5
Ang mga Kahinangyan bilang Pinakapunò ng mga Parì
1 Ang kada pinakapunò ng mga parì hay ginapilì halin sa mga tawo agud magserbisyo sa Dios para sa mga tawo. Ginabutang siya para maghalad sa Dios ning mga hayop kag mga halad nga regalo para sa kapatawaran ng mga salà. 2 Ginakabig niya ning madahan ang mga tawo nga ignorante kag nagatayang sa kamatuuran, kay ang pinakapunò ng mga parì hay tawo lang da nga punò ng kaluyahon pareho naton. 3 Kag tungod diri, siya mismo hay may kaluyahon da, nganì kahinangyan hay maghalad siya bukon lang para sa mga kasal-anan ng mga tawo kundì patì da sa iya kaugalingon nga mga salà. 4 Kag isa pa, ang halangdon ng pagiging pinakapunò ng mga parì hay indì puydi mabuoy ng abir sin-o para iya sarili kay ang Dios imaw ang nagapilì kung sin-o ang maging pinakapunò ng mga parì, pareho ng pagkapilì kay Aaron nang una.
5 Nganì, imaw da kay Kristo, bukon siya ang nagpadungog ng iya kaugalingon nga maging pinakapunò ng mga parì, kundì ang Dios nga naghamby sa iya,
“Ikaw ang akon Ongà, kag niyan ipakilaya ko nga ako ang imo Amay.”a
6 Kag ginghambay pa gid niya sa iban nga parte ng Kasulatan,
“Ikaw ang parì sa wayà katapusan, pareho ng pagkaparì ni Melkizedek.”b
7 Nang yari pa si Kristo sa kalibutan, nagpangamuyò kag nagpakitluoy gid siya sa Dios nga puydi makaluwas sa iya sa kamatayon. Ginghuman niya ini sa makusog nga boses kaibahan ang pagtangis. Kag tungod siya hay mapainubuson kag matinumanon, gingsabat ng Dios ang iya pangamuyò. 8 Abir Ongà siya mismo ng Dios, natun-an niya ang pagkamatinumanon paagi sa mga pag-antos nga iya naagihan. 9 Ginghuman ng Dios nga kuwalipikado siya bilang ginahalinan ng kaluwasan para sa tanan nga nagatuman sa iya, agud maluwas sinda sa wayà katapusan. 10 Paagi diri, gingdiklara siya ng Dios nga pinakapunò ng mga parì pareho ng pagkaparì ni Melkizedek.
Laygay agud Maging Husto ang Pagtuo
11 Madamò pa kuntà ang amon ihahambay sa indo parti sa pagkaparì ni Melkizedek kag ni Hesus, ugaling lang, kay mahugà iisplikar sa indo kay ginapasuyod lang nindo sa indo talinga ang amon gingtudlò kag ginapalapos naman nindo ini sa kabuak. 12 Dapat kuntà mga manunudlò na kamo kay madugay na kamo nga nagtuo, pero hasta niyan kahinangyan pa gid kamo nga tudluan ng mga pang-una nga mga pagtulun-an parti sa hambay ng Dios. Pareho lang gihapon kamo sa mga lapsag nga nagakinahangyan ning gatas kay indì pa kamo makakaon ning matugas nga pagkaon. 13 Ang nagakabuhì sa gatas hay lapsag nga wayà ning kinasayuran kung ano ang maayo o malain. 14 Pero ang matugas nga pagkaon hay para sa husto na ang mga edad. Ang mga tawo nga tiyad ini hay nasanay na ang inda kaisipan, nganì nakakaintindi sinda sa mahugà nga pagpanudlò kag nakakasayod na kung ano ang maayo o malain.