya ang tanan kag hayag gid sa iya panirò, kag sa iya kita manabat.
Si Hesus ang aton Pinakapunò ng mga Parì
14 Niyan magpakatibay gid kita sa aton ginapamatuuran, kay may gamhanan kita nga pinakapunò ng mga parì nga nag-agi sa kalangitan. Kag ini hay wayà ning iban kundì si Hesus nga Ongà ng Dios. 15 Ang aton pinakapunò ng mga parì hay nakakabatyag da ng aton mga kaluyahon, kay ang mga pagsulay nga nagaabot sa aton hay naagihan da niya bilang tawo pareho naton,e pero wayà gid siya nakahuman ning salà. 16 Nganì indì kita magpaungan-ungan nga magpalapit sa trono ng Dios nga mapinalanggaon, agud mabaton naton ang kaluoy kag bulig sa oras nga kahinangyan naton ini.