¹ Mga pinalanggà, ini ang akon ikaduha nga sulat sa indo. Sa pareho nga mga sulat, ginatinguhà ko nga pukawon ang indo malimpyo nga panghunahunà paagi sa pagpadumdom sa indo sa pila ka mga butang. ² Gusto ko nga dumdumon nindo permi ang mga ginghambay ng mga mensahiro ng Dios nang una kag ang sugò ng aton Ginoo kag Manluluwas nga iya gingtao sa indo paagi sa mga apostol nga gingsugò sa indo.

³ Una sa tanan, dapat nindo masayuran nga sa katapusan nga mga adlaw, magaabot ang mga miyugpanglibak kag pagangitlan kamo ninda nga nagakabuhì sunò sa malaw-ay nga ginahandom ng inda lawas, ⁴ paagi sa ini nga mga hambayanon ninda, “Dì ba nagpromisa si Kristo nga mabalik liwat? Diin niyan siya? Ang amon mga kalulo-lulohan hay nagkamatay na, pero imaw da gihapon ang kamutangan ng tanan tunà pa gid nang paghuman ang kalibutan.” ⁵ Kay ginghungod ninda nga kalimutan nga paagi sa hambay ng Dios nahuman ang kalangitan nang una. Kag paagi da sa iya hambay nahuman ang kalibutan halin sa tubì kag paagi sa tubì.^{a 6} Pagkatapos paagi da sa tubì, ginggunaw niya kag gingsirà ang kalibutan nang adto nga tiyempo. ⁷ Kag paagi da sa hambay ng Dios, ang kalangitan kag ang kalibutan nga aton nakikità niyan hay ginatagana para sunugon. Ginatagana niya ini sa Adlaw nga Paghusga, sa ina nga adlaw parusahan ang mga tawo nga wayà nagasunod sa Dios.

⁸ Pero mga pinalanggà, ayaw nindo pagkalimuti ining isa ka butang. Sa Ginoo, ang isa ka adlaw hay pareho sa 1,000 ka tuig kag ang 1,000 ka tuig hay pareho lang sa isa ka adlaw. ⁹ Sunò sa ginahunahunà ng iban, nagapaungan-ungan ang Ginoo sa pagtuman ng iya promisa. Pero wayà siya nagapaungan-ungan, kundì nagahuyat siya nga may pagtiis para magtalikod ang tanan nga tawo sa inda mga salà, kay indì niya gusto nga ang abir sin-o hay mamatay.^b

¹⁰ Pero ang adlaw pagbalik ng Ginoo hay pareho sa pag-abot ng miyugpangawat nga indì nindo masasayuran kung san-o. Sa ina nga adlaw, ang kalangitan hay gulpi na lang maduduyà kag kung ini matabò hay may mababatian nga makusog nga tunog. Masusunog kag masisirà ang tanan nga yarà sa dutà. Maduduyà ang dutà kag ang tanan nga nahuman sa dutà. ¹¹ Tungod kay tiyad ini nga paagi masisirà ang tanan nga bagay, dapat magpakabanal kita kag magsunod sa kabubut-on ng Dios. ¹² Kag mintras ginahuyat naton ang adlaw ng pagpilì ng Dios sa pag-abot ni Kristo, tinguhaon ta maayo ang aton mahuhuman agud mapadalì ang iya pagbalik. Sa inà nga adlaw, susunugon ang kalangitan kag masisirà ini, kag magakatunaw sa kainit ang tanan nga yarà sa dutà. ¹³ Pero ginahuyat naton ang bag-o nga kalangitan kag bag-o nga kalibutan nga gingpromisa ng Dios, kung sa diin magistar ang pagkamatarong. ¹⁴ Nganì mga pinalanggà, mintras nagahuyat kamo sa inà nga mga butang, tinguhaa nindo nga magkabuhì ning malimpyo kag wayà ning kasawayan sa atubangan ng Dios, kag dapat maayo ang indo relasyon sa iya. ¹⁵ Tandai nindo nga ang aton Ginoo hay nagapasensiya kay ang gusto niya hay maluwas ang mga tawo. Pareho da ini sa gingsulat sa indo ng aton palanggà nga utod nga si Pablo, sunò sa kamayad nga gingtao ng Dios sa iya. ¹⁶ Imaw da ini ang iya ginasambit sa tanan niya nga mga sulat, kung sa diin may mga pila siya nga gingsulat nga mahugà intindihon. Kag ginahungod maghambay ng bukon tamà nga gusto hambayon sa ini nga mga gingsulat ni Pablo ng mga tawo nga maluya ang pagtuo kag wayà kasayod ng kamatuuran. Imaw da inà ang inda ginahuman sa iban nga parte ng mga Kasulatan. Nganì sinda mismo ang nagadaya ng inda kaugalingon nga kasiraan.

¹⁷ Pero mga pinalanggà, nasayuran ini na nindo. Nganì magbantay kamo basì kung kamo hay mapatayang sa salà nga mga pagpanudlò ng ini nga mga tawo nga malain, kag agud indì kamo magduda sa indo matibay nga ginapatihan niyan. ¹⁸ Kundì kahinangyan magpadayon sa indo naagihan sa pagpakamaayo kag pagkakilaya nga mas maayo sa aton Ginoo kag Manluluwas nga si Hesu-Kristo. Siya ang dapat naton dayawon niyan kag hasta sa wayà katapusan. Kabay pa!